Mizoram Sawrkar leh Freedom of Expression

Tunhnaiah Mamit lam Sumo service pakhat a motor hnung lama “Kawng chhe luttuk hi ka chau, Lalpa eiruk theihna lakah min veng ang che” tih thuziak tawite chu ngaimawhin District Transport Officer (DTO) kaltlangin sawrkarin thu leh awm hma chu service tawh rihlo tura thu pe in motor document pawh an laksak thu social media hrang hrangah kan hmu a. Enge hetianga thuneitu lamin hma an lakna chhan awm tur hi hriatthiam a har viau mai a. A thu inziak lah thudik tak ‘kawngchhiat thu’ leh kan ram hmelma lian eirukna lak atanga a fihlim theihna tur atana a Pathian a auhna angah lo ngai ta ila; Mizoram sawrkar tan hian a eng lai ber hi nge huat tur leh dan kalh a che anihna hi mipui nawlpui tan chuan hriatthiam a har riau mai a. Direct taka sawkar a beihna hmuh tur awm bawk silo (lo bei pawh nise thudik behchhan anih chuan dan bawhchhiatna (criminal offence) anih a rinawm chuang loh.

The Mizoram Transport Vehicle Rules 1995 (Motor Vehicle Act 1988 kenkawh anih theihna tur atana Mizoram sawrkarin dan a siam) ah chuan phek 77-78 chho a Rule150 (i) ah chuan ti hian a inziak a, “No advertising device, figure, or writing shall be exhibited on any transport vehicle save as may be specified by the State Transport Authority by general or special order”. Sawrkar lam mi leh sa thenkhat ni awma ngaih theih tur ten an han sawi hmangin hemi dan behchhan hian DTO hian action a la ani tiin an sawifiah a. Transport Department lah chuan tlai hnuhnawh tak, social media lama a darh hnu leh inhnialna nasa tak a thlen tawh hnu Ni 14.7.2017 khan he dan leh State Transport Authority (STA) in information a tihchhuahte chu mumal taka kengkawh turin district tin DTO te a hriattir a. He rule 150 (i) hian advertisement chungchang bik a sawina ni awm zawk mah hian a lang a. Chu chu India ram state tam zawk a helam pang inkaihruaina dan an neih zulzui pawh a ni a. Election kaihnawih leh advertisement atana motor/private property an phalna la hmasa lova thil ziak tar hi chu India ram hmun hrang hrangah leh Election Commission of India pawhin a khap tlat ani (Rule150 (i) chungchang bik a a hrilhfiahtu tur leh a thu ken tichiangtu tur chu court a nih angin chu chu court kutah dah ta ila). Mahse tunlai kan thu khel Mamit Sumo chungchangah hi chuan a chunga kan sawite hi a lekkawh theih kherin a rinawm loh a. A chhan chu kha motor a thuziak awm kha advertisement ani lova, election laia political party emaw candidate ten an mahni party thu an puanchhuahna slogan pawh ani heklo. Amaherawh chu private-owned public transport vehicle hova thuziak hrim hrim khapna dan ani ti a Transport Vehicle Rules150(i) hi sawrkar lamin tanfung a hmang a huamtir an tum anih chuan Indian Constitution a Fundamental Right to Freedom of Speech and Expression( Article 19 (1a) ) kalh ani ngeiin a rinawm. Chutih rual erawh chuan freedom of speech pawh hi Constitution ah vek a chintawk (restriction) a awm a (under reasonable restriction), heng:-“Security of the State, friendly relations with foreign States, public order, decency and morality, contempt of court, defamation, incitement to an offence, and sovereignty and integrity of India” te hi sawrkarin restriction a siam theihna chhante an ni a (See Article 19 (2)). Hei pawh hi fiahfel tak Constitution ah sawfiahna mumal a awm loh avangin Court hrilhfiahna leh thutlukna ( rulings) hrang hrang behchhana dan leklawh ani mai thin.
MVAct 1988 behchhana a hnuaia dan tesep siama hetiang public transport vehicle a thil tar chungchang hi state hrang hrang ah dan siam ni bawk mah se advertisement tar chungchang an ni tlangpui hlawm a. Supreme Court chuan advertisement zawng zawng hi a thu ken a zirin freedom of speech and expression hian huam vek lemlo bawk mah se ‘idea’ puangchhuak thil ho chu a huam ve ngei hlawm a ni tih a lo tichiang tawh bawk ( Hamdard Dwarkhand vs Union of India)

Delhi sawrkar in MV Act 1988 hnuaia Delhi Motor Vehicle rules 1993 behchhana advertisement tar chungchang inkaihhruaina dan a siam chu NGO pakhatin a khing a, chuta a khin chhan thenkhat te chu; India Danpui hnuaia dikna chanvo ‘freedom of speech & expression’ a kalh a ni tih te, Dan tesep ( MV rules) siam hi a danpui ( parent act MV Act) in a thuneihna a pek chhung leh a danpui ( parent act/ MV Act) thil tum tinzawn a ni lo, MV Act in dan tesep(rules) siamtheihna a pek hian midang hnenah dan tesep siam lehchhawntheina (sub delegation) a pe theilo tih te a ni. Heta sawrkar a khinna thenkhat hi kan thil khel lai mek nen hian a inzul hle a ni. Public transport vehicle a thilziak tar phek khap (blanket prohibition) tur zawnga he dan her rem lo tum emaw, phalsak tur bik siam tura dan chu thuneitu dang hnena dan tesep (rules) hmanga hlan chhawn leh (sub-delegation) emaw chu dan mit a tling zo tura ngaih theih a nilo. Delhi High Court hian sawrkar inkaihhruaina siam hi hman hrih loh turin a ti nghe nghe (Satish Saluja & Ors Vrs Govt of NCT of Delhi). Dan angin hma la ve ila eng tak kan ang ang maw? Dan rorelna mai bakah democracy ramah chuan mipui in heti taka kan helh tlan leh mipui mimir in thiamloh kan chantir (social sanction) thil hi chu tu tan mah en liam mai theih a nilo ang. Mi hang dikna chanvo sualtu ropui Martin Luther King Jr chuan “Mi tupawhin dan lai lo leh dan diklo chu a ngaihtuahna thiang tak atanga zawmlo turin mawhphurhna a nei a ni” a lo ti hmiah mai. Hun laihawla kohhran pa St Augustine pawhin “Dan lai lo leh diklo chu dan awmlo tluk zeta laktlaklo a ni” a ti hmiah mai.

British in India ram an awp lai khan Kumpinu sawrkar sawiselna satliah deuh pawh kha ngaithei lovin India ram hruaitu thenkhat Gandhi, Nehru, Tilak, etc te ho kha jail ah an khung fo mai a. Chu dan fair lo tak chu India ram zalenna sualtu (freedom fighters) ho pawh khan an lo dodal nasa thin hle a ni. India ramin zalenna a hmuh hnu pawh khan Min awptu te dan siam (colonial laws) tam tak la hman chhunzawm (retain) zel a nih avangin sawrkar sawiselna leh sawrkar thiltih dikloh hailan tum thintute kha India sawrkar chuan misual a chhuah in thiamloh chantir dan mawlh zawngin Birtish ho hunlai ang tho mai khan thuneihna an hmangsual nasa a. Court case tam tak pawh a awm reng a; chung zinga pawimawh tak, tuna thlenga Judge te leh dan lam mithiam (Legal luminaries) ten freedom of speech debate a awm changa anla behchhan ber court thutlukna mellung pawimawh (historic judgement) pakhat chu kum 1962 kuma Supreme Court in Kedarnath Judgment a tih chhuah kha ani. He judgement pawimawh tak hi a hnu zela sawrkar thiltih dikloh nia an hriat an hailan leh an sawiselna kawnga mimal leh a huhova hma la thin ten, sawrkarin thiamloh chantir tuma a beih pawh a an tan chhan leh court thutlukna siamtute pawhin an tanfung (reference) langsar ber pakhat ani a. Kedarnath Judgement chuan sawrkar sawiselna satliah hi midangte tharum thawh tura va fuihna emaw, law & order problem siam tumnate a awm anih si loh chuan criminal offence a tlinglo tiin chiang takin thutlukna a siam a. (See Kedarnath Das v. State of Bihar, AIR 1962 SC 955)
Tin, ram pakhat ve riang ruang, sakhua, culture, tawng chi hrang hrang inpawlh nuai mai mihring 1.3 billion chuang zet awmna ah chuan fundamental rights kan neih leh dan tesep kan neih hrang hrang te alo inkalh deuh chang alo awmlo thei lova. Chutiang harsatna alo thlen chuan engtin nge chinfel theih anih ang tiin Supreme Court pawhin hemi kaihhnawih thutlukna vawi enge maw zat alo siam tawh a e.g Champakam Dorairajan Case (1952), Golakh Nath Case (1967), Kesavanath Bharati Case (1973), Minerva Mill Case (1980). Heng judgment hrang hrang khaikhawmna atanga lo lang ta chu Parliament meuh pawhin India Constitution siamthat(amend) theihna power nei mahse India Danpuia a laimu leh ruhrel ‘basic structure of Constitution’ chu a tidanglam thianglo tih ani. Tin, dan tesep dang leh fundamental rights ho zingah thil inkalh deuh alo awm anih pawhin fundamental rights hi a dingchang zawk zel tur ani ang tiin thutlukna a siam a. Chutih rual chuan Directive principles of State Policy (DPSP) bika Article 39 (b) & (c), ‘mi tlemte kuta sum leh pai/wealth a awm lohna tura directives’ emaw Emergency lai tih lohah chuan eng dan mah Fundamental Rights chungah emaw kalh zawngin a awm thianglo ani tiin SC thutlukna hi case hrang hrang kan en chuan kan hmu thei ang. Heng dan tesep kan tih hian India ram state hrang hrang a kan dan siam Motor Vehicles Act/Rules te pawh hi a huam vek ani ti ila kan sawi sual awm lo ve.
Kum 2011 India Against Corruption Movement (IAC) vanglai pawh khan Cartoonist pakhat Aseem Trivedi chuan Anna Hazare kaihhruaina a movement inmung mek support nan ‘Cartoon Against Corruption’ a tlangaupui a; website te neiin a website www.cartoonsagainstcorruption.com ah khan sawrkar kalphung corrupt leh politician te sawiselna rorum tak tak a tarlang thin a. Chung zinga cartoon pakhat ah phei chuan Trivedi chuan India National Emblem a sakeibaknei pali awmte chu chinghnia thisena tuihal(politician) ah a thlak a, a thu inziak Satyamev Jayate (Thudik chauh dingchang rawhse) tih chu Bhrashtamev Jayate (Corruption chu lo lalber zel rawhse) tiin a thlak bawk a. He cartoon avang hian Trivedi hian ram leh hnam tana pawisawi case (sedition) mai nilovin, national emblem tibawrhbang leh IT law a bawhchhia tiin man ani a, jail ah pawh chawlhkar hnih vel September thla 2012 khan dah ani. He issue a Trivedi man anih dan hi dan lam thiam mi (legal experts) tam tak ngaihdan nilovin thuneitute an chhuahchhal zui a. Supreme Court Judge hlui leh chutih hunlaia Press Council of India Chairman Justice Katju chuan Trivedi hian engmah dan bawhchhiatna a neilova, amah diklo taka man a, jail a dahtute te hian thilsual anti zawk ani tiin IPC a wrongful arrest and confinement behchhanin cartoonist thlavang hi a hauh a. Bombay High Court chuan March 18, 2015 khan he case chungchangah hian a judgement siamin; He Cartoonist hian tharumthawhna a che turin tumah a fuihpawrh lova, government/state machinery laka a thinrimna leh lungawilohna a tilang satliah ve mai ani, Tute pawhin sawrkar kalphung leh inrelbawlna hi na tak tak pawhin an sawisel thei a, tharumthawh tura midang fuihna thu an sawi anih loh chuan criminal offence/sedition ani theilo” tiin thutlukna (verdict) a siam ta ani (See Sanskar Marathe vs State of Maharashtra & Ors. [2015 CriLJ 3561]). He judgement hi activist-lawyer Sanskar Marathe in PIL file a Trivedi diklo taka man anih dan a choletna rahchhuah ani kan ti thei awm e. Tin, section 124-A and 153-A IPC hnuaia charge, Punjab a Akali Movement kaihhnawih ah 1984 khan hetiang lam deuh tho case hi a awm a. Prime Minister Indira Gandhi October ni 31 tlai a thah anih lawm luttuk, Punjab Government hnuaia sawrkar hnathawk pahnih Balwant Singh leh Bhupinder Singh office bang sloganeering avanga man leh kum khat hreawm taka jail tang a, Rs500 ve ve fine bawk tura Lower Court in a tih chu Supreme Court in thiam a chantir tak pawh an awm bawk. (See SC Judgement: Balwant Singh And Anr vs State Of Punjab on 1 March, 1995). Hmanni lawka Supreme Court vekin Shreya Singhal case a Section 66 A of IT Act a paihthlak dan te pawh kha kan la hre hlawmin ka ring. Kha historic judgement Indian Constitutional lawyer hmingthang Fali S. Nariman a fapa leh tunlai SC judge langsar, Justice Rohinton Nariman leh Guwhati High Court Chief Justice hlui Justice J. Chelameswar te siam ah khan speech chi thumin then ani a, chungte chu:- discussion, advocacy leh incitement te an ni. Discussion leh advocacy ringawt hi chu criminal offence a tling lova, incitement a tel chiah in Article 19 (2) ‘reasonable restriction’ kha a lekkawh theih chauh ani tiin freedom of speech chungchanga judgement pawimawh tak a awm bawk ani. (The Court holds that mere discussion or even advocacy of a particular cause, howsoever unpopular, is at the heart of Article 19(1)(a). It is only when such discussion or advocacy reaches the level of incitement that Article 19(2) kicks in. See Shreya Singhal vs U.O.I on 24 March, 2015).
Mamit Sumo chungchang bikah hian thil dang zawng ai chuan kan sawrkarna fawng chelhtute hian anmahni direct taka beihna pawh nilo vehicle owner/driver pakhatin kawngchhe lutuk a chauh pui thu a auchhuahpuina kha dan tanfung (legal basis) mumal tak pawh nei lovin; anmahni beihna emaw tiin huat ah anla ni mai hian a lang zawk a. Chuti nilova thuziak hrim hrim transport vehicle a tar tlan an khap dawn anih chuan Zoram chhunga motor tam zawk hi chu service theilo tur anni ngeiin a rinawm. Hetiang thuziak hote sawrkar MLA seat 40 ah 34 lai nei theiin huatah ala dawn anih chuan huat tur leh khap tura pui hi a tam dawn lutuk a, kan inkhap seng lovang. Tin, chutiang khapna fahrah te te chu chu Consitutional principle kalh ani tih leh democracy awmze hrethiam miahlo te rorelna rahchhuah ani tih mipuiin kan hriat a, kan dodal ngam a ngai ani. Chutiang thil diklo palzam leh mipuite Fundamental Rights pawh bawhchhiat pawisa lo sawrkar kan nei anih chuan thil vanduaithlak tak ani a. Democracy inghahna lungphum chu mipuite (demos) kan ni a. Sawrkar alo pian chhuahna chhan leh roreltu kan neihna chhante pawh hi kan zavaia that tlanna beiseina rilru atanga rawn chhuak ani. Kan mimal zalenna thenkhat kan common security/welfare atan kan compromise a, chumi insiamremna atanga sawrkar/state pawh hi lo piang a ngaih ani a. Mimal zalenna a pumhlum (absolute) lo ang bawkin Sawrkar thuneihna (power) pawh democracy ramah chuan a pumhlum (absolute) tur ani chuanglo. Tupawh lo sawrkar se sawrkar power hmansualna lak ata mipuite venghim tura rights te hi Constitution a awm leh a duangtute pawhin an lo dah ani a. Sawrkarna chelhtuten thusawi/thuziak an duh loh deuh leh an ngaimawh zawng apiang an target a, dan bawhchhia a an chhuah (an criminalize) mai lohna tur atana Right to Freedom of Speech and Expression pawh hi mumal taka Constitution a lo awm ani tih Constituent Assembly Debate kan chhiar chuan kan hre thei ang. A chhan chu checks and balances awm lova sawrkar thuneihna a awm chuan kan zaivaia tan chhiatna zakhua anih tih hi history atang pawhin mipuite hian kan inzir fing tawh ani. Sawrkar legitimacy rawn chhuahna tobul chu mipuite (popular consent) ani a. Tu party pawh sawrkar se chutianga mipuite consent pawh zahzo lova an fundamental rights rahbehsak ching sawrkar chu mipuite hian paihthlak theihna legitimate power kan nei ve ani tih pawh hriat a pawimawh khawp mai.
Kum 5 dana kan inthlanga vote kan va thlak leh ringawt ah hian mipuite hi kan democratic rights leh responsibility a tawp mai lova. Nitina kan nunhona leh sawrkarin dan leh thupek a kenkawhna kawngte, public policy a siamna ah te hian mipuite hian aw chi hrang hrang leh interests hrang hrang kan neihte hi kan sawichhuak thiang a, chu chu eng sawrkar mahin a ngaihthah thianglo ani. Nitina kan kan veng, khawtlang leh ram inrelbawlna atana tha tur, kan zavaia ngun taka forum hrang hrang a kan ngaihtuah hova; tha kan tih zawng leh tha kan tih lemlo pawh sawi chhuaka mumal taka public deliberation a awm hi functioning democracy mumal zawk kan neih theihna tur atan a pawimawh hle ani. Chutiang tih theihna hmun leh hun awmlohna ram chu democracy ram tia koh theih ani lovang. Chutiang environment tha leh zalen a awm theihna tur atana mipuite fundamental rights vawn him chu thlantlin sawrkar leh kan judicial institutions te mawhphurhna pawimawh berte zinga mi ani ti ila kan sawi sual awm love. British Philosopher John Stuart Mill chuan “Democracy is a government by discussion” tiin alo sawi a, chu discussion ah chuan khua leh tui zawng zawng a hausa leh rethei, chhim leh hmar, khawpui leh thingtlang inthliarna bik awm lovin stakeholder kan ni a, kan pawimawh em em vek ani. Chutah chuan hmung hrang hrang atangin sawrkar fakna leh sawiselna pawh a awm ngei ang. Chung chu ngun taka ngaihtuah a, rilru zau tak leh ngaihdan dang deuh kan pawmpui kherloh thil alo awm anih pawha zawldawh taka lo ngaithla thei sawrkar tuang chhah (thick skin),mahse mipuite harsatna hrethiam leh ngaihven tur khawp marphu nei (sensitive) ni si kan neih theihna tur atana zirlai pawimawh tak he issue hi lo ni se a duhawm hle mai.
He sumo a thil tar hian mipui ten kan dikna chanvo kan hriattharna atan min inpumkhat tir se; Civil Rights Movement laia thlalatu (photojournalist) pakhatin police rualin nunau pawisawilo ten ralmuang taka kawng an zawh lai an talhfiaka an pawng hlap lai a thehdarhin phung velh an sawi ang maia mipui rilru a dikna duhna a chawh thawh dan leh, ram kangin mual a tuam ang maia kha thu a darh chak ang khan kan Road Tax pek phu tawk tal kawng tha neih hi kan chanvo a ni tih hria a min thanharh tirtu hmanrua lo ni mawlh teh se.

NAZARETH

‘Nazareth’ han tih hi chuan Mizo Kristian tam zawk thinlungah Palestina ram a lo lang a,Isua hun lai thlirin lung a leng nghal deuh ruih tlangpui awm e. Thangthar rimawi ngainaho rilruah erawh chuan seventies lai a rock band lar zet, an hla thenkhat Zofate pawhin kan lo tuipui  em em thinte kha a lo lang tel bawk ang. Rock n Roll khawvelah hian band hming maksak tak tak hi a tam mai, chung zingah chuan khua leh ram hming chawi band hming pawh a awm nual.Ram/khawmualpui hmimg chawi America,Asia,Europe,Japan  tih hming pu band hlawhtling tak takte pawh kan hre awm e. Khaw hming chawi band pawh engemaw zat an awm,hetia ka hriat theih maiah pawh Boston, Manhattan, Hanoi Rocks, Saigon Kicks, Chicago, Nazareth tihte a lo lang nghal. Kei aia hre tam pawh in awm ngei ang. Nazareth band hian an hming hi kan Bible a Nazareth, Lal Isua seilenna khaw hming chawi a an phuah emaw ka lo ti ve ngawt thin a, khang hun lai a piangthar hlim, rock music ngaihthlak chak thinte khan an hming atang khan gospel rim nam emaw tiin an hlate kha an ngaithla ngawt thin te pawh a ni mai thei e. Mahse chutiang a lo ni hauhlo mai. An band hming hi USA a Pennsylvania state a khaw lian vaklo ‘Nazareth’ hming chawi a an phuah daih a lo ni si, Palestina ram leh Bible nen chuan a lo in tuha lo nasa !

Nazareth Band hi an rawn lar tirhte khan ka lo hmelhriat ve tawh a, an hla hit hmasa pawl ‘Broken Down Angel’ phei chu record player ngei khan kan play nasa thin teh e. Khang hun laia kan Zo rock band te pawh khan an cover nalh thei thin khawp mai. He hla hi khawvel hriat an nihna chu a nilo na a, a lar thawkhat hle a, radio ah pawh play nasat a hlawh hle thin awm e. Khawvelin an hriat tanna hla erawh chu ‘Hair of the Dog’ leh ‘Love Hurts’ an cover hi a ni. Love Hurts hi Felice leh Boudleaux Bryant te inphuah tawm a ni a,1960 khan The Everly Brothers(Duo), Mizote zingah pawh lar em em thin khan an lo sa lar daih tawh a, an sak dan style leh version erawh chu a in ang lo viau thung. 1975 a Nazareth in slow rock style a an han sa ve ta chu an lar pui ta em em mai a, an vocalist McCafferty aw tham mawi leh sang(falsetto) mawi em em mai,chak bawk sin en khan a lo in rem em em mai lo niin, international hit an neih hmasa berte zing a mi  a lo ni ta. Love Hurts hma 1973,April ah anmahni irawm chhuak ngat ‘Broken Down Angel’  kha an released a, an album Razamanaz ah khan an telh bawk a, he hla hi khatih hun lai a British heavy metal/hard rock band lar Deep Purple bassist Roger Glover-a’n a produced a, hard rock hla tha tak a ni

Nazareth hi Scottish band an ni a, scot ho khuan British rock music scene ah hian thawm an nei lian hle, chu chu sawi thui lo mai ila. Scotland khaw pakhat Dunfermline ah December 1968 khan an indin a, vawiin thleng hian an la tour reng a nih hi(Dunfermline khuaah hian ka kal ve ngat tawh a nia, north pole a hnaih tawh bawk a, April thla khan zan dar 10 ah ni a tla vel chauh, ni an nei rei a, zan a reilo hle thung-RH).An din tirh a memberte chu – Dan McCafferty-vocals, Manny Charlton-guitarist, Pete Agnew-bassist leh Darrell Sweet-drums te an ni. An vocals McCafferty aw tham(gravel voice) mawi tak mai hian a hla sak tur a thlang thiam bawk a, an vanglai kha chuan an hla sak apiang deuhthaw kha an hit viau vek zel mai. Hetia Nazareth band chanchin ka han khuk thar pui hluai nachhan hi eng dang ni lovin,hmanni lawka Zawlkhawpui min rawn tlawh ve avang khan rilruah an lo thar a,an chanchin ziak hi min ti chak ta deuh a ni e. Hei rock band lar thin ten Zawlkhawpui an tour map ah min lo telh ve ta a, an hming mai kan hriat thinte kha an hmaichhan ngeiah an hla hit te sa a an zai leh play te kan lo thlir ve thei ta hi a lawmawm khawp mai. Amaherawh chu tute fiamthu ang deuhin kan lo chan ve ho hi ‘Aging rock band/star’ an la ni rih a, tun lai khawvel a par chhuang mek ho chu sawi loh 90s leh millennium thar band leh star te chu kan sum leh pai leh hmunhma  hrim hrimin a la tlin loh deuh avangin kan chah chhuak ve thei rih lo na a, Management te thahnem ngaihna zarah Smokie, Petra, Firehouse, Eric Martin(Mr Big) leh Nazareth te hialin, an vanglai ni tawh lovin,original member ni chiah tawhlo mahse,  kan Zawlkhawpui a show an rawn nei ve ta hi a ropui hrim hrim e. Hetia han sawi takah chuan Mizote ngainat em em CCR band kha keh darh tawh mahse,an zaipu  ber, an band khaipa John Fogerty hi tour te pawh a la nei thin a, a ni hi chah chhuah dan awm ve ta se, Mizo mipui lawm hlawh pawl tak tur chu niin ka hria. Hmana Smokie an lo kal khan an band original member chu an bassist Terry Utley chiah kha a ni a, mahse member thar ho khan Smokie spirit kha an awi nung tha em em tho mai. Chutiang chiah chuan tun hnaia lo kal Nazareth band ah pawh khan an bassist Pete Agnew chiah kha an original line-up a mi chu a ni bawk. Hetiang a band member, a bikin vocals tur an lak thar dawn hian original vocalist aw ang thei ber tur kha an zawng tlang pui thin a. Journey vocals Steve Perry a chawlh khan a band memberten vocalist thar tur an audition khan Perry aw ang thei ber tur an zawng a, an lak tak Filipino pa te takte Arnel Pineda khan a hmun a luah zo khawp mai. A hmel hmulo in a zai kha ngaithla ta ila, Perry aw a nilo tih hriat a har khawp ang. Chutiangin Smokie leh Nazareth te pawh hian an original vocalist aw leh zai dan ang thei ber tur kha an zawng a, an duh taka an lak te an ni bawk thin a, an aw leh style pawhin a ang viau hlawm reng a nih kha.

Nazareth band hi an hlawhtling thawkhat viau chuan a ngaih theih a, amaherawh chu rock star leh band tam ber duhthusam UK leh USA, ‘both sides of the Atlantic’ an tih thin a Top 10 kai neih ve ve ang chi ah kha chuan a che tha lutuk lo chu a nih hi, an ram UK leh Europe khawmualpuiah lar thawkhatin charts thleng sang hla pawh nei nual mahse, Atlantic tuipui ral lehlam USA ah chuan chart kai hla sawi tur an nei tamlo hle a,hei vang hi ni maw, hriat an hlawh teh chiam loh bakah an tla na viau tlat lo a nih hi. Hetiang hi a lo awm thei dawn khawp mai. Cliff Richard kha a vanglai khan heng lai thleng thlengin a lar hle a,a ni pawh kha UK, Europe leh Asia khawmualpuiah chuan a lar theih tawp a, America khawmualpui lamah chuti teh ualin a tla na lemlo thung a ni mai thei.

Khawvel huap a Nazareth in an rawn lar pui ber nita chu 1975 a an album ‘Hair of the Dog’ kha a ni.He album a track pahnih,album hming put chhan ‘Hair of the Dog’ leh midang  hla an cover ‘Love Hurts’ phei chu single pawhin an hralh tam hle. The Beatles leh Rolling Stones te hi an band ngaihsan leh an band inspired tute an ni. An band hming hi Pennsylvania state a Nazareth khaw hming chawi a an phuah tih kan sawi tawh a. A bul tak chu khath hun lai a band lar The Band ho hla ‘The Weight’ hla thu : ‘ Pulled into Nazareth, was feelin’ about half past dead..’ tih line atanga an phuah hi a ni a, he hla a Nazareth hi Pennsylvania state a khaw naran ve tak chu a ni.

1970 ah UK khawpui London ah an insawn a, 1971 ah album ‘Nazareth’ an released a,eng vak an ang lo. An album 2-na ‘Exercises’ chu 1972 ah an released leh a, hetih lai hian UK heavy metal band lar mek Deep Purple tour ah opening act ah te an tang a, tlem chuan mi hriat an han hlawh ve ta deuh a. Deep Purple bassist Roger Glover-a buaipuiin 1973 khan an album 3-na  ‘Razamanaz’ chu an puitlin a, an released ta bawk a. He album a track pahniht, Glover-a’n uluk taka a enpui leh buaipui ‘Broken Down Angel’ leh ‘Bad Bad Boy’ te chuan UK Top 10 an kai ta ve ve a, miten Nazareth an ngaihven tan ta a ni. 1973 kum tawp lam a an album ‘Loud N Proud’ te,1974 album ‘Rampant’ te,  1975 album ‘Hair of the Dog’ te chu hralh kal tak a ni chho ta hlawm a ni. Nazareth hi America khawmualpuiah tla na teh chiamlo mahse an album Hair of the Dog a a title track, ‘Hair of the Dog’ thenkhatin  ‘Son of a Bitch’an tih bawk hi a lar viau mai, seventies chho vela radio a hla play tam pawl a tling pha a, US Top 10 ah a lang pha a,ram hrang hrang 9 ah top 10 hit a kai a, ram 6 ah number 1 a kai bawk a ni. Norweigian charts ah phei chuan chawlhkar 60 zet a chambang a ni. An hla-  Crazy te,Holiday te,Dream On, Where Are You Now, Ruby Tuesday(Rolling Stones cover) leh a dangte chu Rock N Roll khawvel a hla mawi leh hriatreng tlak a ni fo tawh dawn a ni.memberte in thlak kual rengin 1971 atanga 2014 thleng khan album 24 an released tawh  a ni. An vocalist aw tham mawi em em McCafferty khan August ni 28,2013 khan hrisellohna avangin a chawlh san a, ama duh zawng tak Scottish tho Linton Osborne chu Feb ni 22,2014 khan a aiawh turin a ruat ta a ni. Osborne hi January 16,2015 thleng a tel a, Feb ni 13,2015 ah Carl Sentance chu vocalist tharah an lawm lut leh ta a, a ni ho hian an la tour ve ta zel a,Zawlkhawpuiah hial show an rawn nei ve ta a nih kha.

KRISMAS THUNAWI

             Kan la ti dawn chauh emaw tih laiin hriat loh karin hun a lo liam duak duak a, Krismas chu kar hnih khat  lekin min lo dang leh ta reng mai ! Naupang kan nih ve lai hun te kha chuan Krismas te hi kan nghakhlel em em thin kha a ni ngai a,chuvang chuan a lo thleng har te pawh a ni mahna. Khang hun laia Krismas kan nghahhlelh em em na chhan ber chu kawrthar neih, Krismas ruai theh leh zaikhawm kha a ni ber mai. A hnam pum khan kan la rethei bawk a,kawrthar te kha naupang phei chuan Krismas dawn a kan neih kha a ni mai a, sa lah chu Krismas ruai a kan ei kha kan sa ei chu a ni tlangpui leh deuh mai a.Vawk talh nikhuaah vawksa kan ei a, chu pawh a vulhtu/talhtu pawhin mahni chhungkua in a pumbilh theih loh a,thenawm khawvengte nen kan tlan a ni ber a.Thenawm hnai a ramvachal deuh an awm chuan an sa kah min hleh ve zeuh changin sa kan ei leh a ni mai a. Sa ei hrim hrim kha a khat em mai a, hei vang ringawt pawh hian Krismas ruaitheh hun chu nghahhlelh loh theih a ni lo a lawm.

            Krismas hi loneimite awllen hun a lo ni tawh a, khawdang ramdang a lehkhazir leh sorkar hnathawkte lo haw khawm hun a ni bawk a, khawtlang a zalen a, rilru pawh a thawveng a,khawtlang kha a nuam em em mai thin a ni.Tunah chuan thingtlang khuaah meuh pawh kha Krismas ‘spirit’ kha hmuh tur a vang  ta! Keini ho kha Zoram Krismas nawm vanglai nang pha chin ‘Last batch’ chu kan ni ta mai awm mang e, kan fate ho hi chu tunlai Mizoram khawvel Krismas hre pha chin  ‘generation’ an ni ta in a lang, keini ho, fifties leh early sixties a piang ho kha Zoram khawvel Krismas nawm vanglai hre pha chin chu kan ni ta mai in ka hria. Krismas chhang den leh chhum te,ruai theh hma deuh a nula tlangvalin in tin a chaw an han khawn a, ruaithehna hmun tur a zem lian pui a an han chhung khu vut vut mai thin te kha a Krismas em em hian keini ho kha chuan kan hre tlat nia. Ruaitheh a zawng a hrisel lo ber chi changel hnah phah a hlui buatsaih a chaw leh sa kan han in zen tawm luih luih mai thin te, hmun awih deuh a,a thlanglam pang chan palh phei chuan thiante sa tui chawm thli lo luang zawng zawng kan lam a a rawn luang thla nguah nguah mai thin leh ten miah lo a kan lo bar fai vek zel mai thinte kha a hrisel lo hle tih hre mahila, a Krismas tlat lawi si! Urlawk zan,Krismas zan kan tih ber mai te khan zaikhawm hi tlaivar ngei tura ngaih a ni a, naupangho pawh zaikhawm ve chiahlo mahila, zaikhawmna kawtah meilum ai in kan lo pawngsen tlaivar ve hrim hrim zel a, kha kha a Krismas na chu a ni leh bawk. Khatih lai hun kha chuan nula tlangvalte pawh an zaikhawm a, interek tih lam kha a la lar lutuk lo bawk a, zaikhawmnaah tuitak a Krismas hla sa in mitthlaah Bethlehem dai an fang a. Tunah erawh mitthla nilo in a takin khawpui dai kan fang tawh thung hlawm a!!

         Krismas kha kan nghakhlel ngawih ngawih a, a liam leh mai tur te kha kan ui ngawih ngawih a,a zawh chuan ni 365 zet nghah leh a ngai dawn tih kha kan hre chiang ve em em a, chu pawh dam rei nghah thil a la ni leh nghal. Zaithiam leh hlaphuahthiam fam ta Roliana Ralte  chuan a Krismas hla phuah lar em em,amah ngeiin a sak lar ‘A Lo Her Chhuak Leh Dawn Ta’ tih ah chuan lungrun em em in ‘Hmanah chuan lenrual duhte nen, fakhla saa tlaikhua varin,hlimni ral tur ui em em in, Lal lo piang hlimte’n kan lawm,’ tiin khang hun lai Krismas hlut zia leh thlakhlelhawm zia a tarlang chiang khawp mai.Nia, he hun lawmawm hi ui leh am em em in kan hmang a,ui em em mahila, kan chelh din rual lah ni silo, tichuan kan hmang dawn chauh emaw kan tih laiin a liam leh ta vuah vuah mai thin si a, a lo thlen leh hun chu damrei nghah thil a lo ni leh ta mai si. The Shadows ho hla lar zet ‘Mary Anne’ hla thu min ti hre chhuak : ‘How slow the moments go, but how fast they fly, the next time I see Mary Anne’ tih hi. A bialnu Mary Anne a hmuh chak em em kha a han hmu ta cheng a, hun kha kal chak a ti leh ta lutuk si a, hetiang chiah hian Krismas pawh hi kan nghakhlel em em a, mahse a lo thleng a, a liam chawpchilh a ni leh mai thin si a! Kumin Krismas pawh hi kan dam chuan tun atanga ni reilo teah a lo thleng dawn, a lo thleng anga a liam leh nghal mai dawn bawk. A va han uihawm lawk em ! Chuvangin Krismas hi a ni tak ai chuan he article in chhiar lai vel hi a nawm lai ber chu a ni zawk, chu chu hre rengin ren leh thiam takin kumin Krismas chu nausen chibai buk nan hlim takin i hmang ang u aw.

            Mizo Kristiante hi chu kan vannei e. Krismas hi Biakinah Pathian fak nan kohhran ten kan hmang a, hlim takin sapho Krismas hla leh kan Zo hlaphuahthiam te Krismas hla, thlarau ataanga an phuah chhuah ngei chu sa in kan thlarau nun kan chawm a, kan nihlawh a ni. Sapho te hi chuan Krismas hi sumdawn nan an hmang a, festival chikhat ang lekin an hmang tawh hi a ni ber a. An Krismas hla thenkhatte lah hi ‘Ka Krismas card kha i lo hmu em?’ tih te, ‘Nikum Krismas khan ka hmangaih che i ti a, a tuk lawkah thenna thu min hlan leh si,’ tih te, ‘I tello chuan Krismas khawhar ka hmang a nih hi,’ tih ang vel duang mai mai kha an tlei pui em em mai a nih hi. Mizo Kristiante chu heti zawng pawh hian kan vannei e.  Mahse kum zabi tharah meuh chuan kan Zo Krismas hlate pawh a thlarau lo sawt ve ta khawp mai, kan local TV channel ah kan hmuh ve nual tawh hlawm hi.

            Krismas hla album hial lo siam tawh zaithiamte hi an vannei ngawt thung mai. Krismas apiangin an lar thar ziah hi a ni ber a. Jim Reeves Krismas album te hi a thar reng mai a nih hi, Krismas kan hman chhung chu kan play reng tawh dawn a ni.Chutiang bawkin Mizo zaithiamte zingah pawh Lalsangzuali Sailo te, T.Lalengzauva te leh Lalruotmawi te, Siampuii Sailo te pawh Mizote zingah chuan Krismas apiangin an lar thar leh ziah thin a ni ber. Album siam lemlo pawh Krismas hla lo hit tawhtu Roliana Ralte pawh a taksa kan zingah awm tawhlo mahse a Krismas hla ropui, a hma a kan sawi tak, ‘A Lo Her Chhuak Leh Dawn Ta’ tih hmangin kumtin Krismas lai chuan amah ngei leh he hla satute chuan min la awi zel dawn. Chutiang bawkin Krismas hla hit dang neitute pawh in mi hriat an rawn hlawh thar leh thin a nih hi.

            Krismas han sawi takah chuan khawvel deuh hlek a Krismas hla satu Boney M te pawh Mizote zing mai bakah  khung khawthlang ram changkangho zingah pawh khuan Krismas lai chuan an Krismas hla hit ho chu club ah an la lam pui ve hut hut reng tho mai. Boney M Krismas hla han sawi takah chuan an hla pakhat ‘Felis Navidad’ hi Krismas hla tha tak a ni.Mizo zingah pawh a lar thim a niang, thenkhat in ‘Police never dance’ an ti, thenkhatin ‘Police Davida’ an lo ti thul, an tleipui ve em em tho.Thenkhat lahin ‘Ellis Saidenga’ lo ti tawk an awm bawk ! Pu Ellis Saidenga damlai khan kan in hi a rawn chuankai ve fona a ni a.Vawikhat chu Krismas dawn hnaih hian ka fanu, la a ve tak hian ‘Felis Navidad’ hla hi  a thiam ang anga lo zawm ve in, ‘Ellis Saidenga’ a lo tih lai tak khan amah Pu Ellis Saidenga chu a rawn lang hlawl mai a, kan hrilhhai in a nuihzat thlak ang reng bawk si, kan lai khawp mai ! Boney M ho sak lar bawk,Krismas hla lar ‘Mary’s Boy Child’ hla a tlar hmasa ber  ‘Long time ago in Bethlehem’ tih pawh hi khawi lai hmun pilril deuhah chuan ‘Lawngtlai ago in Bethlehem’ lo ti tawk an awm nawk a, ‘Lawngtlai a bo in Bethlehem’ ti tawk pawh an la awm cheu ! Eng nge pawi ang,an lo hriat ve dan a ni miau a,hlim taka Krismas an hmanna a nih chuan a tha vek mai loawm ni,ti r’u ??

            Awle,he article hi kumin 2016 atan a Lelte Wkly a ka article hnuhnung ber a ni dawn ta,Ka article ningnel tak min lo chhiar sak thin leh min lo comment sak thinte chungah lawmthu ka sawi a, Lelte Weekly chanchinbu hmangin KRISMAS CHIBAI ka buk vek a che u.Pathianin rem a tih a kan dam a nih chuan kumthar 2017 ah he chanchinbu hmang hian kan inkawm leh dawn nia.

“ Damten leng la Khuanu zarah Krismas ni lawmawm a’n,

  Chutin Chibai ka buk a che,Kumthar lo thleng leh zel tur nen.”

 

SULHNU LEH LUNGLEN

Tunlai chu ka lung lengin nunhlui ka dawn in ka chhiar a,ka thinlungah thian hluite leh kan vul ve laini te a lo lang uai uai a,tichuan he article hi a rawn tlak zeh a ngai rih ta tlat mai a nih hi.Kumin 2016 October ni 14 hi ka thian tha leh unaupa,Rimawi khawvel a min hnuk luttu te zing a mi Zir Sangzela Hnamte in khawvel a chhuahsanna champhaphak vawi 14-na tur a lo ni ta reng mai.Kum sul sawm pali lai a lo vei dawn ta a nih hi,hmanni lawk kha ni maiin ka la hria a,mahse thangkhat lian a lo ni ve ta reng mai.Khawvel a chhuahsan champhaphak chu sawi loh,lehkha zir tur a Shillong khawpuia kan nu leh pa ten neihthinglung khawng a min chawm ve lai,lunglen tuar kan zir tak zawk hlauh hun lai te kha nimin lek emaw kan la tih laiin ‘Hmanlai’ a lo ni ve ta tak zet mai.Kum 2014 khan a nupui Pi Lalhungchhungi inah ‘Zir Sangzela Hnamte Memorial Society’ dinin,kei a thian bul lo ni ve ta chu Chairman-ah min vuah a,a pualin Siby Farm-ah hemi kum October ni 15 zan(a thih champhaphak vawi 12-na)ah hian hun te kan hmang ve kha a ni a.Mahse he Society hi kan awi nung zo hlei thei ta meuh lo a ni ber e.Chutih laiin thangthar zawkte zingah ‘Zir Sangzela Hnamte Fan Club’ te pawh an lo ding ta niin ka lo hria a,lawmawm ka ti khawp mai.A nupui,Pi  Lalhungchhungi Pachuau pawh a pasal hnung zuiin zai leh rimawi khawvel vawiin thlengin a la chhuahsan lo a,MZI General Hqrs ah Secretary a ni mek nghe nghe a ni.Han in hmuh nikhua chuan Sulhnu leh lunglen chhuiin rei tak,lungleng takin kan in bia a,nunhlui ram kan fang dun fo thin,chu chu kan tih theih sang ber a ni ta mai !

Khawvel hi chu kan kum hlun na tur a ni miau silo a,kan hmangaihten chelh din rual loh in mual min liam san a,sulhnu chhui leh nunhlui ngaiin tah a tul leh si thin a nih hi.He hun tawite ah hian keini a kara sulhnu zawng zawng kha ka chhui seng dawnlo,ka lunglen lah ka hri thla seng dawn heklo.

     Khawnge,hmanlai hunah let leh vawn vawn teh ang.Kumsul 40 chuang a liam ta,ni 3.9.1973(Thawhtanni) zan kha  Zo hla lenglawng leh lengzem hla tha tam tak tak phuahtu,2002 a min boral san tawh, Zir Sangzela Hnamte,Saji ti a kan koh thin nen kan intawnna hmasa ber chu a ni. College thuhmun a kal kan ni a,mi tawng tlem tak a ni a,kan inbe ngailo.Mizo zingah a tal lemlo bawk a,Thailand mi(Thai) emaw kan ti hman nghe nghe.Hemi zan hian ka unaupa(cousin) Zira Hnamte leh thian dangte nen kan in luah ‘Fox Hole’ kan tih maiah chuan Saji hi a rawn tek lut ve nawlh mai a.Hetih lai hian Golden Estate,Nongthymmai,Shillong-3 ah Pamama(R.Lalrinzuala,Ex-MLA) nen in kan luah dun a ni. Saji chuan dawhkan a ka Phantom/Mandrake comics chu a chhiar nghal chat a,a kawm a ka hming ziak a hmuh rual in ‘Hnamte i ni ve a law?’ a ti he haw a.chumi zan atang chuan kan inthlah tawhlo a ni ber.Ka Diary ah phei chuan Saji hming hi khami zan atang kha chuan a lang cham chi tawh mai a ni.Tichuan heta tang hian Saji,Pamama leh Zira Hnamte te nen inkawp chho zelin hla kan phuah ho a,kan zai ho a,vanglai kan chen a ni ve ber e.Liandailova Chhangte(L) in a sak lar ‘Chen Ang Vanglaini’ tih hla hi hetia kan inkawp chhoh tantirh October 1973 khan Zira Hnamte in kan thian zaho hla atan a phuah a ni a,a thluk hi Saji nen guitar a kan zawn dun a ni thung.A hla chang bul hawrawp mal tin chhiar thlak hian  kan thian zaho hming Zira,Saji,Rama,Rina(Pamama) tiin a chhiar thlak theih a ni.Khang hun lai te kha a va ngaihawm ta em!Zira Hnamte leh Pamama ten Zorama min haw san hnuin Saji,Lalnunmawia(Valtea),Duhzuala leh C.T.Ngura te nen inkawp chho zelin kan zai ho in hla kan phuah ho zel a.Uang pui chang suh ila,khatih lai a Shillong Mizote zingah na na na kha chuan hriat kan hlawh ve hle thin.Tihpui a awm tawh phawt chuan kan zai ve deuh reng mai.Radio artiste kan ni deuh vek a,radio ah kan zai a,kan in pui tawn a,hla kan in phuah pui a,tingtang kan in perh sak a,kan hmanraw neih ang hollow guitar leh dekchi chhin te nen thleng in kan ri ve tlak tlak thin.Hetih hun lai a kan hollow guitar hman lar em em chu a hmel en a tlawm tak,tha zet si,zaithiam lar hmasa Zova leh Mea te pawhin an lo hman fo tawh thin kha a ni.He ta Mea tih hi Thanliana a ni a,Thanliana leh a pawlte tiin radio ah an zai a,memberte chu amah Thanliana bakah Joseph Zokunga(L),Remmawia leh Kaia Paihte te an ni a,The Agents ti a hriat an ni bawk thin.1980 April thla thleng khan he guitar hi ka kawl a,Shillong ka chhuahsan hnu khan Pu V.Ramngena(L),ka thenawm pa thin khan ‘He guitar atang hian Mizo hla engzat nge chhuak tawh research ka bei dawn’ tiin a la chho ta a.A chhui chhuah hma in a boral ve leh ta mai a,a results hriat a chakawm teh reng nen a hriat theih ta loh a ni,a pawi hle.A ni tak a,kha guitar,a hmel en a tlawm tak atang khan tunlai Mizo hla hi a chhuak tam viau mai thei e.Sawi hmaih loh tur chu heng hun lai hian Lalbiakdika Hnamte(L),Saji nau,thangtharte hriat theih turin TV a thupuan thiam Priscila Hnamte pa  hi, kan zingah a chetla ve fo bawk a,hlaphuah thiam,zaithiam leh guitar thiam a ni a,min puibawm nasa hle thin.

     Kan tleirawl/tlangval lai a inkawm ngang kan ni a,nula kan rim ho in eng no no emaw te pawh kan dawm ho thin a,no dawm bakah ruihhlo dang erawh chu kan khawih ngai miah thung lo.Zan khat chu Shillong veng pakhat Cleve Colony ah Saji nen a bialnu kan rim dawn a.He nula hi a chhelo bawk a,a duh pawh a duh hle in ka hria.Keini student rethei takte tan chuan an in leh lote kha a ropui bawk a,len luh mai pawh  kha a zamawm viau reng a.Chumi zan chuan an in kan thlen dawn khan a ek a chhuak ta tlat a, a han inthiar leh rih a!A zan leh ah pawh chuan a ngai te in a ek a chhuak leh tlat a,kan nui nasa thei hle thin.Nula rim dawn in a ek a chhuak ziah pawh a ni bik lo,kha nula ber kher kha chu huhang a ngah in a husual a na deuh pawh a ni mah na.Hemi hnu hian nula dang,a duhzawng tak pawh kan rim fo,a ek a chhuah ka hre tawh ngailo.He nula hi chu a tha ve bawk a,amah vang hian hla 3 ai a tam mah chu a piangin ka hria,a phurh zawh loh tawp tur zun lo phurh tirtu kha a ni tlat a lawm,kan buaipui teh thin a nia.. Thaimami nu nen zing dar 2 vel a Pine View Cottage bul a Thaimami inchuh a kan in pawh laih laih laite kha ngaihawm lutuk nilo mahse mitthla ah a lo lang uar uar bawk mai.

No hi kan dawm ho ve zeuh zeuh e ka tih kha.Kan zai reng rengin Saji hi kan lead guitarist a ni thin a,Zira Hnamte hi kan vocals niin kei hian bass(hollow) ka perh a,Pamama’n dekchi chin leh khawn rik theih ang ang a khawng ri thin.1974 khan kan zing a radio artiste tling hmasa ber  Zira Hnamte in AIR Shillong ah contract a hmu a,kan zir ve tlut tlut a.Tichuan kan zu record dawn ta.Hetih lai hian Brother Peter-a,Pu Paul Zakhuma fapa kha Don Bosco School ah music in charge a ni a,a ni hian electric guitar set leh drum set min hawh tir a.AIR studio ah Pu P.S.Chongthu(Pu Sena) hmaah kan zu record ve ta.A hma hian kan no dawm kha kan lo duhthawh tlang deuh hlawm a.Saji phei chu a phur viau tawh mai  a. ‘A tawk tawh e,i ti tha theilo ang’ ka va ti dek dek a,a ni lah chuan ‘Tih danglam a ka awm  hian ka play tha thei daih zawk’ a ti  tlat mai si.Kan han record ta, Saji-a’n lead a han zut ta tak tak mai chu,guitar fret 2 te fret 3 ten a zut thelh chho ta,a lai ta ruai ruai mai,Pu P.S.Chongthu(Pu Sena) a meng phawk,mahse a nih dan tur rengah a ngai leh ta nge,a record hmiah hmiah zel mai bawk si.Kan record zo kan va ngaithla chu a lo lai nasa ruai ruai hle mai a,vawi tam kan ti  tha ta hial a lawm.Khulh tam poh leh play nalh tih chu tih mai mai a lo ni e.Hemi tuma kan hla record hi Zoram huap a lar tak tak te pawh a awm ve tho mai.Khati vel kha kan ni a,nuam kan ti in kan hlim ve thin a sin!A va ngaihawm thin em!Hmanlai an lo chang ve ta reng mai!!

    1977 ah AIR Shillong ah Saji nen hian a hla ‘Thuchah Hnuhnung ‘ kha kan record a,kan uluk khawp mai a,a thu mil in mitthi dar ang deuh te kha kan han khawng ri ve a, ‘hit’ kai hle tur pawhin kan beisei a ni.Mahse AIR hotuten an han belchiang a,kan ram buai lai a la ni bawk nen,broadcast ngam lovin an nawt reh leh ta a ni.Tun a a audio CD a mi ai hi chuan tha fe zawkin kei chuan ka hria.Chanchin sawi tur tam tak a awm,Thaimami hla lo pian dan te leh sulhnu dang chhui tur a va tam em!

Kan thian ho hi radio artiste kan ni deuh vek a,recording ah kan in pui tawn in zaithiam dangte pawh kan pui thin a.Khang hun lai a kan hmanraw neih hollow guitar,dekchi chin leh hollow bass guitar te kan hmang tlangpui thin,sapin Skiffle Band an tih ang chiah kha kan ni ve.Studio chhung a piano bang te pawh kan hmang tangkai bawk.Mahni tawk a kan lar ve hnu kha chuan keimahni ho bak chu artiste dang recordingah i pui tawh lovang u,cheng khat pawh kan hlawh ve ngai silo tiin kan in chhuang ve thin a.U Zualbawihi(Lalsangzuali Sailo) a lo zin thlak tawh erawh hi chuan psychology thiam tih takah min ti hliau hliau a,kan pui leh nge nge thin.

    1977 ah Motinagar ah in ka luah a,ka in luah hi ‘Xanadu’ ka ti a,inthlahrunna vak tur a awmlo bawk a,Saji,Lalnunmawia(Valtea),Lalbiakdika Hnamte(L),Duhzuala leh C.T.Ngura te nen zing dar 2 thleng thleng hian kan zai thin a.A tirah chuan kan zai pangai viau a,a rei tawlh tawlh a,kan phur tawlh tawlh bawk a,zanlai velah hi chuan a phuahtu ten duh taka an phuah lengzem leh lenglawng hlate kha lenkhawm zai thlukin guitar hnung lam bengin kan han sa ta mai thin a,thenawmte tan chuan kan ninawm thin ngawt ang.Mahse kan inluahna te Pu Bah Kama leh thenawm dang te khan min sawisel ngai miah lo.December ni 17.12.1977 hian kan thian dangte chuan Zoramah Krismas hmang turin min haw san hlawm tawh a,keini Lalnunmawia,C.T.Ngura nen kan pathumin kan la cham bang a.Hemi zan hian in rawt phurin Shillong veng hrang hranga kan ngamtlakte hnenah kan carol a.C.T.Ngura tingtang tuk chawp leh chhep chher nen lungrun leh lungleng takin Krismas hla kan sa a,kan pathum a a thu kan hriat tlan ber ‘A mi an riang maw..’ tih hla kha kan sa rim hle tih ka la hria.Hemi zan hian Rs 40 kan hlawh a,1977 kum kha chuan Rs 40 chuan thil a la tih theih khawp mai.Kan carol zawh zan rei lamah Nongthymmai field bul a Restaurant lar ve tak Darjeeling Restaurant ah kan han in ti lum leh rih a,zing dar 1 velah kan tin ta a nih kha.Khang lai hunte kha a va lo nuam ta mai mai em,tunah chuan ‘Sulhnu  leh lung ti lengtu’ a chang zo ta si a le,hmanlai an chang zo ta! Amah Saji hla ngei chuan ti hian i han ti tawp teh ang:

                   ‘Ka hril seng nem maw suihlunglen hi,

                     Hman a hlim te a lung kan rual lai;

                     Rihsang mual dan a leng khan rawn ngai ve che maw,

                     Engtin tuar ve maw suihlunglen hi.’ Zir Sangzela Hnamte(circa 1978)

 

RUALBANLOTE NI PUAL IN

Mizoten Rualbanlo kan tih hi saptawngin Disabled people/person an ti a.Tunlai chuan ‘disabled’ pawh ti phal tawh lovin ‘Differently Abled people/person’ an ti tawh nghe nghe a ni. ‘Disabled’ han tih khan thil engmah ti theilo ah kan chhuah lek lek in a lang a,thiam tak a ‘Differently Abled’ an lo ti ta hi a fuh khawp mai.Mizotawng chuan dah dawn ta i la, ‘thil engmah ti theilo ni bik lovin mi pangai tih dan ang lo deuh a an tih theih ti ve theitho’ tihna a ni deuh duah awm e. ‘Disabled’ han tih ngawt dawn chuan Joni Eareckson Tada te hi chuan mi pangai tam tak aiin tih theih a ngah zawk fe si awm e,chuvangin ‘Differently Abled’ tih hi a dik riau a ni..Pianphung a rualbanlo han tih hian pian tirh atang a rualbanlo sa te,accident avanga rualban zo talo te pawh an awm a.Rualbanlo te hi khawvel sorkar hrang hrangte hian an ngai pawimawh em em a,an pualin khawvel ram hrang hrangte hman turin December ni 3 hi Rualbanlote Ni, ‘World Disability Day’ ah an lo puang ta hial a nih hi.India sorkar emaw Mizoram sorkar emaw in engtin nge he ni hi an hman dawn chu ka hrelo a,helam pang a mawhphurtu pawl te pawh an awm a,programme te pawh an duang turah ngai mai ila.He ni pual hian khawvel pum huap mi lar tak tak,mahse ‘Pianphung a rualbanlo’ kan tih ang chi ni si te chung chang tlem ka han ziak ve a ni.

Mizote hi tun pianphung a rualbanlo leh mi anglo kan tih ang chi ho chhawnchhaih a bawlzan ching tak hnam kan ni thin a,a pawi hle.Tlem a huihphai deuh bawl a,bawl at zual te pawh kan nei thin.Tunah erawh chuan kan lo harh chhuak ve ta a, in bawl ai chuan khawngaihna nen a an mahni chhawmdawl duhna thinlung kan lo nei ta hle a,a Kristian in a Mizo khawp mai.Khawvel pum huap chu sawi loh Mizo zingah pawh rualbanlo lehkha thiam sang tak tak,mitdel chung a MA passed te,infiamna lam a thei tak tak te pawh sawi tur an awm nual ta mai..

Joni Eareckson hi kum 17 lek  a nih laiin a tui chenna ah a chesual hlauh mai a,a ring ruh a sawh tliak a,a taksa pum a zeng ta vek a,a lu chiah che theiin a dam chhungin wheel chair ah a thut a ngai ta a ni. A chetsual hma hian Pathian hnenah a nun thlak danglam ngai a awm chuan thlak danglam turin a tawngtai thin a.Chutia mu reng leh wheel chair hmanga che vel thei chauh a han ni ta mai chu a tawngtaina Pathianin a chhan dan em ni dawn tih a ngaihtuah nasa mai a.Chutia a in ngaihtuahna atang chuan a lo harh chhuak ta a ni..A taksa dang che theilo mahse a lu a chet thei a,a mit leh beng a tha a,a tawng thei bawk a,a ka,a lei leh ha te engkim a tha vek. Pathian hnenah inkawl tir thar lehin harh tharna a lo chang leh ta.Wheel chair a thu chungin Pathian hmangaihna thu a puang chhuak a, Joni chu Pathian thusawitu lar tak a lo ni ta mai. Chumai a la nilo,a ka leh ha te hmang tangkaiin lemziaktu ropui leh lar tak a lo ni ta bawk.Lemziahna brush chu seh kawh in kut ke kim nei te aimah a mawi leh nalh in lemziak a lo thiam leh ta.A lemziak(painting) te chu man man tak takin an hralh a,a lem ziak hmangin mi thinlungah thu a sawi ta bawk.Chu mai a la nilo cheu.Joni hian lehkhabu a ziaka ni satliah mai lova,lehkhabu hralh tla tak tak a ziak a,a lehkhabute chu best seller an tihte a ni nawk mai.Lehkhabu hi 30 chuang a ziak a ni.Lemchan thiam a la ni cheu bawk. ‘Joni and Friends’ invuah in Ministry a din bawk a,pianphung a rual banlo te zingah uar takin rawng an bawl bawk.

Joni hian Award chi hrang hrang a dawng tam hle a,University leh College  hrang hrang atangin Honorary doctorate degree 5 leh Bachelor of Letters a dawng bawk.Duh se chu a hming bulah Dr. a dah tam thei hle dawn a nih hi!!1982 khan kum 32 mi niin Ken Tada nen in neiin Pathian rawng an bawl dun a.April ni 1,2009 khan Indiana Wesleyan University Society of World Changers ah lawmluh(inducted)  a ni a,hemi tum hian Honorary Doctorate degree an hlan nghal nghe nghe a ni.

  Helen Keller pawh hi Joni Eareckson ang deuh bawk a rualbanlo a ni.A mit a thalo a,a beng a thalo bawk.Lehkhabu 14 a ziak a,articles tam tak a ziak bawk a,mitdelte leh pianphung a rualbanlo te pualin lecture pe in khawvel a hrut chhuak hial a,rualbanloh vang a mi beidawngte hnenah beiseina thar leh tumruhna a pe nasa hle a ni.

Stephen Hawking hi kan hre theuh ang,kum 21 a tlin hnu lawk 1963 khan natna khirh tak,hriatna thazam khawih chhe chi,motor neurone disease an tih Amytrophic Lateral Sclerosis (ALS) a vei tih hmuhchhuah a ni.a natna avang chuan wheel chair a nawr ngai,computer hmang a tawng thei chauh a ni ta.Mahse khawvel a scientist ropui berte zing a mi a nih bakah a lehkhabu ‘A Brief History of Time’chu Science khawvelah ngaihsan a hlawh tak a ni.Khawl hmang a tawngin lecture pek a thulh chuanglo. Greek mifing leh hlaphuah thiam ‘The Illiad leh the Odyssey’ ziaktu Homer hi mitdel niin an sawi bawk.Hmeichhe huaisen Joan of Arc kha phungzawl(epileptic) ching ni a sawi a ni bawk.Zaithiam lar chuai theilo Elton John hi mit chhe uchuak tak a nih bakah epileptic a sawi a ni ve bawk.

English poet lar tak John Milton pawh hi kum 43 a tlin hnuah a mit a del a.A mitdel hnu pawh in hlaphuah leh thuziah a bansan chuanglo.A thuziak lar tak ‘Paradise Lost’ pawh hi a mitdel hnu a a ziak a ni.German composer lar tak Ludwig van Beethoven pawh hi kum 28 a nih in a beng a ngawng a,mahse a beng ngawn vangin a hlaphuah a thulh chuang lo.

 Incredible Hulk film serial a lo chang tawh thin Lou Ferrigno hi bengngawng a ni bawk.Novel tam tak lo ziak tawh,a ziak zing a hriat hlawh tak pawh ‘Madame Bovary’ lar puitu Gustave Flaubert hi epileptic a ni bawk.Film star lar Michael J.Fox pawh hi neuromuscular(hriatna thazam leh tihrawl) natna vei a ni.Chutiang in The Messiah phuahtu George Frederick Handel leh hmanlai General ropui Hannibal te pawh kha epileptic an ni bawk.

Pianphung a rualbanlo han tih hian taksa a lang chhuak khawp a piangsual kher lo,bengngawng(bengngawng han tih hian bengchhet tihna te pawh a ni tih hria ila),mitdel,phungzawl nei leh a dangte pawh huam vek ta ila.Zaithiam Jose Feliciano hi mitdel a ni.Grammy Awards 6 a dawng tawh a,Grammy nomination 11 zet a hmu bawk.1973 khan Best Folk Guitarist Award chu Guitar Player Magazine in a lo hlan tawh bawk.African American zaithiam Stevie Wonder hi chu Zofaten ‘I Just call To Say I Love You’ hla avang pawh hian kan hre deuh vek awm e.A ni pawh hi mitdel a ni a,chuti chung chuan pianphung pangai zaithiam tam tak aiin rimawi khawvelah a hlawhtling a nih hi.

Tunlai zaithiam lar tak Michael Bolton pawh hi a beng lehlam ngawng niin an sawi.Soft rock hla lar pui em em tu Michael Bolton hi a beng lehlam chhet mahse a aw a lai chuanglo va,a zaithiamna a chuai chuanglo,album pawh maktaduai 53 teh meuh a

hralh a ni.

Zaithiam lam han hrut zel ila.Jeff Healey Band lar tak mai a an guitarist leh vocalist Jeff Healey pawh hi mitdel a ni,mahse an band lar zia leh amah mimal pawh a lar zia chu an band hming a a hming an hman danah hian a chiang reng mai.Jeff Healey hi kum 2008,March ni 2 khan a lo boral tawh nghe nghe a ni.

African American jazz singer lar tak Ray Charles pawh hi kum 7 a nih atangin a mit a del a,mahse chu chuan rimawi khawvel a a tuina a hmet mit zo chuanglo.Jazz  leh soul singer lar tak,khawvel hriat niin gospel hlate pawh tam tak a record a ni.Kum 73 mi niin ni 10.6.2004 a ni pawh a lo boral tawh bawk.

Country singer lar tak,lung kuai em em a zai thin Ronnie Milsap hi piantirh ata mitdel a ni.Chuti chung chuan rimawi khawvelah a hlawhtling berte zing a mi niin Grammy Award winner a ni bawk

Fakna hla(hymn) tha tak tak phuahtu Fanny Crosby hi thla 6 mi lek a la nih laiin damlohna avangin a mit a del a.Nikhua a lo hriat hnu pawhin a mit a del avangin vawikhat mah a vui lo an ti.School te kalin lehkha a zir a,zirtirtuah te tangin English leh History a zirtir thin nghe nghe a ni.Kristian hla 9000 zet a phuah a,a hun lai chuan ‘Hymn Queen’ an ti hial a ni.Kan hlabu ah pawh a hlaphuah tam tak kan seng lut nghe nghe anih hi.Vawikhat chu pastor pakhatin Pathianin talent tha tak tak a pek rualin a mit a del tlat mai pawi a tih pui thu a hrilh ngawt mai a.Fanny chuan rang zet in ‘Khai mai mai thin a,ka pian tirh khan Pathian hnenah thil dil dawn ta ila,mitdel hi ka dil ang,’ a ti daih mai.Pastor in engvang maw ti a a zawh chuan, ‘Vanram ka thlen huna ka mit ka men hun ah ka Chhandamtu hmuh hmasak ber ka duh a,chu hun ka ngaihtuah chuan he dam chhung a mitdel a awm mai mai te chu engah mah ka ngailo,Chhandamtu hmuh hlan ka nghakhlel ber mai,’tiin a chhang a ni.

Fanny hian hlaphuah mai bakah lehkhabu tha tak tak engemaw zat a ziak bawk.Kum 95 mi niin 12.2.1915 khan kumkhua a a chhandamtu kiang a mitvar a awm tawh turin khawvel a lo chhuahsan tawh a ni.

Chicago a pianphung a rualbanlo pakhat chu mitdel a nih mai bakah kut leh ke a neilo bawk.Ringtu tha tak a ni a,a chantawkah a lungawi em em.Kut leh ke neilo mahse Bible chhiar ve theih a duh si a,mitdelten kut a khawih a an  chhiar theih chi Braille hawrawp a zir ta a.Kut a neih siloh avangin a leiin Braille hawrawp chu liakin a zir ta a ni.Tichuan a lei hmangin Braille Bible a lo chhiar thei ta a,mi tam tak hnenah Pathian thu a hrilh theih mai bakah nitin Pathian thu chhiarin Pathian a pawl thei ta a ni.

Mizo zingah pawh pianphung a rualbanlo sawi tur an awm nual kan tih tawh kha.Pu Zadawla.Pathianthu hriltu lar tak pawh hi piantirh a ta mitdel niin an sawi.Mitvar nazawng aiin Pathian lehkhabu chhung thu,bung leh chang chu a hre daih zawk a,a thusawi atanga piangthar tam tak an awm a,a rawngbawlna a nun gem em a ni.

Pu Lalsangluaia Sailo, Samlukhai lal fapa hi a tet laiin zeng hri mak takin a man a,hnungzang pawng in tiang tawite hawlin kun in a kal thei a,.Thluak tha tak a nih avang leh lehkhathiam a nih avangin Tlabung khuaah Primary School a din a,Pu Luaia School tih a ni thin.A school naupangte chu an ziak a mawi a,chhiarkawp an thiam em em bawk a,a zirtir chhuah mithiam tam tak an chhuak a ni.

Awle,pianphung a rualbanlo te hi mi pangai kan tih tam takte ai a rualban zawk an tam mai a lo ni.Vawiin a pianphung a rualban loh vang a lungngai a kun rengte pawhin tum ruhna nen chuan he rualbanlohna hi hneh theih a ni tih hre thar lehin kumin Rualbanlote Ni(World Disability Day) hi hnehna puanna ni atan hmangin ‘Disable’ ni tawh lovin ‘Differently Able’ nih tumin tan lak thar leh nan hmang ngei ang u.Mi fate pawhin an tih theih chu kan ti ve thei ngei dawn lo’m ni?

RINAWMNA LEH ZO KRISTIAN-TE

 

Mizote hi tunhma chuan hnam rinawm,huaisen leh tlawmngai a sawi kan ni thin a.Mahse tunhnu hian rinawm,huaisen leh tlawmngai a in chhal fo ngam tur kan ni em tih te hi ngaihtuah tham tak a ni ta tlat mai.Tlawmngaihna chung changah hi chuan kan la chhuanawm viau chuan a lang a,mahse hmanlai kha chu a tluk ta lo deuh in phutchhuah tlawmngaihna te pawh a ang dawn dawn ta in a ngaih theih awm e. YMA hi awm ta lo se,he Mizo tlawmngaihna kan tih fo hi tun ang hian a la nung ang em tih pawh hi ngaihtuah tham a ni bawk.Rinawmna leh huaisenna chung changah phei hi chuan tunhma kan pha ta lo leh zual hle.Kan rinawmloh zia sawi tur tam tak a awm laiin kan rinawmna lam hi chu tlemte chu sawi tur a awm ve ta chauh mai.Huaisen chung changah pawh tunhma kha chuan hnam huaisen chu kan ni ngei thin e,Indopui 2-na lai hun te thleng pawh khan kan Mizo sipaite kha huaisen a sawi an ni fo.Mahse kan ram a lo buai a vai sipai kan han hmachhawn chiah atang khan he hnam huaisen tak thin kha a lo huaisen lutuk ta lo ni te hian ka hre ve thin.Vai sipai kan hlau em em a,a hnuah phei chuan kan lo ngam ve viau thin vai naran pawh kan ngam ta manglo zui a, Zoram pawnah phei chuan a tam zawk chu kan ti duk tawh mai a nih ber hi.Chuvangin Mizoten thupui bera kan neih tak fo chu ‘Hmanah chuan….’ tih kha a ni tawh ber mai a nih hi maw. ‘Hmanah chuan hnam huai,rinawm leh tlawmngai kan ni’ tih hi kan thupui a nih reng fo dawn chuan hma lam hun a englo viau ang le.

                                                                                                                                                            Tunhma kum 30 ai a tam mah  liamta ah khan Zo hnahthlak mi pakhat Shillongah khuan a awm a,an sawi danin  matric/BA pass lo te pawh khan chupa hnen atang chuan marksheet/certificate lem  leiin tha tak takah an pass leh mai thin an ti a.Sorkar beng pawh a thleng a ni ang,heng certificate lem nei ho hi thawkkhat lai kha chuan an man nual mai. Tunlai chuan markshheet chungchangah chuan hetiang hi a awm tawh lo turah ngai ila,he pa pawh hi khawnge a awm pawh kan hre tawh lo bawk a,a reh fel hmiah tawh ni hmiang ka ti mai a.He marksheet lem zuartu hi Mizo Kristian a ni a,kohhranah pawh member a ni.A marksheet lem leitu tam berte pawh kha Mizo Kristian tho an ni.Khang marksheet lem leitu thenkhat kha keipawh in hriat ka nei ve.Tunhnu deuh a che buai fe fe leh,jail a tang ta hial pawh an awm a ni. Khatiang marksheet lem lei leh hralh kha Mizo Kristiante zingah a reh hmiah tawh emaw kan tih laiin he article ka ziah mek lai a Zonet Fakselna Huangah chuan mi pakhatin IT Department ah Certificate lem hmang a hna thawk an awm ni awm in a rawn tarlang leh tlat mai.Certificate lem chung changah ringawt pawh Mizo Kristiante hian rinawmna kan tlakchham zia chu sawi tur a awm nual mai a nih hi.

            Tunhma a hnam rinawm,kawngkapui pawh thingfak a do mai thin,rukru leh misual rinawmlo ten hmun an chan ngailohna Mizo hnam kha khawvel lo changkang zelah hian hnam rinawm a hriat kan nih thinna a bo ta hle mai.Nuihza siam nan a an hman thin mai phei chu a ni na in,Mizo chartin ai a vai chartin a tling zawk te,Mizo cubic lung ai a vai ringlomite cubic lung a tling ta zawk a an sawi thinte hi dawt a nilo a sin.Fiamthu phenah hian thutak a awm thin.

            Ka chanchinbu lak ve, ka dah that ho ka han ching chhuak a.Hetih hun lai a front page luah chanchin thenkhat chu han tarlang mai mai ila:ACB in …..Director la,bail in chhuak nghal,Buhfai hralh ruk chingte hrem tum(The Aizawl Post ni 3.8.2010),Chiahpuam thubuaiah mi 9759 in hnamhnawih,Mizoramah Bank lem 21 awm(The Zozam Times 13.7.2010),Chiahpuam sum nuai 40 man belh(Zalen ni 18.7.2010),Melriat ah buhfai hralh ruk man(Tawrh Bawm ni 21.7.2010),Medical certificate ringhlel,Bank sum tih chingpen thuah Dy.Manager man,Supply tih chingpen tih tawp tumin tan la mek(The Aizawl Post ni 27.7.2010),Pawisa telna inbumna laka fimkhur turin RBI in mipui chah,Buhfai hralhruk kaihhnawih ah man(The Aizawl Post ni 18.8.2010),Mizoram 4534,99,830.139 Sq.Km in a zau belh(Evening Post ni 20.7.2010),Dan bawhchhia a electric hmang ru 350 man an ni(Zalen ni 12.9.2010).A dang pawh a tam mai a,chanchinbu a mi zawng zawng chu kan tarlang senglo ang.Mizoram sq.km a a zau belh tih hi a awmzia chu inhmun lo ram enkawltu lam in LSC a pek thuah nasat lutuk vang a ni ber a.Hei pawh hi dawt a thil tih a tam vang a ni.Kan LSC neih zawng zawng atanga chhut hian kan ram hi khiti khawp a zau khi a ni daih a,mahse a tak takah chuan khi ai khian a zim hle si a ni tih lan nan ka han tar chhuak ve a ni.Kum 2010 hnu lam chanchinbu a ka hmuh zawng zawng phei chu tarlan sen a nilo a,ka tarlang lo law law mai.

            Mizo Kristianten rinawmna kan tlakchham zia ti lang chiang em em pakhat leh chu kan population ai a nuai 2 zet a kan ration card a tam tih an han hmuchhuak te hi a ni,a va zahthlak em!Kan duham na lutukah hian khua kan hmu tawh lo a,ration card kan siam in kan chhungkaw member ni hleilo te kan telh hrehlo a,kan member thi tawhte thlengin rei tak kan telh thin a nih hi.

            Bazarah han kal ila,kan sa duh zawng leh thlai duhzawng pawh kan lei tha ngam tawhlo a ni ber a.Chakai ni se tur a hrai a nih kan ringhlel a,sangha rep ni se chuti bawk.Mizo Kristian theuh theuh tumah hi kan in ring zo tawhlo a ni ber e.Hei hi eng dang vang mah a nilo,kan rinawm loh em vang a ni.Lunglei bul a De lui chengkawl saw a tui an ti a,Lunglei khawpui a chengkawl zuar tawh phawt chu khawi chengkawl nge tih han zawt ila, ‘De chengkawl’ an ti deuh vek mai,mahse a tam zawk chu a ni teuh silo.Kan thil kan hralh theih na tur a nih phawt chuan Mizo Kristiante hian dawt sawi pawh kan hreh tawhlo a nih hi.Balhla hmin ang a lang nazawng pawh hi damdawi hmang a hmin ang a lan tir,a chhung erawh hmin silo a ni ta fo bawk.Hetiang hi khaw karkawng thil zawhnaah a hluar bik.Kan sa zuar thenkhatte lah chuan sa hrisello leh duk dak manglo pawh a leitu in kan hriat dawn loh chuan an hralh hreh tawhlo a,heng mite pawh hi an veng kohhranah chuan kohhran member an ni ve vek tho.

            Mizo Kristian,1980 hma lam a sorkar hnathawk tam berte kha chu kan pian kumah kan daw vek a,kan kum tak aiin kan naupang deuh vek.Heihi a chhan chu khang hun lai khan kan zirtirtute khan matric kan pass khan an rin ang ang khan kan kum an lo dah in,an lo ti naupang tlangpui a.Chu chu kan ring ta mai a,a diklo tih kan hriat hnu pawhin tih dik tum kan awm chuang lemlo.Thenkhat phei chuan remchang hmu ila,kan in ti naupang duh reng niin a lang.Hetiang a a ruk a pension/retire har duh vang a kum tih naupan tum a ‘file’ lo ti khawlo te pawh kan rual u te khan an sawi ka hre tawh a ni.Chutiang ti tute pawh chu Mizo Kristian tho an ni.Sawi tawh ang khan kan pian ni leh kum a dawt kan sawi deuh vek avang hian sorkar hnathawh kawngah kan pension/retire hun tur aia tlaiah kan pension/retire vek a,chumi awmzia chu sorkar pawisa leh hun kan eiru a,kan hnuaia mite promotion tur thlengin kan dang thin a nih hi.Hemi chungchangah hian Pu Saingenga,P.U.College,Aizawl, Principal thin kha a fakawm hle.A pianni diklo a ziak a nih ve tho avangin a pension/retire hun tur aia hmaah,a pian kum dik tak atanga chhut a a pension/retire hun tur kum diktakah a pension/retire  ngam a ni.Ni,Mizo zingah chuan Kristian dik tak ni chunga sorkar hnathawhte hi a harsa a,thil diklo,a lian emaw a te emaw tih ngai deuh tlat hian a lang a,engemaw han ziahbo maite kha a lo tul thin tak a,dik taka thil tih tum tan harsatna chin a awm tlat thin ni in a lang. Missionary ni mek Khawtinkhuma chu Health Worker a ni thin a,a pianthar veleh Kristian piangthar tan sorkar hna dik taka thawh har em a a hriat avangin a hna a bansan a,full time in Missionary a tan a in pe hmiah mai tih an sawi ka hria a,ropui ka ti hle mai.Amaherawh chu Mizo Kristian sorkar hna thawk te hian diklo takin thil an ti vek a,sorkar hna thawk tlak an nilo tihna zawng a ni love,mi fel leh rinawm chu an awm teh meuh,a tam erawh chu an tam lutuk lo a ni mahna.

            Hman deuh khan khawizu lem te,ha tih faina lem te grep wine lem thleng a zuar a mi bum an awm thin a.Khang an thil lem zawrh te kha taksa hriselna atan a hlauhawm tak vek an ni.Khang zuartute kha Mizo Kristian tho an ni.Kan zu zuar hote pawh hian an hlawkna tur a nih dawn phawt chuan an zu siamah thil thalo telh an hrehlo niin a lang.Anmahni dawr thintute kha thi thuai mahse pawi an tilo a niang,an hlawk dawn phawt chuan.Hetiang titute hi Mizo Kristian te tho an ni a,an vengah kohhran member an ni ve vek tho.Mizo Kristian,Lalpa zawnchhuah ram a cheng inti leh Pathian hnam thlan ni a in ngaite hi kan Pathian rinawm tak lakah hian kan rinawm hlawllo a,kan Pathian hi kan ti mualpho tak zet a ni tih hi kan ngaihtuah ngai em aw?

            Kan rinawmloh avangin sorkar in a hnathawkte tan a Leave Travel Concession(LTC) a siamsak thin pawh tih tawp sak kan ni daih tawh.Silchar leh Shillong thleng chauh a kalte pawhin Kanyakumari thleng a TA kan bill zel vangte kha a ni ber ang.Thenkhat phei chu station chhuahsan miahlo a bill te pawh an awm a ni.MR Bill a sorkar a strict em em na chhan pawh hi ‘dawt MR’ a tam vang a ni tih kan hria.Kan TA/DA bill dan hrim hrimah pawh kan rinawmlo,kohhran upa meuhte pawh an fihlim chuanglo awm e.Thlarau MR(Muster Roll) te pawh kan sawi thin kha,kan la hria em?A mak a ni ti rawh u.Kan sorkar NLUP pekchhuah kawng a a fimkhur em em pawh hi a demawm loh,kan ram hruaitute hi kan rinawmloh zia hrechiangtu  an ni tlat a lawm.Revenue Dept. a inhmun lo ram in pekthuah a awm fo mai te,inhmun awm tak taklo hralh a ni thinte hi tu te tih nge?Kohhran a lawi ve tho te an ni lo’m ni? Eiruk thubuai avanga sorkar hnathawk,officer leh officer lo te pawh suspend an va tam em!ACB te hian chhui tur an va ngah em!An chhui senglo a nih ber hi.Engatinge interim bail leh anticipatory bail tih te hi mi nazawngin kan hriat bel tak hlei hlui mai le?Krista zuitu,Mizo Kristiante,miin rinawm tur a an ngaihte kan rinawm loh vang a ni tih hi phat rual em ni dawn?

In en chian kan ngai e : A nawlpui hi chuan rinawmna kan tlachham a ni e,zep thu a chenglo.Heti te chuan engtin nge kan vel a ringlo mite hi Krista hnenah kan hruai theih teh lul ang le?Kan vel a ringlo mite hian kan nun an thlir a,kan nun an chhiar a sin!Lunglei vai dawrkai hlun Pu Birena chuan Kristian nih tul a tilo,kan danglamna a hmulo a,kan rinawmna aiin kan rinawmlohna a hmu tam zawk tih min hrilh. College a ka thawh pui thin S.K.Prasad chuan ‘Kristian nih hi a tulna ka hrelo,in thusawi thin leh in nun dan a in anglo,in danglamna ka hmulo’ a ti. In enchian kan ngai khawp mai.Ringlo miten kan that bikna leh kan rinawm bikna an hmulo a ni.Pathian rawngbawl a tei chhuak thinte pawh an bang chuanglo.Hmanah Speaker lar takin Crusade na a zai tur a a hruai thin,kan lo mikhual ve tawh chuan a pa damlo phaiu hruaina tur sum an mamawh avangin pukah min dil a,ka neih zawng zawng aia tam puk chawpin ka pe a,kum 9 a liam ta,a hmel ka hmu leh tawh ngailo.Kha mi kha rawngbawl a Pathian faka zai thin a ni.Pathian in a tih thianghlim a chhal a,tui damdawi hmang a Aizawl Electric veng a rawngbawl thin pawh kha a tak takah chuan zu rui thin,hmeichhia a hmuh fal a khawih duh mai thin a lo ni a,police in an man ta nghe nghe.A Lalpa lakah a rinawmlo a,ringtute a la bum zui a nih kha.

            Sawi hmaih hauh loh tur chu chiahpuam puakkeh ta kha mawle.Chiahpuamah khan Mizo Kristiante sum leh pai leh hausak thut duh vanga kan rinawmloh zia chu a lang nasa hle.Hei bakah RBI meuhin Bank leh Financial Institution lem a a puan neitu leh buaipuitu Mizo Kristiante zing a kan lo awm ve nuk maite khan kan hausak phah dawn phawt chuan kan hnam pui leh kan Kristian puite chu bum hlum thak pawh pawi ti lo khawpin kan duham in kan lo rinawmlo a ni tih a ti lang chiang hle a nih kha.

            Mipat hmeichhiat hman diklohna,uirena sual lo tam ta em em mai te pawh hi Mizo Kristian rinawm chu ni tlat fo ila chu he tiang em em hian a punlun lo tur.A zir mite sawi dan in Aizawl khawpuiah ringawt pawh hian mipat hmeichhiatna lama rinawmlohna avanga nupa hlimlo leh inthen hial pawh tam tak an awm tawh an ti a ni.

            Kan rinawm lohna langsar tak pakhat dang leh chu inkhelh nikhua ah,under 20,under 15 tih velah hian kan kumah dawt kan sawi nasa thin hle bawk mai.Hengte hi chu kum dik tak hian ti mai theuh ila,a tha mai tur hi a ni a.Under 20 a khel zingah han en reng reng a kum 20 pel tawh tih hriat rengte kan han lim tir puat puat thin mai hi chu a zahthlak a ni.Complaint awm mahse under 20 a nihna certificate lem kha a lo nei khiau zel mai bawk si.Birth Certificate te pawh hi a lem a lo awm leh zel a,pian kum mai ni lovin pianna hmun thlengin a thiamte chuan an lo ti danglam leh mai zel bawk.A lem lem khawvel kan buaipui em avang hian Mizo Kristiante hi kan lem vek tawh a,ringtute mize zahawm ber pakhat rinawmna pawh hi a tam zawk chuan kan bosal tial tial chu a nih hi,in enchian kan ngai a ni. ‘Hmanah chuan Mizo te hi hnam rinawm kan ni’ ti a thawnthu sawi mai mai lovin hawh u,Mizo hnam rinawmna,ringtu kan nih hma daih a kan lo chawi vul thin kha tun a ringtu kan nih tawh hnu hian i chawi vul thar leh ang u,tichuan Mizo rinawm,Kristian rinawm kan lo ni leh dawn nia.

Bei nge sei Run dung le : Mahse ngaiteh, thahnem ngaih luatah a thim lam hlir kan ziak a.Mizo Kristiante zingah hian rinawm tak tak,Baala hma a thingthi ngailo chu an la tam mai,beidawng lutuk lovang u.Kan local TV ah leh kan nitin chanchinbuah te pawisa tam tham tak bo char thute,taxi a thil theihnghilh taxi pu in a pek let leh te leh thil dang tamtak pawh a awm a nia.Mizo thisen ah hian rinawmna leh tlawmngaihna chu a la awm tlat a.Khawvel thang zel vang a sum leh pai itna,nawmsak leh hausak thut duh vanga mi thenkhat, chu rinawmna hmet mit ta mai  chu an awm thin vang in rinawm ta lo lutuk in kan lang pawh a ni thei e.I beidawng lutuk lovang u.Kristian kan nihna nen a kal kawp tlat ‘rinawmna’ vawng nung leh tur hian kan Pathian i dil ang u,tichuan he hnam hi ‘Hnam rinawm’ tiin khawvel in min hre leh ngei ang tih ka ring tlat a ni.Kristian kan nih ang ngei hian kan nihna hi a takin lan tir ila,chutiang a kan tih chuan rinawmloh pawh tum ila,kan rinawmlo theilo ang.Tichuan kan contract hna chhe tak tak thin te,kan kawnglaih belhchian dawllo tak tak leh kan kawng rawra phah leh alkatra luan chhia leh tlolo tak takte,contract a kan in sak chhe hma leh tlolo tak takte hi Mizo Kristian in rinawmna nen a a thawh hunah chuan a chhe tawh lo ang a,belhchian a lo dawl tawh ang a,a lo tlo em em tawh bawk dawn a ni.

 

Hallelui rual rawhse mual zawng zawng

Zo Krismas hla tha ber pawl, classic tling  pha leh thlarau nun chawm em em ‘Mal Min Sawm Turin’ tih hla phuahtu Patea chuan ‘ A fak hla nawn r’u, Van mipui Seraf-ten; Tuifinriat leh khawvel zawng hi, Zaiin khat se,Halleluia!’ tiin kum 70 vel liam tawhah khan sual fate min tlan tura Pathian Fapa meuh inngaitlawm a khawvel a a lo kal ropui zia chu sawi fiah thiam rual a nilo a,a fak hla sa in tuifinriat leh khawmual zawng zawng hi zaiin khat se, fak a zaiin khawvel hi Halleluia fawn dup dup mai se tiin duhthawh em em in a lo au chhuah pui tawh a ni.

          Tunhma deuh khan chanchinbu thenkhat leh regular taka ka ziah ve thinna Lelte Weekly chanchinbu ah hian kan upa zai thluk mawi leh Zo hliah hliah mai hmang hian Pathian hi fak ve tawh ila, tuna kan fak hla hman mekte pawh hi chawi nung zel tho siin, kan hrawk in a mil zawk dawn bawk si a, kan tui puiin a fuh hle zawk a ka rin thu ka ziak tawh thin a.Mahse khuang pawh Pathian fak nan a rei tak lo hmang duh tawhlo leh sual a lo ngai tlat thin thenkhatte  ngaihdan a lo ni lo em em mai chu niin, na tak tak a khakna te pawh ka dawng ta nual a.Mahse he ka ngaihdan hi a la thi thei miah lo a,Mizo kan ni a,kan Mizo upa zai thluk mawi tak Pathian fak nan a kan iai tlat mai hi ngaih dan dik a ni an gem ? tiin ka la tang fan a. Pathian hian hla thluk ringawt te chu a lo hnualsuat lem dawn em ni? Kan hla tui pui em em pakhat ‘Nangma Thil Ropuite An Sawi’ tih thluk pakhat zawk Biakin-ah pawh kan sak ve fo thin  hi German ho hnam hla thluk tho a ni lawm ni kha ? Kan ngaihtuah chian deuh chu a tha lo maw?

          A tlangpui a ka  rawn dah chhuah khi Kristian sakhua a kal fawr deuh ho,kan biak dan leh hla sak thin pangai duhtawk lo a in tel hrang ta Thiangzau kan tih thinte  hla pakhat a mi a ni.Thenkhat chuan sak pawh kan sak pui duh lo, a uchuak deuhte phei chuan ngaihthlak pawh an ngaihthlak duh loh thin a ni awm e. He hla hi ka hre chhuak lo a,Mizo upa zai chikhat thluk a an phuah a ni tih erawh ka hre ve.A hma a Patea hla kan sawi, kan hla duh leh kan hla chuam, Krismas lai a kan sak rim ber pawl hla thu a kan hmuh ang hian ‘Tuifinriat leh khawvel zawng zawng zaiin khat se,Halleluia !’ tih leh Thiangzau ho hla a kan puh ‘Hallelui rual rawhse mual zawng zawng’ tih hi a eng nge ropui zawk chuang ang aw ka ti thin .Patea’n  tlanna ropui zia a hmu chiang a hla a a remkhawm ta ang hian he Thiangzau hla phuahtu pawh hian Pathian hmangaihna leh chhandamna a buatsaih ropui zia hi a hmu chiang em em a, tlang leh mual zawng zawng hian Pathian fakin HALLELUIA han ti rual hluah hluah mai se,chu chu kan Pathian hian a phu ngawih ngawih a ni a tihna ve tho a ni lawm ni ?Chuti khawp a hla thu ropui leh ril, Pathian in chhandamna min buatsaih sak ropui zia phawk chhuak tha tak chu a thluk avangin kan sa duh ve ta lo a ni mai lo maw? Ka han ti ve a nih hi.

FREDDIE MERCURY- KUM 25 A LIAM TA !

(A HunHnuhnung kha)

24 Nov.1991 a boral ta Farukh Bulsara,Rock rimawi khawvel a Freddie Mercury ti a hriat lar zawk hi hrelo kan vang viau in ka ring. Aizawl khawpuiah pawh Freddie Mercury ngaisangtu pawl pakhat chuan 2012 atang khan Freddie For A Day(FFAD) hun hi an lo hmang tawh thin a, an la chhunzawm ta zel em ka hre lo. FFAD Charity  show te buatsaihin an sum  hmuh  tling khawm chu  Mizoram State Network of Positive People(MISNOPP) hnuaia tanpui ngaite tanpui nan an lo hlan tawh thin a ni.Zofate zingah pawh Freddie Mercury hian a thih hnu pawhin thu a la sawi zel mai.An thlahtute hi Persia(Iran) atanga India a rawn pemlut an ni a,an sakhua Zoroastrianism chu Muslim sakhaw zuitu Iran hote chuan an ngai theilo riau a,sakhaw zalenna ram India ah hian an rawn pem ta rawih mai a ni ber awm e.Amah Freddie pianna hmun tak erawh hi chu Zanzibar,Africa a ni thung a,Bombay a sikul kal a,a tleirawl lai hun hmang a ni.Indian hovin Freddie hi Indian origin a ni an lo ti fo hi a lo dik a nih hi.Khatia AIDS natna a buaipui ruk na kha kum 5 lai a lo ni tawh a,mahse an puangzar miah lo a,a thih dawn darkar 24(ni 2)chiah  la awm khan khawvel hriatah an puang ta chauh a nih kha.

            AIDS natna in an ei tak tak hnu kha chuan pa tawr tha leh hleitling Freddie Mercury chu a thiantha leh laina te tan pawh a awihawmloh khawp in a rawp ral a,a mitmu a tla dek a,a cher em em a,a khum pui,lal khum ang zet a lian leh mawi,satin puan var mawi tak a cheimawi ah chuan Freddie taksa rawp ral mek chu a zal ngat a,a thiantha leh chhungkhat zual tlemte tih loh chuan an tin san vek tawh.A ran vulh,a duat em em Persian zawhte tha chi pawh in a pu bula awm nuam a tih teh lul thin nen,a pu in a kalsan hnai tawh a ni tih a hre ve nge, a inthiar fihlim  tlat mai.Kar hmasa lawka a thiantha zozaite pawh kha an tin zo ta duak bawk.Khang hun lai kha chuan AIDS natna te chu sapho zingah meuh pawh an la zir chian lutuk bikloh avangin an hlau ve nasa a,a hma lawka Freddie chu AIDS vei a nih thu official a puan a han nih takah khan kai ve hlauin an tin san ta duak te pawh a ni mahna. An demawm loh,AIDS te chu a hlauhawm em a lawm.Mahse Freddie tan chuan a va na dawn em ti r’u?Amah enkawltu ber a Doctor pawhin beidawngin a hma lawk darkar khat liam ta khan a chhuah san tawh a,a bialnu hlui Mary Austin pawhin duat leh hmangaih takin a thih dawn darkarah chuan a biangah mittuisur zung zung chunga fawp in chu zan thim rapthlak takah chuan Freddie Mercury chu a chhuahsan ve ta bawk a ni.Freddie Mercury chu London,Kensington hmun a a in lian leh manto,ropui tak a hung khup mai,British Pound Sterling maktaduai 4(Rs maktaduai 360/-) man,bedroom ringawt pawh pariat zet nei,lal in ang mai a ropuiah chuan natna khumah thih  nghakin khawhar takin a zal mek a ni,a va lainat awm em!

            A enkawltu doctor tam tak zinga pakhat Gordon Atkinson chuan chanchinbu mi leh a fans te,pawn a lo nghaktute chu Freddie chu a chatuan hmun panin a kal tan mek a ni tih thu a hrilh a,fans te an ngui nghuai mai,tih theih an nei tawh silo.

            Chu in ropui tak chhung a khum ropui leh nuam takah chuan Freddie Mercury hmel dang bem mai leh cher em em,tunhma Freddie Mercury an na reng reng nei tawh lo chu khawhar takin a zal mek a,a khum bul vel leh a lukham ah te,a pindan banga a thlalak lian pui pui,a vanglai hun thlalak in tar chiai chuai te nen chuan in anna pakhat mah an nei  tawh lo.A thaw a zawi tial tial a,a meng dava riai a, a chau em em ringawt mai a ni.A thian tha leh laina te leh a doctorte meuh pawhin an chhuahsan zo ta.Chu in mantam leh ropui chu a ruak huai mai a ni ber.Mahse a thian tha leh rinawm,englai mah a kalsan ve ngailotu pakhat in a la awmpui,chu pa chu tu dang nilo in sixties hun laia rock band lar em em lo ho tawhtu,a hming chawi a an group hming pawh phuah ngat,drummer a nih bakah an hmuipui pu ber ni bawk thin,Dave Clark Five band hotupa  Dave Clark khan a kut a vuanin a la thutchilh tlat mai.

            Tun ni 2 chhung khan Freddie hian engmah a eiin a in tawh lova,a meng peih chang chang a,zawite te chuan a la tawng peih,mahse nikhua erawh a hre mumal tawh lo.A bedroom ropui tak chei mawi nan a thil hlui manto tak tak(antiques) a lak khawm te,Japanese leh French painting mawi tak tak,to tak tak a a lei a tar-te,a fans ten card leh duhsakna thil dang dang an thawn a khum bula a tar leh dah niai nuai te chuan a lakah awmzia an nei thei tawh lo.Darkar 24 kal ta a a thupuan chhuah,a publicist Roxy Meade-a’n a tar chhuah te chuan awmzia a nei tawh bawk lo,a tlai tawh.Chu a thupuan chu heihi a ni: ‘HIV positive niin AIDS natna ka nei a ni tih hi puan chhuah ka duh em em thin a.Mahse ka chhungkhat laina leh thianthate ka ti chi ai lutuk ang tih ka hlau bawk si,chuvang a zep chu ka ni ber mai.Tunah chuan a hun a lo thleng ta ah ka ngai a,ka thiantha,chhungkhat laina leh fans te zawng zawng hriatah thudik chu ka puang ta a ni.He thu hria a piangin he natna hiuatthlala leh tihbaiawm dona kawngah min thurual pui a hma in lo lak zui zel ka duh tak meuh a ni’  tiin.

            Engtik hunah pawh FreddieMercury chuan khawvel hi a chhuahsan thei reng tawh a ni tih chu hre hlawm teh meuh mahse a then leh rual lainate chuan chuti mai tur chuan an la phal lo.A natna tihbaiawm tak avang chuan a bul hnaia awm thlahlel tak pawh an awm tha ngam tawh lo chung pawh in mual liam mai tur chuan an la phal hlawl lo.Ni hnih khat tal chu min la dam pui ang chu ti a beisei tak a an thlir laiin November ni 24,1991,Pathianni zan dar 7 a lo rik chuan ‘Rock rimawi lalpa’ ti a chhal ve ngam hial khawp a rimawi khawvel chawk danglamtu Freddie Mercury chuan he lei anchhedawng hi hnuchhawn in a chatuan ram a lo pan san ta a ni.Na viau e ti lo chuan a thih mai hi an ring phal hlawm tlat lova,hetih vang hian a band member puite,a thian thate leh a nu leh pa,Jer Bulsara leh Bomi Bulsara te pawh an chenna Feltham atangin an fapa a zual tih hria a lo tlan ve vang vangin a damlai hmel erawh an rawn nang hman ta lo a ni.Ti ti ah chuan a nundan mak tak avang hian a nu leh pate nen hian an in hnim hnai vaklo niin an sawi a,mahse heihi thudiklo a ni awm e,a nu leh pate hian an fa neihchhun Freddie hi an hmangaih in an kan fo niin an sawi.Tih tak takah chuan a nu leh pa,khawthlang culture tui pui lem lo leh rock rimawi khawvel ngai thei vak lemlo tan chuan an fapa hi han belh bul fo chi a nilo pawh a ni ve mahna,dem ngawt chi an ni lovang.

            A boral thu hi hemi zan,zanlaiah khawvel hriatah puan a ni chauh a,hetiang in: ‘Freddie Mercury chu zanin dar 7 khan London a a chenna inah hahdam takin a thi ta.AIDS natna in a thlen awmnapui(broncho-pneumonia) vang a thi a ni’ tiin.Vui liam a nih hnu khan a bula awm reng thin,a dawm hlumtu Dave Clark chuan Freddie chu hlim hmel pu chung a ral ta riai riai niin khawvel hriatah a puang ve leh bawk a, ‘Engmah sawi tawh lovin thlamuang takin a muhil ta a ni ber mai,ram tha zawkah a kal ta a ni’,tiin.                                                                                                A thih dawn hnaih ni 4/5 vel la awm lai khan a natna hi a zual nasa hle a,a mit te a del ti tih a,a thaw a hah em em bawk a.A thian bul hnai tak tak,Elton John,Kenny Everett(radio thupuangtu lar),Queen member ho leh milar tak tak ten an rawn kan a ni.A bialnu hlui Mary Austin pawh hian a enkawl rei ve viau mai.Mary hi a in atanga hla vaklo ah Freddie hian in ropui tak a lei sak nghe nghe a ni. ‘Amah pawh khan a hun tawp a hnai tawh a ni tih chu a hai lo,chuti chung chuan hlim hmel put hram hram kha a tum tlat a,a chang phei chuan fiamthute pawh a thawh thin.Nitin a natna kha a zual zel a,a ei in a in thei tawh lova,mahse a dam chhung hun a hman danah inchhir-na a neih loh thu min hrilh fo mai.Ka inthiarfihlim san dawn khan a biangah ka zu fawp a,a kut ka vuan a,ka hmangaih a ni tih ka hrilh a,ka kalsan ta a ni.Freddie na tuar hmel kha hmuh hreawm ka ti lutuk,khatiang kha ka hmu leh duh tawh ngailo,’ mittui tla per in a ti ve thung.

            Freddie Mercury hi a thih hian kum 45 mi lek a ni.A han thi chiah chu khawvel hmun hrang hrang atangin rock star lar tak tak ten pangpar leh uina thu an rawn thawn nasa kher mai.Chung zingah chuan a band memberte,Brian May,Roger Taylor leh John Deacon te uina thu ziak – ‘Kan chhungkua a member duhawm ber leh ropui ber kan chan ta.Kan lungngaihna hi thu in kan sawi chhuak thiam lo.A dam chhung a a thil tih ropui tak tak te kha kan chhuang a ni.Khang hun hlimawm tak a hova kan hmang thei kha vannei kan va in ti em!’tiin.

            Freddie Mercury hi a thilphal zia an sawi fo thin bawk.A thih atang a ni reilote ah khan a hla,Queen  hla hit ropui ber ni bawk ‘Bohemian Rhapsody’ chu AIDS charity pakhat ‘The Terrence Higgins Trust’ hnenah neitu nihna(rights) a lo pe a ni tih an puang a,he hla an release nawn leh khan copy tam tak hralh leh a ni a,chung a sum lut zawng zawng chu he AIDS Charity ah hian an chhunglut  vek a ni.

            A thih atang a ni li naah Freddie hi London Crematorium ah phum a ni ta a,uina thu(message) leh pangpar tam zia chu sawi in a siak lo a ni ber.

            Kan sawi tawh ang khan Freddie Mercury hi Zoroastrian sakhaw zuitu a ni a,eng sakhua mah hi Freddie te ang chuan an lak thutak vak chu a rinawm lemloh na a,a han thih takah chuan dan anga thil tih a ngai ve tlat si a le.Zoroastrianism sakhua hi khawvel a sakhaw upa pawl tak a ni awm e.Zawlnei Zoroaster(Zarathustra an ti bawk)in BC 1500 a a hmuhchhuah a ni a,khawvel pumah hian he sakhaw zuitu hi mi 120,000 vel chauh awm in Britain ah phei chuan 6000 vel ten tawn chauh an awm a ni.

            Sasaw thing thami a uluk tak a kuang an siam,satin puan a uluk taka an khuh,a chunga rose par sen pakhat chiah an dah ah chuan Freddie Mercury ruang chu zalh in an sakhaw Biakin ah chuan zah takin an zawn lut a.Zoroastrian puithiam rual ho chuan an pathian Ahura Mazda hnenah hmanlai Avestan tawng ngat hmangin a thlarau chhandamna an dil sak a,a vuitu mi 40 te biak nan tih loh ah chuan puithiamte hian vui hun chhung minute 25 zet chhung hian saptawng an hmang lo a ni.

            Vuina hi amah Freddie duh dan ang takin a larlo thei ang ber a buatsaih a ni a,a thian bul hnai leh chhungkhat laina tak tak te chauh an tel a ni.Vui chhung zawng hian a nu leh pa bakah a bialnu hlui Mary Austin leh zaithiam Elton John te chu an tap tluanchhuak zak a ni.An ni bakah hian a thian bul Dave Clark,Queen member 3 te leh Brian May bialnu,Anita Dobson te pawh an mittui a sur nasa hle bawk.

            Zing dar 9 ah chuan Rolls Roys car dum tle hlurh mai Freddie ruang phurtu chu West London thlanmual Kensal Rise hmun pan chuan muang changin a tawlh ta zul zul a,ruang phur motor hi Daimler car panga,pangpar,card leh uina thuziak Freddie-a’n a thih hnu a a dawn zozaite phurtu te chuan an zui nghal a,an hnungah Mercedes car pasarih zet,rock n roll khawvel a mi ropui berte zing a mi Freddie Mercury vuitute chuanna chuan a rawn zui bawk a ni.

            Musician vuina a ni bawk a,a vuina inkhawmah pawh music in hun a chang nasa hle.Soul singer lar em em,amah Freddie Mercury pawhin a lo ngaihsan em em thin Aretha Franklin record ‘Precious Lord,Take My Hand’ tih chu kuang an rawn zawn luh laiin an play ruai ruai a,chutah Aretha Franklin hla tho ‘You’veGot A Friend’ chu an han play zui leh bawk a,vuitute thinlung a khawih thar hle.Chutah opera lam an han play leh ta thung,Spanish hmeichhe opera singer,amah Freddie pawhin a lo duet pui tawh Montserrat Caballe hla ngei chu an han play leh ta bawk a nih kha,a hun leh hmun nen a in rem kher awm e.

            Pangpar  rawn hlantu te zingah David Bowie,U2 leh Gary Glitter te hming a langsar hle a,Gary Glitter phei chuan arsi pianzia a siam pangpar lian elkhen a rawn dah a,arsi pianzia a han thlang kher pawh hi Freddie tluka ‘star’ tling hi an awmlo a ni tih entirna mai a ni.Ti hian a ziak a: ‘Freddie,kan ui em em leh kan theihnghilh tawh ngai loh tur chu’, tiin.A bialnu hlui Mary Austin pawhin rose par eng leh var  tam tawk chungah lehkha them in hetiang hian a ziak bawk: ‘Ka duh ber leh ka hmangaih em em tan ka hlan e,i tana rinawm thin’ tiin.A thian Dave Clark thung chuan : ‘Ka thian,nunna hi chatuan a tan a ni a lawm,khawvel tana i hnathawh pawh hi chatuan a tan bawk a ni’ tiin a ziak thung.Elton John hian Heart shaped(thinlung pian zia) pangpar,rose par sendang a siam a rawn keng a,thuziak mawlte hetiang hian a hnutchhiah bawk: ‘Ka thian i nih avangin ka lawm e.Ka hmangaih fo vang che’ tih hi.Freddie ngaisangtu dang,mi lar Boy George thung chuan : ‘Duhtak Freddie,ka hmangaih che’ ti ngawt in thu ziak a rawn thawn thung.Heng a uina thuziak dawn zawng zawng a rilru khawih ber erawh chu a nu leh pa ten an fapa neihchhun ngawih ngawih Freddie Mercury an  uina thuziak an hnutchhiah : ‘Kan fapa duhtak Freddie,kan hmangaih che a,kan hmangaih reng ang che,I Nu leh Pa,’ tih  mawl tawite a an ziak hi a ni.Tichuan kumkhua a a sakhmel kan hmuh ngai tawh loh turin rock star ropui leh band ropui Queen hotupa Freddie Mercury chu a taksa piallei a luang ral turin West London thlanmual Kensal Rise ah chuan ui em em in an zalh ta a ni.

                        ‘Death on two legs,you’re tearing me apart,

                         Death on two legs,you’ve never had a heart of your own’,Freddie Mercury.

 

ZAWLKHAWPUI A ERIC MARTIN CONCERT CHU

Kum zabi thar a lo her chhuah meuh chuan kan Zawlkhawpui pawh Rock n Roll Tour map ah a lo awm ve ta a,rock band/star lar tak tak lo ni tawh thinte-Petra,Smokie,Firehouse, hei tunah Mr.Big vocalist ni thin Eric Martin  tour nei mek chu kan lo chang ve leh ta a.Ka hresual em ka hrelo a,Petra bakah khan an vocalist John Schlitt kha a lo kal leh tlat khan ka hria a,ka hresual mai thei e.Tunhma leh zual,rambuai kan la nih lai khan Soviet rock band Avtograf khan Zawlkhawpuiah International Friendship Concert tih ang chi,tour hranpa ni lemlo,India leh Soviet Sorkar in thianna ti nghet tur Concert kha an rawn nei  a,sumdawnna a ni lo.

Kum zabi tharah hian khawvel huap a Rock Rimawi khawvel a lar zet zet ten min rawn pal ve zauh thin hi a vanneih thlak ngawt mai.Rock rimawi kan luhchilh ve lai tak tak khan hetiang hun  te hi lo tawng ve ila,a nuam ti ber pawl chu ka ni ngei ang.Tunah erawh chuan kan rock band leh star-te pawh ‘Aging rock star leh band’ te an lo ni tawh a,keini ho rual,seventies leh eighties rock rimawi tui pui chin ho lah ‘Aging rock enthusiasts’ chan kan lo chang ve ti tih ta bawk nen,a tih ve tak tak theih tawh loh a ni e. A hmuna kal ve ta lemlo te pawhin kan cable TV neitute zarah TV ah duhtawkin kan lo thlir ve leh tho alawm.

Chanchinbu atanga kan lo hriat danin Eric Martin hian nuam a ti viau mai a,a band Mr.Big te nen nakkum 2017 World Tour an neihah Aizawl chu an tour map a rawn rin luh hram a duh thu a sawi e an ti a,he thu hi tisa a a chang a nih tak zet chuan a tuimi te tan chuan a vanneihthlak dawn mang e.

Eric Martin hi khawvel huapah pawh an lo class sang viau mai.A vanneihna em em chu Mr.Big a a band mate pahnih Paul Gilbert(guitarist) leh Billy Sheehan(Bassist) te nen a an inkawp hi a ni.Hemite pahnih Paul leh Sheehan te hi tuntumah khan lo kal tel ve ta chiah se chu khulai Tribal Art Centre leh a chhehvel a lenglo entu mipui an hmuh ka ring.Paul leh Sheehan te hi a hranpa a an chanchin ziah tham ngat a ni.He Rock rimawi khawvelah hian an theuneu lo teh a nia.Anni pahnih hi tun tumah khan lo kal tel ve ta chiah se kei he thu ziaktu pawh hi ka insum thei kherin ka ringlo.Mr.Big hi USA super group tih ve ngat an ni a. Mr.Big pawh hi UK ah khuan pop rock band 1970 khan an lo awm tawh a,hla hit te pawh an nei a ni awm e.Seventies kha an vanglai a ni a,1978 ah an an keh darh a,1990,American Mr.Big te vanglai tak khan in din thar ve lehin 1998 khan an break-up ta a ni.UK Mr.Big chuan US Mr.Big chu an khanlo hle thung chu a nih hi.

Mr.Big hrim hrim hi hard rock super group tih hial an ni kan tih kha,an neplo.An member tinte pawh hi an turu em em vek.Kan sawi tak Paul Gilbert leh Billy Sheehan te ngat phei chu Mr.Big khai dingtu ber an nih lai pawhin side band leh side project nei reng an ni a,sessions musician an ni bawk.An part an hneh em em theuh bakah an part lo pawh an hneh em em vek tho.2009  a an re-union tour,Japan ah khan heavy metal classic ‘Smoke On The Water’ an sa a,hemi tum hian Eric Martin chuan lead guitar a chang a,Bassist Billy Sheehan chu vocalist a ni a,Paul Gilbert chuan drums a chang a,an drummer Pat Torpey chuan bass – chang thung a,an part pangai ang chiahin an play tha a ni.Guitar solo hunah khan Eric Martin khan lead guitar chu Billy Sheehan pe chhawngin Billy chuan guitar solo part chu hneh em em in a han zut chiau ve leh mai a,an guitarist thiam chung chuang Paul Gilbert reng an ngailo,ani chu drummer seat a a thu tluan chhuak thak.Heti vel hi Mr.Big ho nep loh zia chu a ni,a chiang mai awm e.

Thangthar leh zual tan chuan Mr.Big pawh hranghlui chan an lo chang leh der tawh mai chu niin,thenkhat chuan Eric Martin chu Eric Clapton emaw tiin Eric Clapton show en an lo in beisei rawl nen.Keini India hmarchhak kilah pawh,a kil ber a awmte tan hian,aging rock star kan tih pawh chang ve tawh tho mahsae Eric Clapton te meuh hi chu chahchhuah an la har deuh hmel khawp mai.

Tun tum Eric Martin show ah hian sawi neuh neuh a tam hle mai.Kan media a chak lutuk tawh avang leh social network avang hian ti ti thangva,dik lemlo a tam thei hle,a pawi hle a ni.FB leh WhatsApp a an rawn pholan thenkhatte phei chu amah Eric Martin khan a hre leh ang tih pawh a hlauhawm hlel lo e! A chahchhuaktu Event Management te an fakawm ka ti a,a lo puitu band Boomarang te an fakawm hle bawk.Chubakah lo zai puitu Rosy leh midangte pawh an fakawm e.Kan zaithiamte world class singer Eric Martin-a’n zaipui tlak a a hmu leh Aizawl leh Aizawl crowd a fakna te kha a chhuanawm ngawt mai.A show neihna hmun kha khawpui daifem a nih avangin kal tum tam tak an kal remchang talo niin a lang a,hetiang World class show hi kan dawng chho ve zeuh zeuh tawh thin turah ngai ila,khelmual tha kan mamawh ang bawkin Concert pui thlen theihna tur Hall tha kan mamawhna a lian hle a nih hi.

Eric Martin Zawlkhawpui Show chung changah hian amah Eric Martin deuhsawhna leh fakna thu leng vak a tam hle mai.A zai pui thenkhat lo dem tawk an awm bawk.Lar tak pakhat chu Rosy K.Remsangpuii’n aEric Martin sak tur ‘To Be With You’ a sak khalh tih a ni.Mahse management lam sawi dan chuan amah Eric Martin-a’n  a sawm ang leh hla thlang tura Rosy a sawm a a thlan To Be With You chu an sa dun zawk a ni tih a ni.Management lam thu puan chu dik zawkah ka ngai mai.Dress chung chang sawi neuh neuh pawh a awm.Mut kawr ni a an sawi kha thenkhat chuan mut kawr a nilo an ti bawk.Ka kal velo a,mut kawr a ni emaw,nilo emaw,amah Eric Martin berin pawi a ti lemlo a niang,a zai pui tho chu a nia lawm.

Thenkhat chuan ‘A solo quit lo chauh ,Boomarang kha awm lo se crowd lam tan phurna tur a vang.Professional musician si khati taka a che ho leh a che mawlmang kha mak ka ti.Guitar te kha a perh sual ang nawk nawk a.Aizawl/India chu a dah sang vaklo hle a ang.A performance zawngzawng kha a professional na hmuh tur a vang,’ ka group telna pakhat a mi chuan a ti.A dang leh thungchuan ‘Group hrang hrangah selna awka leh duhkhawplohna kha ka ngaihtuah ve mai mai a.Khatianga amah chauh mai leh mahni ngei a in rem chawp a show a siam thei kha a ropui zia lanna a ni.Kan zaithiamte  hian mahni ngei in perh rem chungin show emaw mipui hmaa zaina ah emaw khatiang khan an ti ve thei ang em?Ka ring rih lo.Acoustic guitar,that hmel lutuk a lang bik lemlo nen chauh pawh miin show a siam thei a nih chuan tlukloh rim chu a nam hrim hrim a ni lawm ni?Kan zaithiam zingah an awm ve ang em?’ tiin a rawn ziak bawk.Engpawhnise,fak pawl leh fak lo pawl chu an awm ang chu,super group an tih meuh a vocalist lo ni tawh leh a pual a The Eric Martin Band te pawh lo nei ve ngat tawhin min rawn kal chilh a show min rawn neih sak kha a lawmawm hle a ni lom ni?

He show zara fiamthu lar tak FB leh WhatsApp a darh zau tak hi a tha hranpa ve tlat : ‘Eric Martin Concert Tanhril a light leh sound changkang tak karah stage hma rawn luahlum pahin mipui chawk phur turin rimawi remin ‘My name is Eric Martin,and what’s your name?’ a rawn ti.Mipui zinga hnung tawk atangin,rui tih hriat tak leh a hriat phak loh hlau a ring theih patawpin ‘Lal Jerome-a,Chaltlang,’ tih hi tha ka ti.A zawttu pawh hian a zawt mak a,mipui khati zozai hming han zawh chu chhan a harsa ve a lawm.Lal Jerome-a’n mipui reh duk tur ngai ngamlo a a rawn in volunteer hi ropui ka ti hranpa ve tlat mai !  RVT etc