You are here
Home > music > ELVIS ‘THE GREAT’ PRESLEY

ELVIS ‘THE GREAT’ PRESLEY

Elvis Presley hi ka ngaisang  khawp a,a thihni August ni 16,1977 te pawh kha ka la theihnghilh thei ngai lo.A thih thu kan han hria te chu kan ngui nghuai hlawm mai kha a ni a.Khawvel a kum 42 lek a cham chhung khan rimawi khawvel hi chu a chawk danglam nasa chiang ngawt mai. A concert film MGM in an siam That’s The Way It Is tih kha Shillong Kelvin cinema hall ah khan pawisa neilo chung chungin vawi 5 aia tam mah chu ka en hrim hrim in ka hria.Elvis Presley dam reilo lutuk kha chu pawi ka ti thin,drugs khawvelah khan in tat lut lo se chu vawiin thleng hian min la dam pui ve anga,kum 77 mi a lo ni tawh ang.Anni kum 77 te chu tar chhia an la ni lo a,an la leng ziai ziai mai a nia,zaiin min la awi vut vut thin anga,tunge chart topper  hla te pawh a la nei fo lovang tih sawi thei? Kum 2002, a thih atanga kum 25-na,Silver Jubilee khan  a hla hit number One lo kai tawh 30 zet lawrkhawmin Record Company lar RCA chuan album a buatsaih a,kar lovah tunlai boyband,girlgroup leh zaithiam lam aia an taksa pholan nasat lam buaipui hote leh mipa nisi hmeichhia ni awm taka zai leh incheiho, tunlai MTV generation in an atchilh leh buaipui em em ho, chu a rawn lan lawp lawp mai a nih kha.Ni,Elvis Presley te hi chuan music tak tak hi an siam tlat a,a lei taksa chu vaivutah kir leh tawh mahse,kumin kum 2012,a thih atanga   kum 35 zet liam tawh hnuah pawh hian a hla mawi tak tak,hla rotling hmangin kan zingah thu a la sawi ta fo a nih hi.

            Mizote zingah pawh Elvis Presley ngaisang a atchilh bur ho hi tam tak kan la awm mek,a thih champha a amah la sun ziah te pawh an awm a nia.Mizo Elvis ti a hriat hlawh,C.Lal Engliana hi Mizote zing ah ‘Elvis Presley hardcore fan’ a tling chiang khawp mai.Hmanah khan Elvis Presley hla a cover,hla engemaw zat awmna kha a ti chhuak tawh a,a copy pawh min pe ve in Lelte ah pawh kan ziak kha.Hei kumin a thih champhaphak vawi 35-naah hian Pu C.Lal Engliana hian Elvis Presley hla 61 zet a cover(ngaihtuah teh,61 chu !) a album hmingah ‘Love Me Tender’ a vuah chu min rawn present leh ta!Ngun takin ka ngaithla hlawm a,lung a ti leng kher mai,Pu Enga hi a lo thiam thlawt e!He album hi August ni 20 ah a release dawn a ni.He album a rimawi tumtute PBLianhminga leh Thangbawihate an fakawm thlawt mai,Foster Studio kutchhuak pawh a professional khawp mai.Hla 61 zet a sakah hian sak that loh tak tak a neilo,Love Me Tender leh Baby I Don’t Care tih phei chu ka play nawn fo mai.Mi tam tak,Elvis hla sa thin ten an cover ngam vak loh hlate pawh Pu Enga hian hneh tak in a cover a,a nalh viau zel mai.A album hmasa produce tu a  nupui Lal Rinmawii produce bawk a ni,nupa entawn tlak,tangrual tak an va ni em!.A cover pawh hi a hmuh a nuam a,Elvis-a Graceland hma a amah Pu Enga ding lai thla an han dah ngat mai te hi a hmuhnawmin a ‘boruak’ hrim hrim.

Elvis Presley music/hlate hi chu a ruah mualliam lo teh hlawm a sin. A album ‘Moody Blue’te kha kan tleipui nasa mai thin a,zankhat chu kan ngaithla tlaivar thak mai a,zan a reilo khawp mai.Elvis-a te hi chu sap hovin ICON an tih hi a tling chiang khawp a,zaithiam bawk si,hmeltha bawk si kha a ni a,nula ho khan an um ruih ruih reng a,in ngaizawng leh nupa inthen phah pawh an tam an tia lawm.Khati tak khan to mahse ama sawi dan chuan khawvel a mi khawhar ber a ni tlat a sin.Khang nula zozai ho tan khan hun fal a nei thei chuang lova,a buaipui em em zawk a ni,a khawngaihthlak a sin.Khatia drugs a buaipui na chhan hi a nupui duhtak Priscilla in a uire san vang a ni ber,a pawi ngawt mai.A nun khawharin drugs a han khawih takah khan lung lam that lohna te a chhar ta zel a,hunlo takah a lo thih phah ta a ni ber mai.

 Elvis Presley ngaihsan awm em em na chu a hun lai a an rimawi ngaihsan ber blues music leh Negro music ang chi ho reng reng kha mingo ho sak ve chi ah an ngai ngailo a,mahse a ni hian mihang ho aimah a mawi leh thiam zawkin a rawn thlawh thei ta mai si a,kha kha a hlawhtlinna pakhat pawh a ni reng a ni.

            October ni 11,1973 ah a nupui Priscilla nen an inthen a,an inthen chhan an sawi danin Priscilla hi martial arts class te kal ve thinin a zirtirtu Mike Stone-a’n a lo uire niin an sawi.A nupui then atang hian hlimni hmel a hmu ta meuh lo a ni ber.June ni 26,1977 khan Indianapolis a Market Square Arena ah live performance a nei a,chu chu a live performance hnuhnung ber a ni ta.Heta tanga thla 2 pawh tlinglo,  August ni 16,1977  chuan Memphis ah lungphu chawl in a boral ta a ni.A thih atanga kum 9,1986 khan Rock n Roll Hall of Fame ah inducted(lawmluh) a ni. A fanu neihchhun Lisa pawh zai lamah a rawn lar viau a,mahse a pa vanga lar mai a ni thei bawk.Tin,a music style hian a pa music style pawlna a nei lemlo a,Michael Jackson nen te an han innei ang zuai zuai a,an in then leh mai a.Anni ho hi zawng an hman bawk a,Zosangliana Chhakchhuak hla ‘A Nupui Neihchhun’ tih ang mai khan nuthlawi hmeltha tak niin a duh leh a zai a,a duh leh pasal a nei a,a duh leh film ah a chang a ni ber mai awm e. Elvis Presley thihcham a lo thlen hian Pi Rosie(Aizawl Dawrpui) leh a thiante chuan sunna hun an hmang leh ngei mai thei a ni,anni ho hian Elvis Presley chu an la fuh in an duh fuh ve ngawt mai.Pathian zarah kan dam chuan khawvel te hi a zim sawt bawk a,Memphis khua a a chenna thin Graceland te pawh kan la tlawh ve in mombatti te pawh a thlanah kan la chhi ve lovang tih a sawi theih tawh hleinem.Kumin a thih champhaphak pawh hian a fans te khawvel hmun hrang hrang a mite chu Graceland ah hian an fuan khawm leh nasa ngawt ang.

ELVIS PRESLEY:26 YEARS AGO TODAY.

            Ni 16.8.03 kha ka mihring ngaihsan berte zinga mi Elvis Presley khawvel chhuahsan champhaphak vawi 26 na a lo ni reng mai,khami ni kha ka awl ve ni,Inrinni, a nih miau avangin a ni takah he article hi ka ziak thei ta lo a,tlaikhawhnu deuhah a lo lang ve hnuhnawh a nih hi.Ka mi ngaihsan Elvis Presley thih cham a lo thlen hi chuan a hming lam leh ziak miah lo a kum vei tir hi chu ka phal lo hrim hrim a,a chanchin hmanni deuh lawkah te ka lo ziak kur ngiai nguai tawh avang erawh chuan ka inthlahrung ru viau lawi a,mahse tlem tal chu ka thai lo theilo,ka thai miah loh chuan ka inthiam dawn tlat lo,ka chiri mai ang!!.

            Hming leh address ziak lang duhlo hi chu ka entertain duh meuh lo ve deuh tawh na a,a hun  hi saptawng takin a ‘timing’em mai a, ‘I article ngaihnawm ti taka chhiartu leh Elvis Presley ngaisangtu’ ti meuh a lehkha min rawn thawn a Elvis Presley chanchin rawn beiseitu hian min rawn fuihpawrh deuh roh nen,ka han ziak leh ta nge nge a nih hi.Tuntum phei chu ka dam tha chiah lo nen,ka puitlin lo tep a ni.

            Elvis 30 # 1 Hits tih album kha la rawn bihchian ka tum tho a,chutih hunah pawh chuan Elvis Presley chanchin tlem chu kan la ziak leh dawn tho bawk a,tuntum chu duham vaklo mai awng aw.

            Elvis Presley ngaihsan awm em em na chu a hun lai a an rimawi ngaihsan ber blues music leh Negro music ang chi ho reng reng kha mingo ho sak ve chi ah an ngai ngailo a,mahse a ni hian mihang ho aimah a mawi leh thiam zawkin a rawn thlawh thei ta mai si a,kha kha a hlawhtlinna pakhat pawh a ni reng a ni.A retheihna chhiar chhuah dan leh a chanchin dang chu kan ziak kur ngiai nguai tawh thin ka tih kha,thenkhat tan a ninawm palh ange,ziak vak tawh lo mai ang,a duh chuan Ralvengtu issue hluiah khan a chhiar theih anga,internet atang pawhin archive ah khan a chhiar theih tho ka ring.

            1977,August ni 16 kha ka la hre reng thin,ka chhinchhiah ve tlat na pawh kan university kal lai,Independence Day tuk chiah a kan thian vengva zual ten min hrilh kha a ni.A hma lawk kum 2 vel liam ta ah kha a film ‘That’s The Way It Is’ kha Kelvin Cinema Hall ah khan kel phung tapchim hmu an sawi ang mai khan kan birh tlut tlut thin kha a ni a,student rethei te nih nak alaiin Elvis Presley concert film en nan chuan pawisa te kha kan nei thei riau a,vawi 5 chu chiang bangin ka en in ka hria.Ka aia en tam ka thiante zingah pawh an tam mai.Khatia University campus a a thih thu ka han hre ta mai kha ka hnim deuh suk hian ka hria a,tih vak ngaihna ka hre bawk silo.Khang laite chuan a hla han play tur pawhin tape recorder tak ngial pawh kan nei zo lo a,zan lam a a tribute programme Shillong Radio station atanga an tih chhuah tak mialin ti a lo chan kha kan tih theih sang ber a ni mai.

            October ni 11,1973 ah a nupui Priscilla nen an inthen a,an inthen chhan an sawi danin Priscilla hi martial arts class te kal ve thinin a zirtirtu Mike Stone-a’n a lo uire niin an sawi.A nupui then atang hian hlimni hmel a hmu ta meuh lo a ni ber.June ni 26,1977 khan Indianapolis a Market Square Arena ah live performance a nei a,chu chu a live performance hnuhnung ber a ni ta.Heta tanga thla 2 pawh tlinglo,  August ni 16,1977  chuan Memphis ah lungphu chawl in a boral ta a ni.A thih atanga kum 9,1986 khan Rock n Roll Hall of Fame ah inducted(lawmluh) a ni.

            Priscilla interview na (CNN/BBC) kha ka lo en tlat lo mai a,sawi tur ka hrelo,in mi request hi ka ti puitling thei tlat lo,a pawi khawpmai.A fanu Lisa pawh zai lamah a rawn lar viau a,mahse a pa vanga lar mai a ni thei bawk.Tin,a music style hian a pa music style pawlna a nei lemlo a,kei phei chiuan a ei vak lo,sawi thui tur ka hrelo a ni.Anni ho hi zawng an hman bawk a,Zosangliana Chhakchhuak hla ‘A Nupui Neihchhun’ tih ang mai khan nuthlawi hmeltha tak niin a duh leh a zai a,a duh leh pasal a nei a,a duh leh film ah a chang a ni ber mai awm e.Elvis-a nupui Priscilla chanchin pawh hi ka hre thar lo khawp bawk mai, tunah tak chuan pasal a neih ka hrelo,an ni ho hi chu mahni duh dan dan a awm duh mi ngang hi an ni a,controltu pasal neih chu an peih lem lo chu a nih hlawm hi.

            Elvis Presley thihcham a lo thlen hian Pi Rosie(Aizawl Dawrpui) leh a thiante chuan sunna hun an hmang leh ngei mai thei a ni,anni ho hian Elvis Presley chu an la fuh in an duh fuh ve ngawt mai.Pathian zarah kan dam chuan khawvel te hi a zim sawt bawk a,Memphis khua a a chenna thin Graceland te pawh kan la tlawh ve in mombatti te pawh a thlanah kan la chhi ve lovang tih a sawi theih tawh hleinem.Kumin a thih champhaphak pawh hian a fans te khawvel hmun hrang hrang a mite chu Graceland ah hian an fuan khawm leh nasa ngawt ang.

            Taka,kum 40 lai laim ta a Elvis hla record,mahse an la release loh ,1964 a a channa Roustabout film hla a tan an phuah ‘I’m A Roustabout’,a hun laia Producer ten an telh duhloh chu RCA chuan October ni 7, ‘03 hian a release dawn tih Elvis thih cham vawi 26 na,16.8.03 khan an puang.He hla hi Winfield Scott leh Otis Blackwell te phuah dun a ni nghe nghe.

A Lanna tlang dang atangin

            Kumin ni 16.8.2016(Thawhlehni)kha rimawi khawvel a ‘Legend’ tling pha ngat,Rock n Roll lalpa an lo tih hial Elvis Aaron Presley thih champhaphak vawi 39-na a lo ni reng tawh mai a,a hun takah ziak hman lo mahila,Elvis Presley ka ngaihsan zia leh ui zia tih lan nan ka rawn tlai khawhnu ziah tho a ni. Kei anga ngaihlu leh star tu tam tak  ‘niar’ deuh leh ‘niar’ lo deuh zingah pawh in awm ve thluah ang tih ka ring.Kha August ni 16,1977 kha ka la hre ve reng mai.Lehkha zira Shillong Tribal Hostel a ka room a ka awm lai a ni a,Elvis Presley a thi tih ka han hre thut mai chu tleirawl te chauh kan la ni na khan min barakhaih nasa in ka ui ve chiang ngawt mai.                                         January ni 8,1935,Mizoram a YMA pian kum chiah khan Elvis Presley hi a lo piang a, khawvel ah kum 42 lek chamin August ni 16,1977 khan chatuan ram a lo pan leh ta a ni.He khawvel a reilo te a cham ve chhung khan khawvel a mi lar ber pakhat a ni hman a,thingtlang khaw kil khawr ber a mi,fur laia lei min hum hum na ram a mite pawhin kan lo hre ve thin a nih kha.Elvis a chanchin sawi hian khawvel lama a tlan dan leh ruihhlo ngawl a vei thute kan rilruah a lo lang thin awm e.Mahse an sawi ang em em hi chu a ni bik lo a nia,han chhiar ve mah teh:

            Elvis Presley hi American Juda mi niin chhungkaw rethei tak atanga lo chawr chhuak ve mai a ni.A nu hian phir a hring a,an hmingah Jesse Garon leh Elvis Aron an sa a,vanduaithlak takin Jesse hi a nausen laiin a thi hlauh.Tichuan Elvis chu a nu leh pa fa neihchhun a lo ni ta a ni.A Juda hming Aron tih chu a lo puitlin hnuah Aaron tiin a ti danglam a ni.A nu leh pa hi a hmangaih hle mai a,a lo lar a a lo hausak hnu pawhin a duat thei hle thin.1958 khan a nu Gladys chuan a boral san a,a tuar na hle mai a, ‘Khawvelah hian ka duh duh ka nei thei a,mahse ka nu zawng ka nei let leh thei dawn tawh si lo’ a ti hial nghe nghe a ni.

            1967 May ni 1 khan Priscilla Beaulieu nen an innei a,a nupui neih ni te hian a nu in a hmanpui ve lo chu a khua a har hle a ni.1968 February ni 1 ah fanu Lisa Marie an nei a,an hlim hle emaw tih laiin a nupui chuan a uire san ta tlat,heta tang hian Elvis-a nun khua chu a hlim tak tak thei tawh lova,a khua a har em em reng ringawt mai a ni.A nupui a then atang hian a nun a ngui tial tial a,mutna damdawi sleeping pill eilo chuan mut pawh a muhil thei tawh lo a ni ber.

            Kum 4 lek a nih lai atanga a thih thlengin Elvis Presley hi Kristian sakhaw vuan tlattu leh Isua ringtu a ni a.East Tupelo khua a First Assembly Church of God Biak in a Pathian fakna hla a sak thinte chu he khawvela a lo pianchhuah a a hla sak hmasak berte an ni a.A nu leh pa bulah thu in Biak in ah Pathian a pawl ve thin a,camp ah leh revival ah te a kal ve thin bawk a ni.Gospel hlate hian a rilru a hneh thei em em thin a,a naupan teta Biak in a an sak thinte chu a theihnghilh tawh ngailo.Biak ina Pastor thusawite ngun takin a ngaithla thin a,ngaihnawm a ti thei em em thin.Heng sermon a ngaihthlak thinte hian a nun pawh a kaihruai hle thin in a sawi nghe nghe a ni.A nu sawi danin Elvis hi kum 2 vel lek a nih lai atangin Biak in hi nuam a ti a,zaipawl zai te hi ngaihnawm a ti theiin,a nu hriatloh kar te hian zaipawl ho thutna ah te a lo vak phei leh daih thin a ni awm e.A lo tleirawl chuan zaipawl memberah a awm ve ta reng a ni.Zaipawl a a tel hnu hian Gospel music in a nunah hmun a chang sang leh zual ta hle a,a lo lar hnu a a hla tam tak pawh gospel music atanga ‘inspiration’neia siam a tam hle reng a ni. ‘How Great Thou Art’ tih hla ngat phei chu a hla duh ber leh a roh em em thin a ni.Vawikhat chu he hla hi Las Vegas night club pakhatah a sa a,gambler ho inkhel lai pawh an chawl thup mai a ni awm a sin.

            A private secretary Emily chuan ‘Elvis-a hian sakhaw hrang hrang-Divine Lights Mission,Self Realisation Fellowshipleh Krishna Conciousness te hi a zir nasa a,mahse heng zawng zawng hian a Kristianna a ti nghet zawmah a ni.Amah Elvis pawhin a rinna ti chak zawkin a sawi tlat’ a ti a ni.Elvis-a hian Bible a ngaina hle a,a chang phei chuan car a a zinna ah te leh thlawhna a an zinna ah te a thiante leh zin puite hriatah a chhiar in Pathian thute a sawi pui chiam thin an ti.

            ‘A thih dawn hnaih phei kha chuan Bible a chhiar ngun em em a,Isua chanchin leh a lokal lehna lam thu phei chu a ngaihnawm a ti em em thin’ tiin a pa,Vernon chuan a sawi.Billy Graham pawhin Elvis Presley thih hnu lawk khan ‘Amah Elvis hi ka la hmu lova,ka hmuh ve hma in a boral ta a ni.Amaherawh chu vanramah hmuh ka in beisei tlat a ni.Elvis-a kha Kristian tha tak a ni tih ka hria’ a ti nghe nghe a ni.A hun tawp lama a nula kawp ber Linda Thompson nen chuan Bible an chhiar dun in an sawi dun thin a ni tih Linda chuan a sawi bawk.Linda hi 1972 khan Miss USA Contest a inlan pha ve hial khawp a nalh leh zei a ni a,nitin regular taka Bible chhiar thin a nih avangin Beauty Contest a a tel pui contestant te pawhin an nuihzat hial a ni awm e.Elvis-a nen a an in kawmngeihna pawh hi Bible leh Kristianna chungchanga an inmil em vang niin an sawi ve tlat a ni.

            Thenkhat chuan Elvis-a hi Kristian tha tak a ni theilo vang,a inkhawm ngai bawk silo,te pawh an ti a ni awm e.Ngawi teh u,a ni ang milar chung chuang lutuk tan chuan Biak in a lawi luh chu thil harsa tak a ni ang tih a rinawm,an bawr luai luai reng mai kha a ni si a,a tan inkhawm leh sunday school kai tih ang reng vel kha chu thil theih a ni lo tawp ang.A fanu Lisa pawh hi Kristian sakhua ah a kaihruai thin a,Bible story te pawh a hrilh fo niin Lisa chuan a sawi.Lisa hian a naupan laia a pa leh a thian Charles Hodge ten gospel hla an sitting room a an sak dual dual lai chu a la hre reng thin a ni tih a sawi bawk.

            Elvis-a hian Pathian hla(Gospel hla) album tha tak tak a siam nual a, ‘Peace In The Valley’ album 1957 a a siam phei chu kum 20 chhung tawp album hralh tla pawl a tling a ni.Amah Elvis-a chuan ‘How Great Thou Art’ album hi a duh leh roh ber a ni thung.He album a hla, ‘Crying In The Chapel’hi a mawi in a tha danglam khawp mai,amah a satu hian thinlung zawng zawng in a sa tih a hriat hle bawk.Elvis-a hi Practical Kristian,Lal Isua zirtirna a taka hman tum tlat mi a ni. ‘Miin i chunga an tiha i duh tur ang bawkin mi chungahpawh ti ve rawh’ tihte hi zawm hram hram a tum tlat thin.Mirethei a lainat leh hmangaih zia pawh tlang hriat a ni.A girl friend Linda pawhin  ‘Elvis-a chu thlarau mi,Isua hmangaihtu  leh a thu zawmtu a ni in ka hria,a nupui duh takin a uire san avang khan a rilru a na hle a,a muhil thei ngai lova,a mangangin mut duhna damdawi a ei ta thin a,kha ber kha a chhiat phah ta a ni.An sawi ang em chuan drugs kha a ti nasa lo.Sleeping pill kha a nun tichhe  tu ber chu a ni.Marilyn Monroe te,Judy Garland te pawh sleeping pill vanga chhia an nih kha.Elvis-a hian drugs leh zu a chhiat phah lova,a haw em em zawk a sin’ tiin Elvis-a thlavang a hauh a ni.Hman deuh tawh khan Larry King Live,CNN ah Linda hi interview a ni a,hmanlai a a thusawi ngai tho kha a ni a la din pui tlat ni.

            Englekhawle,mi sawi ang em em chuan Elvis-a hi a lo  ‘khawvel’ lem lo a,Kristian tha tak a lo ni tih chu heng a chanchin sawitu te atang hian a hriat theih a nih hi.A thlanlungah chuan ti hian a pa Vernon Presley chuan a ziak :

            ‘Elvis Aaron Presley,January ni 8,1935-August ni 16,1977.Pathian lak ata kan rohlu chan,

             Kan hmangaih leh kan thlakhlelh ngawih ngawih a ni.Pathianin chawl tawh se a duh a,A hnenah

             A hruai haw ta a ni.Ka tuai duhlai,nang hi  Pathianin kan fapa atan min pek avangin

             Pathian hnenah lawmthu awm rawhse’ tiin.

Tichuan kumin August ni 16,Elvis Presley thih champhaphak vawi 39-na ah pawh khan a fans te,khawvel hmun hrang hrang atanga pung khawm leh in Mombati tam tak chhi in Rock n Roll lalpa thlan Graceland hmunah chuan hunserh te hmangin urhsun takin hun an hmang leh ta a ni.Aizawlah pawh Elvis Presley fan engemaw zat awmin a thih champha a lo thlen hi chuan thawmhnaw dum hlir inbelin an la sun ve fo mai.

            Elvis-a nupui hlui Priscilla leh Immortal Entertainment Group,Los Angeles te tangrual chuan Musical stage show ropui Call It Love Me Tender or Heartbreak Hotel an lo ti chhuak tawh bawk.Heihi Elvis leh Priscilla inchhar dan leh an chanchin a ni deuh ber mai.Priscilla hi Germany a awm American sipai officer fanu a ni a,Elvis-a sipai (G.I) tan lai a intawng an ni.Chutih lai chuan Priscilla chu kum 14 lek a la ni a,Elvis pawh kum 24 chauh ala ni bawk.Tichuan Elvis-a te inpui Graceland,Memphis ah chuan rawn awm ve ta in chuta tang chuan 1963 ah High School a zova,1967 khan kum 21 a lo ni ve ta a,tichuan Las Vegas khawpuiah an innei ta a ni.

            Elvis Presley hi chu a ropui ngiang a ni,zaithiam-hlaphuah thiam Bob Dylan pawh hman kuma thi thelh a a damloh tum khan  ‘Elvis-a hmu thuai dawnin ka in hre hman’ a tia lawm. Rock ‘N’ Roll Lalpa an tih hial Elvis Presley hi an sawi ang em em a khawvel mi leh ruihhlo buaipui chu  a lo ni lem hauh lo mai,chu chu a lanmna tlang dang atanga kan thlir chuan kan hmu a nih hi.

Leave a Reply

Top