You are here
Home > politics > NEW SECRETARIAT COMPLEX KUM 10 TLIN KAN LAWM E

NEW SECRETARIAT COMPLEX KUM 10 TLIN KAN LAWM E

           *Freddie Mercury thih champhaphak vawi 24-na hriat reng nan a ka serial chu ziak tu7r dang pawimawh ka tih tak a awm leh rih avangin ka han pawtchat leh rih a,kan chhunzawm leh thuai dawn nia.

           April ni 30,2005 ah ka hna thar zawm turin Lunglei atangin Aizawl ka phei a,Durtlangah chhungte hrawnin hun engemaw chhung ka khawsa ve ren rawn a.Thian thenkhatte zarah  New Capital Complex-ah[a hnuah New Secretariat Complex(NSC) tih a ni] sorkar quarter thar luah dil theih a ni tih ka hria a.Dilna te siam ve in Type IV Green chu luah min phal sak ve ta a.Kum 2006 March thlaah kan quarter thar chu kan luah ta a.Hetih lai mek hian tuna kan luah tak mek,Type V Block 4/1 quarter hi kan dil leh nghal a,vanneihthlak takin phal sak leh kan ni a, April thla tir,2006 ah kan luah leh ta a ni.Tichuan helai veng kan awmna pawh kum 10 a lo tling dawn ta reng mai.A awm hmasa te hi 2005 March/April vel khan an lo awm tawh a,tichuan New Secretariat Complex chuan kum 10 lo tling ve ta in vengchhung Welfare hruaitute bengvarna in kum 10-na lawm chu relthluk a lo ni ta a,Anniversary Committee lian dinin kumin kum tir lam atang khan Anniversary lawm turin kan in buatsaih chho ta mup mup mai a ni.A lo awm hmasa pawl ni ve ta leh Welfare din tirh atanga eng post post emaw te lo chelh ve ta chu pawimawhna eng eng emaw te min pe ve a,kan buai ve in kan phur chho hle.

            Oct ni 2,2015,holiday kha he hun pui lawm nan a kan han ruat hmasak chu niin kan la in peih chhuah meuh loh avangin Diwali kutpui lai sorkar chawlh November ni 11 khan kan Anniversary chu awmni khamin ruai nen kan lawm ta mup mup mai a ni.Kan veng hmun rem lai ber ‘Residential Chung Sen Tualzawl’ kan tih lai hmun nuam takah hun hi kan hmang a. Anniversary Chairman Pu P.C.Lallianthanga kaih hruaiin zing dar 11 ah Rev.Dr.P.L.Lianzuala,he veng a lo awm ve tawh thin in hun serh hmangin min tan sak a.Khuallian atan a kan sawm Pu H.Darzika MCS(Rtd),tuna State Election Commission a Secretary ni lai mek leh he veng Welfare a Chairman lo ni tawh leh a remhriat zara motor silna servicing tuikhuah tha tak min siamsaktu chuan min hman puiin thu tha tak sawiin min fuih a.Local TV Channel Gospel huang a lenkhawm hla, mawi leh thiam taka sa thin,a taka ka la hmuh ve miah loh leh thiam ka lo tih ruk em em thin,kan veng a lo awm ve reng Pi C.Remsangpuii’n music arrangement mawi danglam tak mai a ‘Kan Pathianin Min Hruai Zel Thin’ tih hla sa a min han awi mai chu hah a dam sawng sawng in awm a ti nuam ngei mai.Pi C.Remsangpuii hi a lo zai thiam kher mai,TV a ka lo ngaihthlak thin aiin a tak ngei a a zai kha a lo thiam a nih kha.Lenkhawm hla a thiam em em rualin tun tuma a sak ang chi hlei hlei kha a nih kha a lo thiam le.New Secretariat Welfare Committee Chairman Pu L.Biakthanga’n kalkhawmte lawmna thu a sawi zawh hnuah kan veng Section YMA(Section 6 Khatla YMA)zaipawlin thiam takin hla in min han awi leh a,kan Section YMA te pawh Section ringawt an ni na chungin Branch YMA thenkhat aia an thiamlohna ka hre manglo.Tichuan he Anniversary hriatrengna Souvenir ‘Kiltheihrawk’ chu kan Khuallian in a released ta a,he Souvenir ah hian thuziak ngaihnawm leh bengvar thlak tak tak bakah thlalak mawi tak tak tarlan a ni bawk a,a duh tan lei tur pawh a la awm e.Gospel star,local channelah pawh kan hmuh fo,kan veng nula Dr.Evelyn Lalremsangi leh zaithiam lar TBC Zaithanpuiate’n duet in hla ruahthamloh ‘NSC Hla’  C.Lalruatliana,Ramhlun South  phuah an han sa mai chu,an thiam dun bawk a,mipui kan ngawi duk mai.Duet bakah hian Dr.Evelyn leh TBC-a te hian hla mawi tak (solo) min sak sak bawk.Tleirawl rual,kan veng chhung a mite leh vengdang a mi in kawp khawm CURATIO ten track hmang loin Guitar nen ngat hla mawi danglam tak an sa a,guitar play-tu hmeichhe tleirawl khan guitar strumming a va tawk mawi em!Mi chhuanawm bikte Citation hlanna hun hman a ni a,Anniversary Asst.Secretary Pu T.Zohmingliana’n hneh zetin a kaihruai a,thusawi leh introduction Anniversary Secretary Pu H.Lalhmingthanga’n a hman hnuah kan veng pa Pu C.Vanlalramsanga,Secretary UD&PA etc. hnen atangin kan hriattur thu pawimawh tak leh bengvarthlak tak kan ngaithla bawk.Local TV Channel lama lar chho mek leh Charts thleng sang thei tak Priscilla L.Fanai in stage a rawn luah a,tunlai hla lar mek leh hmanlai hla deuhte in mipui min han chheu a,kan tlangval leh  pavalai ho an awm hle hle thei tawh lo,stage lamtual zawlah boruak an rawn siam tan,a nuam chho tan hle.Priscilla hi kan veng nula a ni na in hmaichhanah ka la hmu tam lo a,MZI in Ignite Studio a khawchhak tuilian tuarte pual a hun kan hman tum khan a rawn zai a,chu chu ka hmuh vawi 1-na niin tun hi chiang taka amah ka hmuh leh a zai ka ngaihthlak chu a ni.Priscilla hi lar tlakin a lo zaithiamin a lo zei a nih hi.Kan veng MHIP(Section 6 MHIP) te wrestling a hmuhnawm e,vengdang hian hmu ve se ka va ti em aw!!Bawn tak a ni tih hian a hrilhfiah mai awm e.Kan veng tlangval ho, ‘UGS Dance Troupe’ te lam mawlh mai kha a hmuhnawm a sin,an lamna hmun a rualrem lo em mai pawh a,kan veng chhung mai nilo,a aia zau zawka phochhuah tlak an ni e,an thiam a ni tawp mai. ‘Inchung Sen Paho’ti a in phuah  ‘Trio’F.Vanlalhriatrenga telna ten thiam leh lunglen thlak em em a ‘Lenrual Hlui’ an sa chuan kei changlo mi dang lung pawh a ti leng.Kan veng rawn inti neitu tak ka nau F.Vanlalhriatrenga hian hla pakhat min sak sak bawk,a ti lawmawm hle.                                                                                                                         Tichuan,i ti tawh mai ang,tlai dar 4 ah kan veng chhung mite bakah kan venga lo awm tawh,retirement leh thildang vanga pem tawh kan sawm te nen mi 1000 chuangin Anniversary ruai ropui takin kan theh a,kan tlaiin kan puar hle,lung erawh a leng lawk.Eng anniversary nge kan hman leh ang,eng tikah nge ni ang,tam tak chu kan retire tawh ang a,khawvel te pawh kan chhuahsan hlawm tawh hial mai thei si a.Zan lama chhunzawm chakawm hle mnahse kohhran inkhawm zan te a lo ni bawk a,ui takin kan Anniversary lawm chu kan ti tawp ta rih a ni.Thil chhinchhiah tlak tak chu he vengah hian Zoram khaw hrang hrang,mi chi hrang hrang kan khawsa ho a,hnamdangte nen pawh lungrual takin kan cheng ho a ni.Kan Anniversary  ruai fatu Leader pawh Pu Shersing Thapa a ni ngat mai.Tin,zurui han talbuai deuh pakhat mah an awmlo bawk kha a chhinchhiah tlak hle bawk.

             THU BELH :He venga kan awm tirh hi chuan mi tumah in an bengkhawn lemlo a,ramhnuai ang mai kha a la ni a,lirthei neilo tan phei chuan Khatla Bazar,kilometer 1 aia hla deuh hlek pawh hi ke a kal nan chuan huphurhawm a tling a,tunlai angin taxi han lak mai tur lah a awm bawk silo nen,miin an bawh teh chiam lo. Heng hun lai hi chuan kan veng hi chhunah a reh viau a,zan lamah erawh chuan kan lun thei hle thung.Welfare hruaituten duty tur ruat in pa leh tlangval ho zantin deuhthaw duty in kan thawk chhuak thin a,zan dar 12 pel a duty chang pawh a tam hle thin.Zu leh ruihhlo rawn khawih te leh mipat hmeichhiat rawn hmangte hi duty ten kan buaipui ber chu an ni a,mi tlawmngaiten mahni lirthei thawh chhuah puiin kan vak kual thin a,beisei loh tak tak hmuh leh man chang kan nei fo mai.Sawi thui lo mai ang.

          Kan vengah hian nungcha an zalen hle, sava chi hrang hrang an zalen in an hram kan hriat phak tawh ngailoh,vabak thirchher hram chenin zan reiah phei chuan ngaihthlak tur a awm.Kan chuktuah huanah hian kan eibang nawi tlan vathu leh sava dangte an ngampa em em a,kan phuihnam rahte chu tlaiberh leh rei tak ka hmuh tawh ngailoh tukhumvilik leh dartle ten an lo tlan a,tuklo leh Lalruanga Sehnawt thlengin hmuh tur an awm.He article ka ziah lai mek pawh hian kan chuktuah huan leh a chhehvelah chuan sava hlim chiar thawm hriat tur a tam hle.Hman deuh tawh khan zan ruah sur chep chep hnuaiah kan nupa in kan ‘walk’ a, sazaw note hruai thlamuang taka kawng kan kan hmu a,mi hlau awm pawhin an awm hranlo a ni.Khawlaia ramar tla te pawh hmuh tur awm chang a awm bawk.Thawkkhat lai khan kan vengchhung a naupang thenkhat leh thenawm veng a patling thenkhatin kan vengchhung sava kah leh perh an ching a,hei pawh hi a vengchhung a mi tam zawk ten kan humhalh tha a ni tih an hriat hnu chuan tih luih zel chiah an ngai ta lo a niang,an reh ta.Kan veng mi thenkhatte silai aia camera a heng nugchate ‘shooting’ thin,thiam tak tak an awm a,Facebook leh chanchinbuah te an phochhuak thin a,a hmuh a nuam hle thin.Kiltheihrawk sava te pawh he vengah hian an tlangnel hle a,kan Anniversary Souvenir hmingah hial pawh kan hmang a nih hi.

 

Leave a Reply

Top