You are here
Home > music > ZAIPAWL SAPRAM FAN TI TI KHAWCHANG THENKHAT

ZAIPAWL SAPRAM FAN TI TI KHAWCHANG THENKHAT

Keini ho member 20,hmeichhia 8 leh mipa 12,Leader 2 leh Conductor 2 te tel vekin  khawvel pian tirh ata Mizoram Baptist Choir hmasa ber kan ni ve ngat a ni,a tir a kan hming tak phei chu ‘Mizoram Baptist Assembly Choir’ tih ni in ka hria.Kum 1 vel zen zawn uluk taka in buatsaihna hun kan neih hnuah min hringtu Kohhran UK a mi te tlawh turin BCM chuan min tir ve ta a,kan vannei hle a ni.Ireland tih loh chu British thliarkar a ram hrang hrang-England,Wales leh Scotland te zaia rawngbawlna neiin kan fang a,thla khat zet kan thang a ni. Kan zaipawl member Pu H.Lalzarliana Principal-na DIET Lunglei Magazine Editor in an Annual Magazine atan article ziak ve tura min ngenna angin kan zin atanga a Silver Jubilee na daihah hian he kan zin thu nawi hi kim chang lo takin ka han  tlaikhawhnu ziah ve a ni e.

Sapram kan kal hma khan saptawng lam dan leh an thil chin thin kan hriat tur pawimawh kan zir nasa ve khawp mai.Saptawng lam danah hi chuan an hriat theih a lam kha a tha ber mai a,lam sap leh lam nalh lam a nilo.Saptawng hi kan lo zah lutuk em ni aw ka ti fo.Anni chuan kan sawi duh an hriat theih chuan an lungawi mai,kan lakah saptawng mawi tak an beisei hran lo,hriat theih se an duh ber.Oxford Street market hmingthang a kan shopping tumin vai dawrkai ni awm tak ka hmu a,ka zu pan a.Shri Lankan a lo ni a,kum 5 Londonah awm tawhin helai hmun lun ah hian dawr a lo nghak ve a,saptawng lah chu kei ai pawh chusan a lo harsat a,mahse khati khan Sap ho tlimpui zingah ei a zawng ve tho mai.

Suit hak chuan smart shoe bun ngei tur,kawr banbulah chuan necktie an suih ngailo tihte chu keini ho thlen chinah kha chuan tih mai mai a lo ni,dress ah an buai vaklo,kawrchung kan tih ai hian jacket kan tih ang hi an ha uar mah zawk.Hemi sawi takah chuan coat kan tih hi an ni chuan jacket an ti a,an coat tih chu coat fual Parandi coat kan tih ang chi ho kha a ni ber zawk.Ka thlenin pa pakhat chu Sunday zing kan inkhawm naah suit a ha a,chappal a bun mai,mak kan ti deuh,mahse anni chuan eng vakah an ngailo.Saptawnga kan tawng thei te kha mak an ti a,heti khawp a khawvel a saptawng a lar zia hrelo hi an lo tam mai.Ka thlenin nu pakhat chuan, ‘In vannei em mai,in tawng pangai bakah saptawngin in la tawng thei a,kei chu saptawng bak thiam ka nei lo,’ tiin min la awt ve khanglang a ni.Ka thlenin pa pawhin ‘In lo kal hma hian saptawng engtia rei nge in zir?’ min ti a,saptawng thiam turah min ngailo hrim hrim.Kan zin hma hian Zaire Baptist Choir ten UK hi an lo fang tawh a,an lo mikhual hlawm tawh a,member pawh keini aiin an tam daih awm e,an zingah khan mi pahnih chiahin saptawng an thiam a ni awm a,khatiang turah khan min ngai a ni ber.An rinai a kan lo biak theih kha mak an ti a,thlen in pa phei chu kan ram lama saptawng kan ngaihsan dan leh primary school atanga kan zir thu ka hrilh chuan,a meng phar nasa mai, ‘Chu saptawng chu chutiang chuan a lo lar a ni maw?’ a ti hial a ni.

Ka thleni nu pakhat chuan kan inkhawm taihmak zia leh kan inkhawm kalphungte,Mizoram kohhran chanchinte ka hrilh chuan UK Kristiante chu Pathian ngaihsak lamah an tlahniam em em a,weekend phei chuan nawmsip bawlna lamah an tam zawk a,Pathianni a inkhawm tur thalai pawh kan nei tawh manglo,’ a ti hial a.Ka ngaihtuah a ti thui viau mai.Keini ho hi an ni angin nuam tawlna tur Beach te leh concert te inkhelte hi weekend ah en tur leh kalna tur nei ve ngat ila,anni ai hian kan that bik hi ka ring manglo nia.Han intihhlimana kan neih loh luatah Pathian thu ka la awih mai em ni aw tiin ka ngaihtuah fo mai.Pathianni tlaiah te hian inkhel hmuhnawm buatsaih ve ta fo se,zan inkhawm ai chuan inkhel en kan tam daih mah na.Ngaihtuah chian a ngai viau a ni.

Bristol a ka thlenin te ni ta in ka hria,an fapa hmeltha leh hleitling tak mai khan University a a bialnu,mihang elkhen mai kha an inah Pathianni chawhnu hian a rawn hruai a,kan awm lai kha a ni a,sap nu leh pa meuh pawh khan an fapa bialnu chu an lawm vaklo in an duh pui hmelloh khawp mai.

Reading ah khan kan cham deuh a,kan thlenna Biakin bul kha Bus nghahna a ni a,nghak an awm ve tiai thin a,sap nula hmeltha leh no zet mai kha mihang tlangval,lian tak hmel pawh thalo khan duhthawh taki a kiss mawlh mawlh reng mai a,engahmah an ngai silo a,kha sap nula kha kan ui hlawm kher mai.

Kan thlen tirh in zan inkhawm chu dar 8 ah a ni ang an ti mai a,a va tlai dawn ve kan ti a.Zan dar 8 chuan ni a lo la tla lo tawp mai a,nipui lai a kan tlai dar 5:30 ang vel lek kha a lo la ni. Scotland phei chu North Pole a lo hnai tawh a,zan dar 10 ah pawh kan kal lai April thla te kha chuan khua a la eng a,zingah khua a var hma tho si a,a thim chhung a reilo khawp mai. Baptist Choir kan in ti na a,an ni chuan ‘Mizoram Choir’ tiin thu an lo than daih mai.

Ka pen friend Malcolm-a nen London-ah kan in hmu a,a thianpa a rawn hruai a,kan han in be vel kha,a thianpa khan ‘Malcolm-a saptawng kha i hrethiam thei maw?’ a rawn ti.Keiin ‘Hre thei e,ngati nge?’ ka tih chuan  ‘Scotland ramri a awm an nia,’ nui chungin a ti chu Malcolm-a pawh a nui nasa ve hle.Scot ho English khu hriat a har hle tak mai a,fiamthu in English pachal pawh Scotland ramri a awm chuan an tawng dan an la a,an tawng hriat a har vek an ti hi a lo ni a.

London nge khawi khua ber nge ka hre thei ta mai lo,bus chhawng chungah putar pakhat zu ruiin nula ho a um darh ve ar ar mai.Southampton kawtthler ah sap tlangval thenkhat zuruiin ‘Ramdang mi ho lah hi’ tiin min melh rum a,an tawng chhe tak takin min ankhum bawk.London Bridge ah ka lo hawi nasa deuh a niang,sap pa lianpui ke ka rap palh a,a thinrim in min ankhum nasa hle bawk.Hrethiam angin ka awm duh tlat lova,a ang lungawi ve mai.

Kan coach(bus) driver John-a’n London min fan pui a,guide kan hruai a,hmun nuam tak tak,park hmun lo ni thin ah te chuan in ropui tak tak a lo ding khawn uaih hlawm a,kan guide chuan  ‘Arab mi hausa ho in kan ram hmun tha an lei zel a,a ram neitu kan chep tial tial a ni’ lungawilo takin  a ti ve hial.

Chhungkaw member tin khan member kimin car an nei deuh vek mai.Car manto tak chu an nei lemlo,a tlangpuiin two-door car a ni deuh fur a,a hnung a thut dawn chuan Gypsy motor ang hian a hma seat nam tawlh a ngai.A chhan chu a hnungah mihring an phur ngai meuhlo a,ui an vulh deuh vek avangin ui phurh nan an hmang ber,Keini ho kha chutiang Car ah chuan min phur thin a,a hnung chan fuh chuan ui hmul kan kai nasa thei hle.Min mikhual dawn chuan ‘Ui i ngaina em?’ an ti deuh zel a, ‘Ngaina lo’ tih chuan an lo thlung diam thin.Kan thiannu pakhat pawhin ngaina lem silo khan in ti polite in ‘Ngaina e’ a ti ngawt mai a,a thlenin tur an thlen chuan an ui chuan a lo bawh tak tak ta mai a,a mangang leh si a,a buaithlak hle awm e.An zingah thu khuh ve chi a ni lo.Car a tam hle a,a tlawm chi ke 3 nei,han en mai chuan car pangai ni awm tak tho pawh hi hmang an tam mai.Secondhand car zawrhna ah kan kal a,Pound 400-500 man te a awm fur a,tlawm tih tawh nak alaiin Pound 100 man pakhat hi kan hmu tlat mai a,a tlawm kher mai.

UK kan kal dawn hian BMS hotute chuan min thleng tu tur chhungkua an ruat vek a,chung min thlengtu tur te hnenah chuan pawisa fai/pocket money leh thilpek dang min pe lo turin an chah vek a ni awm e.Chuti chung chuan min khawngaih em em tu min lo mikhualtute zingah an lo awm ve a,kan inthen dawn a min  ‘Chuks’ a minchibai pahin envelope chhungah Pound 5/Pound 10 an thun chu min rawlruk zauh thin a ni.Rice ei thin ram atanga kal kan ni tih an lo hriat ve avang khan lo chhum a lo siam ve teh hi an lo tum ve thin a,an thiam silo a,an rice chhum rum tak mai kha fork a ei turin min chhawp thin bawk si a,kan huphurh zawk thin.An rice siam ve ei ai chuan tui ti takin an ei ang kha kan ei thei tho a,kan thlahlel zawk mah.

Anni chu khang hun lai pawh khan an changkang tawh a,an kawngkapui te pawh kha card rawlh luh a,hawn tur a ni hlawm deuh vek a.Kha card kenglo khan pawn chhuak ila,kawngkapui kha nam khar ta ila,kan lut thei tawhlo a ni mai.Pawn a chhuah pawhin card ken zel kha a ngai a nih chu.Chu chu an in min nghah tir ve tum chuan kan hriat reng a ngai a ni.An light ‘on’ dan kha button hmeh lam kha a ni lo a,pawh en a pawh thim chi kha a ni a,khang hun lai khan kan la hre ve ngai silo a,a tir lam chuan kan buaiin culture shock an tih hi kan nei nasa hle.

Hun an vawn dik zia kha a mak zawk. ‘Naktuk zing dar 8:27 ah ka rawn lam ang che’ min tih chuan a tuk zing dar 8:27 chuan kan thlenna kawtah car a lo ding chat tawh thin.Hna an thawh nasat avangin an mikhualte pawh min chhuahsan daih fo a,kan kutah an in leh engkim an dah mai a,thingpui kan insiam a,breakfast pawh an lo chhawp diam kha kan insiam mai a.Chaw ei ho hi Sunday chhun lunch bak an nei meuh lo a ni e.Zingah breakfast hmanhmawh takin an ei a,an hnathawhnaah an kal a,chhun chawlhah take-away food an lei a,chanchinbu chhiar pahin park-ah emaw hmun remchangah an ei a,chumi hnuah an thawk leh mawlh mawlh a ni ber mai a.Zanriah hi chhungkua a an ei ho ve deuh chu a ni mai awm e.Zanriah hi ei tam zan leh ei tlem zan an nei a, ‘Rabbit Food’ an tih mai  ei zan an tih ah phei chuan thlai hel leh carrot chhum hmin leh thil tui lemlo tak tak in an sam lam ve mai mai a ni.Chutiang zan kan thlen in-a kan tawn zan chuan kan phurlo thei khawp mai.A thu hrim in sa an ei nasa hle.Keini chuan chaw kan ei a,sa kan hmeh a,an ni chuan sa an ei a,chaw an hmeh zawk ni berin ka hria.Birmingham a Pu F.Aizama nen kan thlenna te chu West Indies lam mi an ni a,zan dar 10 velah market-ah Kentucky Fried Chicken(KFC) min va lei sak ngat a,tui kan ti kher mai.Hemi te hnenah  hian zan 2 kan riak a,an nu nurse a ni a,zan lamah a thawk a,an pa chhunah thawkin zan rei deuhah a lo haw a,an nupa pawh holiday ah lo chuan an inhmu ngai meuh lo a ni ber e.An nula,London a University kal room ah min muttir a,mihang rim kan tih ang hi a nam nasa hle a,a tir chuan tuar a har fu mai.

Mikhual chunga an that dan hi a ropui hle a ni.Ka thlenna pakhatah chuan room nuam deuhah min muttir a,zingah hma deuhin ka tho pek a,sitting room a ka han lut chu an nupa in sitting room ah an lo mu a,an nupa khum min lo kian chu lo ni in,a zahthlak chem chem hle mai.Hetiang deuh bawk hian kan Conductor Pu C.Hrangdula nen Scotland khaw pakhat a kan thlennaah an nula in a room min kian a,zing a kan va thawh chuan an nula chu an dining table ah a lo mu a ni tih kan va hre ta mai a,kan zak ru viau bawk.Keini ho hian kan aia hnam hnufual leh zual zawk zaipawl memberte hi lo mikhualin kan nupa khum/kan room kan kian ve thei ang em aw?

Khaw 30 chuang leh kohhran 27 vel kan tlawh a,Kristian mei zu kan hmu lo,mak tak maiin Pastor pakhat,Shri Lankan mi erawh chuan a zu ve tlat mai.Kan tawng ran ve deuh chuan kan English an hre thei vaklo,muang deuh a tawng kha an hre thei zawk.Tin,a thluk-accent an ngai pawimawh hle bawk.Rev Raltawnga hi sapram a lo zu zir tawh a nih avangin a tawng hriat a nuam an ti a,tawng pawng English tawng nal ringawt chu an hre thei manglo.Kan Zosap Pi Zomawii kha Hollywood film a en ve ngai em tih ka zawt pek a, “En ngailo,American English ka hre theilo,VOA(radio-Voice of America) pawh ka ngaithla ngailo,” a ti.A hriat thiamloh tak tak phei chu ka ringlo a,American ho a eiloh zia a tih lan na a ni ve mai awm e.English ho tam tak khuan American ho hian kan tawng an ti chhe vek an ti ve tlat.

‘Ka Zalen Ta’ tih hla Negro spiritual deuh mai kha kan sa thin a,kan hotute zing a pakhatin Mizo hla reng emaw tiin saptawngin a lo let ve leh a,kan va nui nasa thin em!Kan conductor pahnihte kha an thiamin an chhuanawm tak meuh a ni,an lung kha a leng ve ve tho na in a leng zual deuh zawk kha an awm a!Sapramah a lungleng zual deuh ho kha chu an/kan nui tlem viau.

Torquay a ka thlen in naupang Mark-a,kum 7 mi vel chuan min ngaina hle a,TV atangin hemi zan hian Phil Collins-a’n Wembley Stadium London ah concert a nei dawn tih ka hriat chuan Phil Collins concert ka chhim ve chak thu ka sawi a,Mark-a pek chuan ‘Phil Collins i hre ve a law?’ tiin mak ti takin min zawt a.Ka ngaihsan thu leh a cassette te pawh ka ngaithla fo tih ka hrilh chaun a pa a au a, ‘Ka pa,rama hian Phil Collins a hria nia,’ mak ti deuhin a va hrilh leh hram a lawm.Min rin mawl aiin thil kan lo hre ve fe si ni tur a ni.

Cardiff a kan thlen in Pu Glyn Evans-a’n a landline phone in Zoram a kan chhungte min ring sak a,min biak tir kha a man a va to dawn em tih ka ngaihtuah fo.Khalai khan Lunglei khawpuiah pawh phione nei an la tamlo hle.

Group in Hindi hla kan sa thin a,thiam min ti ve viau thin.Inkhawm banah India rama lo awm tawh leh Missionary lo ni tawh ten min lo nghak a,Hindi in min lo be ngei thin a,kan mualpho zeuh zeuh a ni,Hindi kan lo thiam leh mang thin silo a.

Kan hla sak uar ber te zing a pakhat ‘Min Tir Ta Che’ tih Mizo hla Rev Dr C.L.Hminga’n ‘The Great Commission’ ti a saptawng a a lehlin chu kan sa zingin ‘theme song’ ah kan neih a ni ber.Sapho pawhin tha an ti ve ngiang mai.Khatih lai khan kan la naupang tlang hlawm bawk a,fiamthu kan duhin kan nui peih hle hlawm a.Fiamthu in group ah kan in siam a, ‘We Who Group,The Poor Group leh The Naked Group’ te.Kan hlim pui nasa hle thin.Tun hnu, WhatsApp age ah pawh ‘We Who Group’ kan thianten an lo siam a,kan sapram zin hun lai te sawiin kan la insawisa nasa hle thin.

Zaipawl hla bakah lenkhawm hla kan sa bawk a,Chawngkhupa hla ‘Aw Khawngaihtu Pathianin’ tih kha khuang nen kan sa thin a,an ngaihsan hmel thin khawp mai.1988 harhna khan min la tuam hlawm bawk a,kan member thenkhat an lo tul ta thin a,sapho mak tih a hlawh a,a then phei chuan doctor rawn se ti ten an lo sawi hmuh hial,an hrethiam lo ve khawp mai.

An thilphal em em mai a,thil pek hi min chak em em ni maiin ka hria.Kan hotuten thiul dil miahlo turin min hrilh thlap a,kan zawm tha hle in ka hria.Fa kan neih leh neih loh min zawt fo a,kan neih thu kan hrilh chuan eng rual nge tih min zawt a,naupang an nih chuan naupang lawm toys,T-shirt leh a dangte min pe mawlh mawlh mai.In sawi khawngaihthlak in thil dil ila,sum leh pai nen lam mi pe duh awm e.Kan nihna leh kan sorkar hnathawhte kan sawi erawh chuan a then chuan an aia chungah te min dah ti tih emaw ni,thil pek tum lam chu a lang miah lo thung.

Sawi tur a tam khawp mai,an toilet, bathroom thianghlim zia,fai zia rimtui zia te kha,kan sitting room ai pawhin a rimtui zawmah awm e.Pu Zara’n souvenir a Bradford lungte a lak te,Nelson-a chuanna lawng hlui them a lak te kha a hlu ta hle.Pu F.Aizama souvenir hnutchhiah te leh Mamawii’n a thlenin pitar a barakhaih te kha han sawi zui zel a chakawm hle na a,sawi lo mai ang.Kan chet chhiatna tam tak chu thup tawh rih mai ila,Biakin pakhata testimony a sawinaah Pu Roliana Ralte-i’n khatih laia an Prime Minister ngaihsan em em,Iron Lady an tih hial Margaret Thatcher-i ‘In Iron lady pawh hi Isua Krista lakah chuan Iron Lady a ni lo..’ ti lam hawi a a sawi zet erawh chu an meng phar awn awn mai,an ngaihdan a ni vaklo a niang.

London bul Chelmsford a Pathian ni (ni 20.5.1990) a Pu R.Lalneihthanga nen  chhun chaw ei a min mikhualtute kha Williams chhungkua an ni a,nu ber leh a fate chu Kristian ni vek in an pa ber Pu Williams-a kha erawh chu khatih lai kha chuan ama sawi danin Kristian a la ni ve lo.Anni ho hi chu Kristian ka ni an tih chuan Ka piangthar tawh tih nen a in tluk awm e.An sitting roomah khan Birthday greetings, poster leh card a lo in tar chuai mai a,nu ber chu a chhan ka zawt a: ‘Nimin Inrinni kha kan fanu birthday a ni a a thiante leh chhung khat laina te nen kan lawm a,a kum 18 tlinna a ni a,puitling a ni ve tawh a,vawiin atang hian a boyfriend nen London-ah flat an luah hrang ve tawh,’ a ti mai a.Kum 18 tlinna birthday an lo lawm uar bik thin a,hemi ni atang hian puitling,mahni a khawsa ve thei tawh a an ngaih vang a ni.Keini tan chuan hriatthiam a har hle mai.Kum 18 an tlin tawh hi chuan, Kristian te zingah pawh, nu leh pa te pawhin an mawhphurhna kiang ta ah ngaiin an fapa fanute chu an thak thak a an phal an phal ta mai em ni dawn le, tih kha ka zawt ngam chiah bawk si lo a,an zalenna an hman tir dan a mak viau mai.

Northampton a ka thlen in pa Richard Rayment chuan 1985 ah Kristian a ni (a piangthar)tih min hrilh a, Cliff Richard ngaisangtu a ni a,a cassette/CD pawh thingrem khat a nei a ni.Cliff Richard gospel hla sak atanga piangthar a ni bawk.A mi ngaihsan Cliff Richard hi London a awm a ni a,a ni Richard Rayment hi nitin rel a London a office kai a ni a,mahse a ‘Live’ in Cliff Richard hi a la hmu thei bik miahlo tih min hrilh.                                   Kan sawi tawh ang khan sap ho hian ei leh in an duh viau mai a,thil thlum cake/pastry an ei nasa a,cold drinks an in nasa hle bawk.Chhungkaw chaw ei tlan hun an nei tlem hle a,an phe dawr dawr mai a,ke a an kal leh an kal hlawk hlawk a,motor lah a tar a zur pawhin an khalh chak em em vek mai,an kawng leh traffic a tha bawk a.Sunday chhun lunch erawh chu an la thutak hle a,an ei tui bawk.Sunday lunch han sawi takah chuan hetiang huna  an in ziah an white wine kha in tam chuan a lo ruih theih deuh tho a niang,kan thian thenkhat zing a tawng ring ta lung lung(palh) pawh an awm mai thei !!

Reading khua a Pu C.Lalbiakthanga nen kan thlen in nu Miss Jean Sawyer kha ni 2 zet kan hrawn a.A chuktuah huan,Greenhouse ah min hruai a,pangpar leh a thlai chin te min kawh hmuh a,tomato tlem a lo rah a,a han lawm zia mai kha.An ram kha changkang hle mahse eng thlai mah hi an ti tiak ve hlei theilo a,antam ang deuh ran ei chi erawh chu a tam hle thung.Tomato te,apple te  balhla te chu ram dang atanga an lak luh deuh vek a ni mai a,an balhla,serthlum  leh apple ah te chuan sticker te takte in bel vekin ‘Haifa’ tih hi a chuang deuh vek mai.Israel Haifa atanga an lakluh ni ngei tur a ni.Chutiang a nih avang chuan an theirah chhawp chhuah han ei mai chu a inthlahrunawm duh khawp mai.Keini ram kan vanneih zia hi kan ngaihtuah ngai em aw?Kan thei ei mu te chu kan paih a,a lo tiak mai a,reilo teah a rah mai bawk a,Zoram leilungah hian eng thlai pawh a tha duh em em vek bawk a,greenhouse reng reng a ngai velo a nih hi.Kan ngaihsan sapho chu heti lam kawngah chuan an awhawm lo viau a nia.

Calcutta kan thlen ni 26.5.1990 zan kan mu chu a tuk ni 27.5.1990 Pathian ni zing dar 2, IST ah kan harh ta fur mai a,GMT atanga IST kan hmang ta thut kha kan taksa in a lo la hrethiam lo a,kan mutui lai kan harh fur mai a lo ni.

England a ka thil chhinchhiah hmasak ber chu khatiang a motor tam em em ah khan motor ‘horn’ thawm ka hre mang miah lo leh a khawlai fai em em mai kha a ni.Pheikhawk bun chungin khumah an lawn mai zel a,a bal miahlo.Calcutta ah khan Shoeshine ho kan pheikhawk kan nawh fai tir a,UK a kan cham chhungin ka pheikhawk hruk a ngai tawh miah lo.Heathrow Airport kha a lian in a ropui a,a fai em em bawk a.A fai chu thudang ni se a phiat faitu sweeper te mawlh kha uniform nalh tak kekawr dum leh kawrchung sen nen necktie nen an in duang thlap mai nia.Calcutta Dum Dum International Airport a kan lo tum leh a sweeper ho nen chuan an in anglo nasa kher mai.

Tunah chuan kan zinga mi pahnih,Pu Roliana Ralte,bass satu leh kan soloist ni bawk leh kan conductor pakhat zawk Upa P.Lalringa’n in min boral san tawh a,a lunglen thlak ta hle mai.Khatih lai khan kan hmeichhiate kha nula vek an ni hlawm a,tunah chuan puak leh kaih an fawmkem vek  ta,nikhua a lo rei ta a ni.Min hruaitute zing a pakhat Pu S.K Miller pawh tunah chuan Rev.S.K.Miller a ni tawh a,Rev.Raltawnga pawh Rev. Dr .Raltawnga a lo ni ta.Min hruaitu Pastor pahnih te Rev.Dr.Raltawnga leh Rev.T.C.Laltlawmlova te hi an retired ve ve tawh a,hemi ka ziak lai hian Pathian rawngbawl hna na la thawk reng a ni.Kum a lo vei ve nual tawh a,tunlai thiamna hmang tangkaiin WhatsApp group dinin kan la in be pawh thei hlawm a,a zia viau e.

 

Leave a Reply

Top