You are here
Home > politics > KRISMAS THUNAWI

KRISMAS THUNAWI

             Kan la ti dawn chauh emaw tih laiin hriat loh karin hun a lo liam duak duak a, Krismas chu kar hnih khat  lekin min lo dang leh ta reng mai ! Naupang kan nih ve lai hun te kha chuan Krismas te hi kan nghakhlel em em thin kha a ni ngai a,chuvang chuan a lo thleng har te pawh a ni mahna. Khang hun laia Krismas kan nghahhlelh em em na chhan ber chu kawrthar neih, Krismas ruai theh leh zaikhawm kha a ni ber mai. A hnam pum khan kan la rethei bawk a,kawrthar te kha naupang phei chuan Krismas dawn a kan neih kha a ni mai a, sa lah chu Krismas ruai a kan ei kha kan sa ei chu a ni tlangpui leh deuh mai a.Vawk talh nikhuaah vawksa kan ei a, chu pawh a vulhtu/talhtu pawhin mahni chhungkua in a pumbilh theih loh a,thenawm khawvengte nen kan tlan a ni ber a.Thenawm hnai a ramvachal deuh an awm chuan an sa kah min hleh ve zeuh changin sa kan ei leh a ni mai a. Sa ei hrim hrim kha a khat em mai a, hei vang ringawt pawh hian Krismas ruaitheh hun chu nghahhlelh loh theih a ni lo a lawm.

            Krismas hi loneimite awllen hun a lo ni tawh a, khawdang ramdang a lehkhazir leh sorkar hnathawkte lo haw khawm hun a ni bawk a, khawtlang a zalen a, rilru pawh a thawveng a,khawtlang kha a nuam em em mai thin a ni.Tunah chuan thingtlang khuaah meuh pawh kha Krismas ‘spirit’ kha hmuh tur a vang  ta! Keini ho kha Zoram Krismas nawm vanglai nang pha chin ‘Last batch’ chu kan ni ta mai awm mang e, kan fate ho hi chu tunlai Mizoram khawvel Krismas hre pha chin  ‘generation’ an ni ta in a lang, keini ho, fifties leh early sixties a piang ho kha Zoram khawvel Krismas nawm vanglai hre pha chin chu kan ni ta mai in ka hria. Krismas chhang den leh chhum te,ruai theh hma deuh a nula tlangvalin in tin a chaw an han khawn a, ruaithehna hmun tur a zem lian pui a an han chhung khu vut vut mai thin te kha a Krismas em em hian keini ho kha chuan kan hre tlat nia. Ruaitheh a zawng a hrisel lo ber chi changel hnah phah a hlui buatsaih a chaw leh sa kan han in zen tawm luih luih mai thin te, hmun awih deuh a,a thlanglam pang chan palh phei chuan thiante sa tui chawm thli lo luang zawng zawng kan lam a a rawn luang thla nguah nguah mai thin leh ten miah lo a kan lo bar fai vek zel mai thinte kha a hrisel lo hle tih hre mahila, a Krismas tlat lawi si! Urlawk zan,Krismas zan kan tih ber mai te khan zaikhawm hi tlaivar ngei tura ngaih a ni a, naupangho pawh zaikhawm ve chiahlo mahila, zaikhawmna kawtah meilum ai in kan lo pawngsen tlaivar ve hrim hrim zel a, kha kha a Krismas na chu a ni leh bawk. Khatih lai hun kha chuan nula tlangvalte pawh an zaikhawm a, interek tih lam kha a la lar lutuk lo bawk a, zaikhawmnaah tuitak a Krismas hla sa in mitthlaah Bethlehem dai an fang a. Tunah erawh mitthla nilo in a takin khawpui dai kan fang tawh thung hlawm a!!

         Krismas kha kan nghakhlel ngawih ngawih a, a liam leh mai tur te kha kan ui ngawih ngawih a,a zawh chuan ni 365 zet nghah leh a ngai dawn tih kha kan hre chiang ve em em a, chu pawh dam rei nghah thil a la ni leh nghal. Zaithiam leh hlaphuahthiam fam ta Roliana Ralte  chuan a Krismas hla phuah lar em em,amah ngeiin a sak lar ‘A Lo Her Chhuak Leh Dawn Ta’ tih ah chuan lungrun em em in ‘Hmanah chuan lenrual duhte nen, fakhla saa tlaikhua varin,hlimni ral tur ui em em in, Lal lo piang hlimte’n kan lawm,’ tiin khang hun lai Krismas hlut zia leh thlakhlelhawm zia a tarlang chiang khawp mai.Nia, he hun lawmawm hi ui leh am em em in kan hmang a,ui em em mahila, kan chelh din rual lah ni silo, tichuan kan hmang dawn chauh emaw kan tih laiin a liam leh ta vuah vuah mai thin si a, a lo thlen leh hun chu damrei nghah thil a lo ni leh ta mai si. The Shadows ho hla lar zet ‘Mary Anne’ hla thu min ti hre chhuak : ‘How slow the moments go, but how fast they fly, the next time I see Mary Anne’ tih hi. A bialnu Mary Anne a hmuh chak em em kha a han hmu ta cheng a, hun kha kal chak a ti leh ta lutuk si a, hetiang chiah hian Krismas pawh hi kan nghakhlel em em a, mahse a lo thleng a, a liam chawpchilh a ni leh mai thin si a! Kumin Krismas pawh hi kan dam chuan tun atanga ni reilo teah a lo thleng dawn, a lo thleng anga a liam leh nghal mai dawn bawk. A va han uihawm lawk em ! Chuvangin Krismas hi a ni tak ai chuan he article in chhiar lai vel hi a nawm lai ber chu a ni zawk, chu chu hre rengin ren leh thiam takin kumin Krismas chu nausen chibai buk nan hlim takin i hmang ang u aw.

            Mizo Kristiante hi chu kan vannei e. Krismas hi Biakinah Pathian fak nan kohhran ten kan hmang a, hlim takin sapho Krismas hla leh kan Zo hlaphuahthiam te Krismas hla, thlarau ataanga an phuah chhuah ngei chu sa in kan thlarau nun kan chawm a, kan nihlawh a ni. Sapho te hi chuan Krismas hi sumdawn nan an hmang a, festival chikhat ang lekin an hmang tawh hi a ni ber a. An Krismas hla thenkhatte lah hi ‘Ka Krismas card kha i lo hmu em?’ tih te, ‘Nikum Krismas khan ka hmangaih che i ti a, a tuk lawkah thenna thu min hlan leh si,’ tih te, ‘I tello chuan Krismas khawhar ka hmang a nih hi,’ tih ang vel duang mai mai kha an tlei pui em em mai a nih hi. Mizo Kristiante chu heti zawng pawh hian kan vannei e.  Mahse kum zabi tharah meuh chuan kan Zo Krismas hlate pawh a thlarau lo sawt ve ta khawp mai, kan local TV channel ah kan hmuh ve nual tawh hlawm hi.

            Krismas hla album hial lo siam tawh zaithiamte hi an vannei ngawt thung mai. Krismas apiangin an lar thar ziah hi a ni ber a. Jim Reeves Krismas album te hi a thar reng mai a nih hi, Krismas kan hman chhung chu kan play reng tawh dawn a ni.Chutiang bawkin Mizo zaithiamte zingah pawh Lalsangzuali Sailo te, T.Lalengzauva te leh Lalruotmawi te, Siampuii Sailo te pawh Mizote zingah chuan Krismas apiangin an lar thar leh ziah thin a ni ber. Album siam lemlo pawh Krismas hla lo hit tawhtu Roliana Ralte pawh a taksa kan zingah awm tawhlo mahse a Krismas hla ropui, a hma a kan sawi tak, ‘A Lo Her Chhuak Leh Dawn Ta’ tih hmangin kumtin Krismas lai chuan amah ngei leh he hla satute chuan min la awi zel dawn. Chutiang bawkin Krismas hla hit dang neitute pawh in mi hriat an rawn hlawh thar leh thin a nih hi.

            Krismas han sawi takah chuan khawvel deuh hlek a Krismas hla satu Boney M te pawh Mizote zing mai bakah  khung khawthlang ram changkangho zingah pawh khuan Krismas lai chuan an Krismas hla hit ho chu club ah an la lam pui ve hut hut reng tho mai. Boney M Krismas hla han sawi takah chuan an hla pakhat ‘Felis Navidad’ hi Krismas hla tha tak a ni.Mizo zingah pawh a lar thim a niang, thenkhat in ‘Police never dance’ an ti, thenkhatin ‘Police Davida’ an lo ti thul, an tleipui ve em em tho.Thenkhat lahin ‘Ellis Saidenga’ lo ti tawk an awm bawk ! Pu Ellis Saidenga damlai khan kan in hi a rawn chuankai ve fona a ni a.Vawikhat chu Krismas dawn hnaih hian ka fanu, la a ve tak hian ‘Felis Navidad’ hla hi  a thiam ang anga lo zawm ve in, ‘Ellis Saidenga’ a lo tih lai tak khan amah Pu Ellis Saidenga chu a rawn lang hlawl mai a, kan hrilhhai in a nuihzat thlak ang reng bawk si, kan lai khawp mai ! Boney M ho sak lar bawk,Krismas hla lar ‘Mary’s Boy Child’ hla a tlar hmasa ber  ‘Long time ago in Bethlehem’ tih pawh hi khawi lai hmun pilril deuhah chuan ‘Lawngtlai ago in Bethlehem’ lo ti tawk an awm nawk a, ‘Lawngtlai a bo in Bethlehem’ ti tawk pawh an la awm cheu ! Eng nge pawi ang,an lo hriat ve dan a ni miau a,hlim taka Krismas an hmanna a nih chuan a tha vek mai loawm ni,ti r’u ??

            Awle,he article hi kumin 2016 atan a Lelte Wkly a ka article hnuhnung ber a ni dawn ta,Ka article ningnel tak min lo chhiar sak thin leh min lo comment sak thinte chungah lawmthu ka sawi a, Lelte Weekly chanchinbu hmangin KRISMAS CHIBAI ka buk vek a che u.Pathianin rem a tih a kan dam a nih chuan kumthar 2017 ah he chanchinbu hmang hian kan inkawm leh dawn nia.

“ Damten leng la Khuanu zarah Krismas ni lawmawm a’n,

  Chutin Chibai ka buk a che,Kumthar lo thleng leh zel tur nen.”

 

Leave a Reply

Top