SULHNU LEH LUNGLEN

Tunlai chu ka lung lengin nunhlui ka dawn in ka chhiar a,ka thinlungah thian hluite leh kan vul ve laini te a lo lang uai uai a,tichuan he article hi a rawn tlak zeh a ngai rih ta tlat mai a nih hi.Kumin 2016 October ni 14 hi ka thian tha leh unaupa,Rimawi khawvel a min hnuk luttu te zing a mi Zir Sangzela Hnamte in khawvel a chhuahsanna champhaphak vawi 14-na tur a lo ni ta reng mai.Kum sul sawm pali lai a lo vei dawn ta a nih hi,hmanni lawk kha ni maiin ka la hria a,mahse thangkhat lian a lo ni ve ta reng mai.Khawvel a chhuahsan champhaphak chu sawi loh,lehkha zir tur a Shillong khawpuia kan nu leh pa ten neihthinglung khawng a min chawm ve lai,lunglen tuar kan zir tak zawk hlauh hun lai te kha nimin lek emaw kan la tih laiin ‘Hmanlai’ a lo ni ve ta tak zet mai.Kum 2014 khan a nupui Pi Lalhungchhungi inah ‘Zir Sangzela Hnamte Memorial Society’ dinin,kei a thian bul lo ni ve ta chu Chairman-ah min vuah a,a pualin Siby Farm-ah hemi kum October ni 15 zan(a thih champhaphak vawi 12-na)ah hian hun te kan hmang ve kha a ni a.Mahse he Society hi kan awi nung zo hlei thei ta meuh lo a ni ber e.Chutih laiin thangthar zawkte zingah ‘Zir Sangzela Hnamte Fan Club’ te pawh an lo ding ta niin ka lo hria a,lawmawm ka ti khawp mai.A nupui,Pi  Lalhungchhungi Pachuau pawh a pasal hnung zuiin zai leh rimawi khawvel vawiin thlengin a la chhuahsan lo a,MZI General Hqrs ah Secretary a ni mek nghe nghe a ni.Han in hmuh nikhua chuan Sulhnu leh lunglen chhuiin rei tak,lungleng takin kan in bia a,nunhlui ram kan fang dun fo thin,chu chu kan tih theih sang ber a ni ta mai !

Khawvel hi chu kan kum hlun na tur a ni miau silo a,kan hmangaihten chelh din rual loh in mual min liam san a,sulhnu chhui leh nunhlui ngaiin tah a tul leh si thin a nih hi.He hun tawite ah hian keini a kara sulhnu zawng zawng kha ka chhui seng dawnlo,ka lunglen lah ka hri thla seng dawn heklo.

     Khawnge,hmanlai hunah let leh vawn vawn teh ang.Kumsul 40 chuang a liam ta,ni 3.9.1973(Thawhtanni) zan kha  Zo hla lenglawng leh lengzem hla tha tam tak tak phuahtu,2002 a min boral san tawh, Zir Sangzela Hnamte,Saji ti a kan koh thin nen kan intawnna hmasa ber chu a ni. College thuhmun a kal kan ni a,mi tawng tlem tak a ni a,kan inbe ngailo.Mizo zingah a tal lemlo bawk a,Thailand mi(Thai) emaw kan ti hman nghe nghe.Hemi zan hian ka unaupa(cousin) Zira Hnamte leh thian dangte nen kan in luah ‘Fox Hole’ kan tih maiah chuan Saji hi a rawn tek lut ve nawlh mai a.Hetih lai hian Golden Estate,Nongthymmai,Shillong-3 ah Pamama(R.Lalrinzuala,Ex-MLA) nen in kan luah dun a ni. Saji chuan dawhkan a ka Phantom/Mandrake comics chu a chhiar nghal chat a,a kawm a ka hming ziak a hmuh rual in ‘Hnamte i ni ve a law?’ a ti he haw a.chumi zan atang chuan kan inthlah tawhlo a ni ber.Ka Diary ah phei chuan Saji hming hi khami zan atang kha chuan a lang cham chi tawh mai a ni.Tichuan heta tang hian Saji,Pamama leh Zira Hnamte te nen inkawp chho zelin hla kan phuah ho a,kan zai ho a,vanglai kan chen a ni ve ber e.Liandailova Chhangte(L) in a sak lar ‘Chen Ang Vanglaini’ tih hla hi hetia kan inkawp chhoh tantirh October 1973 khan Zira Hnamte in kan thian zaho hla atan a phuah a ni a,a thluk hi Saji nen guitar a kan zawn dun a ni thung.A hla chang bul hawrawp mal tin chhiar thlak hian  kan thian zaho hming Zira,Saji,Rama,Rina(Pamama) tiin a chhiar thlak theih a ni.Khang hun lai te kha a va ngaihawm ta em!Zira Hnamte leh Pamama ten Zorama min haw san hnuin Saji,Lalnunmawia(Valtea),Duhzuala leh C.T.Ngura te nen inkawp chho zelin kan zai ho in hla kan phuah ho zel a.Uang pui chang suh ila,khatih lai a Shillong Mizote zingah na na na kha chuan hriat kan hlawh ve hle thin.Tihpui a awm tawh phawt chuan kan zai ve deuh reng mai.Radio artiste kan ni deuh vek a,radio ah kan zai a,kan in pui tawn a,hla kan in phuah pui a,tingtang kan in perh sak a,kan hmanraw neih ang hollow guitar leh dekchi chhin te nen thleng in kan ri ve tlak tlak thin.Hetih hun lai a kan hollow guitar hman lar em em chu a hmel en a tlawm tak,tha zet si,zaithiam lar hmasa Zova leh Mea te pawhin an lo hman fo tawh thin kha a ni.He ta Mea tih hi Thanliana a ni a,Thanliana leh a pawlte tiin radio ah an zai a,memberte chu amah Thanliana bakah Joseph Zokunga(L),Remmawia leh Kaia Paihte te an ni a,The Agents ti a hriat an ni bawk thin.1980 April thla thleng khan he guitar hi ka kawl a,Shillong ka chhuahsan hnu khan Pu V.Ramngena(L),ka thenawm pa thin khan ‘He guitar atang hian Mizo hla engzat nge chhuak tawh research ka bei dawn’ tiin a la chho ta a.A chhui chhuah hma in a boral ve leh ta mai a,a results hriat a chakawm teh reng nen a hriat theih ta loh a ni,a pawi hle.A ni tak a,kha guitar,a hmel en a tlawm tak atang khan tunlai Mizo hla hi a chhuak tam viau mai thei e.Sawi hmaih loh tur chu heng hun lai hian Lalbiakdika Hnamte(L),Saji nau,thangtharte hriat theih turin TV a thupuan thiam Priscila Hnamte pa  hi, kan zingah a chetla ve fo bawk a,hlaphuah thiam,zaithiam leh guitar thiam a ni a,min puibawm nasa hle thin.

     Kan tleirawl/tlangval lai a inkawm ngang kan ni a,nula kan rim ho in eng no no emaw te pawh kan dawm ho thin a,no dawm bakah ruihhlo dang erawh chu kan khawih ngai miah thung lo.Zan khat chu Shillong veng pakhat Cleve Colony ah Saji nen a bialnu kan rim dawn a.He nula hi a chhelo bawk a,a duh pawh a duh hle in ka hria.Keini student rethei takte tan chuan an in leh lote kha a ropui bawk a,len luh mai pawh  kha a zamawm viau reng a.Chumi zan chuan an in kan thlen dawn khan a ek a chhuak ta tlat a, a han inthiar leh rih a!A zan leh ah pawh chuan a ngai te in a ek a chhuak leh tlat a,kan nui nasa thei hle thin.Nula rim dawn in a ek a chhuak ziah pawh a ni bik lo,kha nula ber kher kha chu huhang a ngah in a husual a na deuh pawh a ni mah na.Hemi hnu hian nula dang,a duhzawng tak pawh kan rim fo,a ek a chhuah ka hre tawh ngailo.He nula hi chu a tha ve bawk a,amah vang hian hla 3 ai a tam mah chu a piangin ka hria,a phurh zawh loh tawp tur zun lo phurh tirtu kha a ni tlat a lawm,kan buaipui teh thin a nia.. Thaimami nu nen zing dar 2 vel a Pine View Cottage bul a Thaimami inchuh a kan in pawh laih laih laite kha ngaihawm lutuk nilo mahse mitthla ah a lo lang uar uar bawk mai.

No hi kan dawm ho ve zeuh zeuh e ka tih kha.Kan zai reng rengin Saji hi kan lead guitarist a ni thin a,Zira Hnamte hi kan vocals niin kei hian bass(hollow) ka perh a,Pamama’n dekchi chin leh khawn rik theih ang ang a khawng ri thin.1974 khan kan zing a radio artiste tling hmasa ber  Zira Hnamte in AIR Shillong ah contract a hmu a,kan zir ve tlut tlut a.Tichuan kan zu record dawn ta.Hetih lai hian Brother Peter-a,Pu Paul Zakhuma fapa kha Don Bosco School ah music in charge a ni a,a ni hian electric guitar set leh drum set min hawh tir a.AIR studio ah Pu P.S.Chongthu(Pu Sena) hmaah kan zu record ve ta.A hma hian kan no dawm kha kan lo duhthawh tlang deuh hlawm a.Saji phei chu a phur viau tawh mai  a. ‘A tawk tawh e,i ti tha theilo ang’ ka va ti dek dek a,a ni lah chuan ‘Tih danglam a ka awm  hian ka play tha thei daih zawk’ a ti  tlat mai si.Kan han record ta, Saji-a’n lead a han zut ta tak tak mai chu,guitar fret 2 te fret 3 ten a zut thelh chho ta,a lai ta ruai ruai mai,Pu P.S.Chongthu(Pu Sena) a meng phawk,mahse a nih dan tur rengah a ngai leh ta nge,a record hmiah hmiah zel mai bawk si.Kan record zo kan va ngaithla chu a lo lai nasa ruai ruai hle mai a,vawi tam kan ti  tha ta hial a lawm.Khulh tam poh leh play nalh tih chu tih mai mai a lo ni e.Hemi tuma kan hla record hi Zoram huap a lar tak tak te pawh a awm ve tho mai.Khati vel kha kan ni a,nuam kan ti in kan hlim ve thin a sin!A va ngaihawm thin em!Hmanlai an lo chang ve ta reng mai!!

    1977 ah AIR Shillong ah Saji nen hian a hla ‘Thuchah Hnuhnung ‘ kha kan record a,kan uluk khawp mai a,a thu mil in mitthi dar ang deuh te kha kan han khawng ri ve a, ‘hit’ kai hle tur pawhin kan beisei a ni.Mahse AIR hotuten an han belchiang a,kan ram buai lai a la ni bawk nen,broadcast ngam lovin an nawt reh leh ta a ni.Tun a a audio CD a mi ai hi chuan tha fe zawkin kei chuan ka hria.Chanchin sawi tur tam tak a awm,Thaimami hla lo pian dan te leh sulhnu dang chhui tur a va tam em!

Kan thian ho hi radio artiste kan ni deuh vek a,recording ah kan in pui tawn in zaithiam dangte pawh kan pui thin a.Khang hun lai a kan hmanraw neih hollow guitar,dekchi chin leh hollow bass guitar te kan hmang tlangpui thin,sapin Skiffle Band an tih ang chiah kha kan ni ve.Studio chhung a piano bang te pawh kan hmang tangkai bawk.Mahni tawk a kan lar ve hnu kha chuan keimahni ho bak chu artiste dang recordingah i pui tawh lovang u,cheng khat pawh kan hlawh ve ngai silo tiin kan in chhuang ve thin a.U Zualbawihi(Lalsangzuali Sailo) a lo zin thlak tawh erawh hi chuan psychology thiam tih takah min ti hliau hliau a,kan pui leh nge nge thin.

    1977 ah Motinagar ah in ka luah a,ka in luah hi ‘Xanadu’ ka ti a,inthlahrunna vak tur a awmlo bawk a,Saji,Lalnunmawia(Valtea),Lalbiakdika Hnamte(L),Duhzuala leh C.T.Ngura te nen zing dar 2 thleng thleng hian kan zai thin a.A tirah chuan kan zai pangai viau a,a rei tawlh tawlh a,kan phur tawlh tawlh bawk a,zanlai velah hi chuan a phuahtu ten duh taka an phuah lengzem leh lenglawng hlate kha lenkhawm zai thlukin guitar hnung lam bengin kan han sa ta mai thin a,thenawmte tan chuan kan ninawm thin ngawt ang.Mahse kan inluahna te Pu Bah Kama leh thenawm dang te khan min sawisel ngai miah lo.December ni 17.12.1977 hian kan thian dangte chuan Zoramah Krismas hmang turin min haw san hlawm tawh a,keini Lalnunmawia,C.T.Ngura nen kan pathumin kan la cham bang a.Hemi zan hian in rawt phurin Shillong veng hrang hranga kan ngamtlakte hnenah kan carol a.C.T.Ngura tingtang tuk chawp leh chhep chher nen lungrun leh lungleng takin Krismas hla kan sa a,kan pathum a a thu kan hriat tlan ber ‘A mi an riang maw..’ tih hla kha kan sa rim hle tih ka la hria.Hemi zan hian Rs 40 kan hlawh a,1977 kum kha chuan Rs 40 chuan thil a la tih theih khawp mai.Kan carol zawh zan rei lamah Nongthymmai field bul a Restaurant lar ve tak Darjeeling Restaurant ah kan han in ti lum leh rih a,zing dar 1 velah kan tin ta a nih kha.Khang lai hunte kha a va lo nuam ta mai mai em,tunah chuan ‘Sulhnu  leh lung ti lengtu’ a chang zo ta si a le,hmanlai an chang zo ta! Amah Saji hla ngei chuan ti hian i han ti tawp teh ang:

                   ‘Ka hril seng nem maw suihlunglen hi,

                     Hman a hlim te a lung kan rual lai;

                     Rihsang mual dan a leng khan rawn ngai ve che maw,

                     Engtin tuar ve maw suihlunglen hi.’ Zir Sangzela Hnamte(circa 1978)

 

RUALBANLOTE NI PUAL IN

Mizoten Rualbanlo kan tih hi saptawngin Disabled people/person an ti a.Tunlai chuan ‘disabled’ pawh ti phal tawh lovin ‘Differently Abled people/person’ an ti tawh nghe nghe a ni. ‘Disabled’ han tih khan thil engmah ti theilo ah kan chhuah lek lek in a lang a,thiam tak a ‘Differently Abled’ an lo ti ta hi a fuh khawp mai.Mizotawng chuan dah dawn ta i la, ‘thil engmah ti theilo ni bik lovin mi pangai tih dan ang lo deuh a an tih theih ti ve theitho’ tihna a ni deuh duah awm e. ‘Disabled’ han tih ngawt dawn chuan Joni Eareckson Tada te hi chuan mi pangai tam tak aiin tih theih a ngah zawk fe si awm e,chuvangin ‘Differently Abled’ tih hi a dik riau a ni..Pianphung a rualbanlo han tih hian pian tirh atang a rualbanlo sa te,accident avanga rualban zo talo te pawh an awm a.Rualbanlo te hi khawvel sorkar hrang hrangte hian an ngai pawimawh em em a,an pualin khawvel ram hrang hrangte hman turin December ni 3 hi Rualbanlote Ni, ‘World Disability Day’ ah an lo puang ta hial a nih hi.India sorkar emaw Mizoram sorkar emaw in engtin nge he ni hi an hman dawn chu ka hrelo a,helam pang a mawhphurtu pawl te pawh an awm a,programme te pawh an duang turah ngai mai ila.He ni pual hian khawvel pum huap mi lar tak tak,mahse ‘Pianphung a rualbanlo’ kan tih ang chi ni si te chung chang tlem ka han ziak ve a ni.

Mizote hi tun pianphung a rualbanlo leh mi anglo kan tih ang chi ho chhawnchhaih a bawlzan ching tak hnam kan ni thin a,a pawi hle.Tlem a huihphai deuh bawl a,bawl at zual te pawh kan nei thin.Tunah erawh chuan kan lo harh chhuak ve ta a, in bawl ai chuan khawngaihna nen a an mahni chhawmdawl duhna thinlung kan lo nei ta hle a,a Kristian in a Mizo khawp mai.Khawvel pum huap chu sawi loh Mizo zingah pawh rualbanlo lehkha thiam sang tak tak,mitdel chung a MA passed te,infiamna lam a thei tak tak te pawh sawi tur an awm nual ta mai..

Joni Eareckson hi kum 17 lek  a nih laiin a tui chenna ah a chesual hlauh mai a,a ring ruh a sawh tliak a,a taksa pum a zeng ta vek a,a lu chiah che theiin a dam chhungin wheel chair ah a thut a ngai ta a ni. A chetsual hma hian Pathian hnenah a nun thlak danglam ngai a awm chuan thlak danglam turin a tawngtai thin a.Chutia mu reng leh wheel chair hmanga che vel thei chauh a han ni ta mai chu a tawngtaina Pathianin a chhan dan em ni dawn tih a ngaihtuah nasa mai a.Chutia a in ngaihtuahna atang chuan a lo harh chhuak ta a ni..A taksa dang che theilo mahse a lu a chet thei a,a mit leh beng a tha a,a tawng thei bawk a,a ka,a lei leh ha te engkim a tha vek. Pathian hnenah inkawl tir thar lehin harh tharna a lo chang leh ta.Wheel chair a thu chungin Pathian hmangaihna thu a puang chhuak a, Joni chu Pathian thusawitu lar tak a lo ni ta mai. Chumai a la nilo,a ka leh ha te hmang tangkaiin lemziaktu ropui leh lar tak a lo ni ta bawk.Lemziahna brush chu seh kawh in kut ke kim nei te aimah a mawi leh nalh in lemziak a lo thiam leh ta.A lemziak(painting) te chu man man tak takin an hralh a,a lem ziak hmangin mi thinlungah thu a sawi ta bawk.Chu mai a la nilo cheu.Joni hian lehkhabu a ziaka ni satliah mai lova,lehkhabu hralh tla tak tak a ziak a,a lehkhabute chu best seller an tihte a ni nawk mai.Lehkhabu hi 30 chuang a ziak a ni.Lemchan thiam a la ni cheu bawk. ‘Joni and Friends’ invuah in Ministry a din bawk a,pianphung a rual banlo te zingah uar takin rawng an bawl bawk.

Joni hian Award chi hrang hrang a dawng tam hle a,University leh College  hrang hrang atangin Honorary doctorate degree 5 leh Bachelor of Letters a dawng bawk.Duh se chu a hming bulah Dr. a dah tam thei hle dawn a nih hi!!1982 khan kum 32 mi niin Ken Tada nen in neiin Pathian rawng an bawl dun a.April ni 1,2009 khan Indiana Wesleyan University Society of World Changers ah lawmluh(inducted)  a ni a,hemi tum hian Honorary Doctorate degree an hlan nghal nghe nghe a ni.

  Helen Keller pawh hi Joni Eareckson ang deuh bawk a rualbanlo a ni.A mit a thalo a,a beng a thalo bawk.Lehkhabu 14 a ziak a,articles tam tak a ziak bawk a,mitdelte leh pianphung a rualbanlo te pualin lecture pe in khawvel a hrut chhuak hial a,rualbanloh vang a mi beidawngte hnenah beiseina thar leh tumruhna a pe nasa hle a ni.

Stephen Hawking hi kan hre theuh ang,kum 21 a tlin hnu lawk 1963 khan natna khirh tak,hriatna thazam khawih chhe chi,motor neurone disease an tih Amytrophic Lateral Sclerosis (ALS) a vei tih hmuhchhuah a ni.a natna avang chuan wheel chair a nawr ngai,computer hmang a tawng thei chauh a ni ta.Mahse khawvel a scientist ropui berte zing a mi a nih bakah a lehkhabu ‘A Brief History of Time’chu Science khawvelah ngaihsan a hlawh tak a ni.Khawl hmang a tawngin lecture pek a thulh chuanglo. Greek mifing leh hlaphuah thiam ‘The Illiad leh the Odyssey’ ziaktu Homer hi mitdel niin an sawi bawk.Hmeichhe huaisen Joan of Arc kha phungzawl(epileptic) ching ni a sawi a ni bawk.Zaithiam lar chuai theilo Elton John hi mit chhe uchuak tak a nih bakah epileptic a sawi a ni ve bawk.

English poet lar tak John Milton pawh hi kum 43 a tlin hnuah a mit a del a.A mitdel hnu pawh in hlaphuah leh thuziah a bansan chuanglo.A thuziak lar tak ‘Paradise Lost’ pawh hi a mitdel hnu a a ziak a ni.German composer lar tak Ludwig van Beethoven pawh hi kum 28 a nih in a beng a ngawng a,mahse a beng ngawn vangin a hlaphuah a thulh chuang lo.

 Incredible Hulk film serial a lo chang tawh thin Lou Ferrigno hi bengngawng a ni bawk.Novel tam tak lo ziak tawh,a ziak zing a hriat hlawh tak pawh ‘Madame Bovary’ lar puitu Gustave Flaubert hi epileptic a ni bawk.Film star lar Michael J.Fox pawh hi neuromuscular(hriatna thazam leh tihrawl) natna vei a ni.Chutiang in The Messiah phuahtu George Frederick Handel leh hmanlai General ropui Hannibal te pawh kha epileptic an ni bawk.

Pianphung a rualbanlo han tih hian taksa a lang chhuak khawp a piangsual kher lo,bengngawng(bengngawng han tih hian bengchhet tihna te pawh a ni tih hria ila),mitdel,phungzawl nei leh a dangte pawh huam vek ta ila.Zaithiam Jose Feliciano hi mitdel a ni.Grammy Awards 6 a dawng tawh a,Grammy nomination 11 zet a hmu bawk.1973 khan Best Folk Guitarist Award chu Guitar Player Magazine in a lo hlan tawh bawk.African American zaithiam Stevie Wonder hi chu Zofaten ‘I Just call To Say I Love You’ hla avang pawh hian kan hre deuh vek awm e.A ni pawh hi mitdel a ni a,chuti chung chuan pianphung pangai zaithiam tam tak aiin rimawi khawvelah a hlawhtling a nih hi.

Tunlai zaithiam lar tak Michael Bolton pawh hi a beng lehlam ngawng niin an sawi.Soft rock hla lar pui em em tu Michael Bolton hi a beng lehlam chhet mahse a aw a lai chuanglo va,a zaithiamna a chuai chuanglo,album pawh maktaduai 53 teh meuh a

hralh a ni.

Zaithiam lam han hrut zel ila.Jeff Healey Band lar tak mai a an guitarist leh vocalist Jeff Healey pawh hi mitdel a ni,mahse an band lar zia leh amah mimal pawh a lar zia chu an band hming a a hming an hman danah hian a chiang reng mai.Jeff Healey hi kum 2008,March ni 2 khan a lo boral tawh nghe nghe a ni.

African American jazz singer lar tak Ray Charles pawh hi kum 7 a nih atangin a mit a del a,mahse chu chuan rimawi khawvel a a tuina a hmet mit zo chuanglo.Jazz  leh soul singer lar tak,khawvel hriat niin gospel hlate pawh tam tak a record a ni.Kum 73 mi niin ni 10.6.2004 a ni pawh a lo boral tawh bawk.

Country singer lar tak,lung kuai em em a zai thin Ronnie Milsap hi piantirh ata mitdel a ni.Chuti chung chuan rimawi khawvelah a hlawhtling berte zing a mi niin Grammy Award winner a ni bawk

Fakna hla(hymn) tha tak tak phuahtu Fanny Crosby hi thla 6 mi lek a la nih laiin damlohna avangin a mit a del a.Nikhua a lo hriat hnu pawhin a mit a del avangin vawikhat mah a vui lo an ti.School te kalin lehkha a zir a,zirtirtuah te tangin English leh History a zirtir thin nghe nghe a ni.Kristian hla 9000 zet a phuah a,a hun lai chuan ‘Hymn Queen’ an ti hial a ni.Kan hlabu ah pawh a hlaphuah tam tak kan seng lut nghe nghe anih hi.Vawikhat chu pastor pakhatin Pathianin talent tha tak tak a pek rualin a mit a del tlat mai pawi a tih pui thu a hrilh ngawt mai a.Fanny chuan rang zet in ‘Khai mai mai thin a,ka pian tirh khan Pathian hnenah thil dil dawn ta ila,mitdel hi ka dil ang,’ a ti daih mai.Pastor in engvang maw ti a a zawh chuan, ‘Vanram ka thlen huna ka mit ka men hun ah ka Chhandamtu hmuh hmasak ber ka duh a,chu hun ka ngaihtuah chuan he dam chhung a mitdel a awm mai mai te chu engah mah ka ngailo,Chhandamtu hmuh hlan ka nghakhlel ber mai,’tiin a chhang a ni.

Fanny hian hlaphuah mai bakah lehkhabu tha tak tak engemaw zat a ziak bawk.Kum 95 mi niin 12.2.1915 khan kumkhua a a chhandamtu kiang a mitvar a awm tawh turin khawvel a lo chhuahsan tawh a ni.

Chicago a pianphung a rualbanlo pakhat chu mitdel a nih mai bakah kut leh ke a neilo bawk.Ringtu tha tak a ni a,a chantawkah a lungawi em em.Kut leh ke neilo mahse Bible chhiar ve theih a duh si a,mitdelten kut a khawih a an  chhiar theih chi Braille hawrawp a zir ta a.Kut a neih siloh avangin a leiin Braille hawrawp chu liakin a zir ta a ni.Tichuan a lei hmangin Braille Bible a lo chhiar thei ta a,mi tam tak hnenah Pathian thu a hrilh theih mai bakah nitin Pathian thu chhiarin Pathian a pawl thei ta a ni.

Mizo zingah pawh pianphung a rualbanlo sawi tur an awm nual kan tih tawh kha.Pu Zadawla.Pathianthu hriltu lar tak pawh hi piantirh a ta mitdel niin an sawi.Mitvar nazawng aiin Pathian lehkhabu chhung thu,bung leh chang chu a hre daih zawk a,a thusawi atanga piangthar tam tak an awm a,a rawngbawlna a nun gem em a ni.

Pu Lalsangluaia Sailo, Samlukhai lal fapa hi a tet laiin zeng hri mak takin a man a,hnungzang pawng in tiang tawite hawlin kun in a kal thei a,.Thluak tha tak a nih avang leh lehkhathiam a nih avangin Tlabung khuaah Primary School a din a,Pu Luaia School tih a ni thin.A school naupangte chu an ziak a mawi a,chhiarkawp an thiam em em bawk a,a zirtir chhuah mithiam tam tak an chhuak a ni.

Awle,pianphung a rualbanlo te hi mi pangai kan tih tam takte ai a rualban zawk an tam mai a lo ni.Vawiin a pianphung a rualban loh vang a lungngai a kun rengte pawhin tum ruhna nen chuan he rualbanlohna hi hneh theih a ni tih hre thar lehin kumin Rualbanlote Ni(World Disability Day) hi hnehna puanna ni atan hmangin ‘Disable’ ni tawh lovin ‘Differently Able’ nih tumin tan lak thar leh nan hmang ngei ang u.Mi fate pawhin an tih theih chu kan ti ve thei ngei dawn lo’m ni?

RINAWMNA LEH ZO KRISTIAN-TE

 

Mizote hi tunhma chuan hnam rinawm,huaisen leh tlawmngai a sawi kan ni thin a.Mahse tunhnu hian rinawm,huaisen leh tlawmngai a in chhal fo ngam tur kan ni em tih te hi ngaihtuah tham tak a ni ta tlat mai.Tlawmngaihna chung changah hi chuan kan la chhuanawm viau chuan a lang a,mahse hmanlai kha chu a tluk ta lo deuh in phutchhuah tlawmngaihna te pawh a ang dawn dawn ta in a ngaih theih awm e. YMA hi awm ta lo se,he Mizo tlawmngaihna kan tih fo hi tun ang hian a la nung ang em tih pawh hi ngaihtuah tham a ni bawk.Rinawmna leh huaisenna chung changah phei hi chuan tunhma kan pha ta lo leh zual hle.Kan rinawmloh zia sawi tur tam tak a awm laiin kan rinawmna lam hi chu tlemte chu sawi tur a awm ve ta chauh mai.Huaisen chung changah pawh tunhma kha chuan hnam huaisen chu kan ni ngei thin e,Indopui 2-na lai hun te thleng pawh khan kan Mizo sipaite kha huaisen a sawi an ni fo.Mahse kan ram a lo buai a vai sipai kan han hmachhawn chiah atang khan he hnam huaisen tak thin kha a lo huaisen lutuk ta lo ni te hian ka hre ve thin.Vai sipai kan hlau em em a,a hnuah phei chuan kan lo ngam ve viau thin vai naran pawh kan ngam ta manglo zui a, Zoram pawnah phei chuan a tam zawk chu kan ti duk tawh mai a nih ber hi.Chuvangin Mizoten thupui bera kan neih tak fo chu ‘Hmanah chuan….’ tih kha a ni tawh ber mai a nih hi maw. ‘Hmanah chuan hnam huai,rinawm leh tlawmngai kan ni’ tih hi kan thupui a nih reng fo dawn chuan hma lam hun a englo viau ang le.

                                                                                                                                                            Tunhma kum 30 ai a tam mah  liamta ah khan Zo hnahthlak mi pakhat Shillongah khuan a awm a,an sawi danin  matric/BA pass lo te pawh khan chupa hnen atang chuan marksheet/certificate lem  leiin tha tak takah an pass leh mai thin an ti a.Sorkar beng pawh a thleng a ni ang,heng certificate lem nei ho hi thawkkhat lai kha chuan an man nual mai. Tunlai chuan markshheet chungchangah chuan hetiang hi a awm tawh lo turah ngai ila,he pa pawh hi khawnge a awm pawh kan hre tawh lo bawk a,a reh fel hmiah tawh ni hmiang ka ti mai a.He marksheet lem zuartu hi Mizo Kristian a ni a,kohhranah pawh member a ni.A marksheet lem leitu tam berte pawh kha Mizo Kristian tho an ni.Khang marksheet lem leitu thenkhat kha keipawh in hriat ka nei ve.Tunhnu deuh a che buai fe fe leh,jail a tang ta hial pawh an awm a ni. Khatiang marksheet lem lei leh hralh kha Mizo Kristiante zingah a reh hmiah tawh emaw kan tih laiin he article ka ziah mek lai a Zonet Fakselna Huangah chuan mi pakhatin IT Department ah Certificate lem hmang a hna thawk an awm ni awm in a rawn tarlang leh tlat mai.Certificate lem chung changah ringawt pawh Mizo Kristiante hian rinawmna kan tlakchham zia chu sawi tur a awm nual mai a nih hi.

            Tunhma a hnam rinawm,kawngkapui pawh thingfak a do mai thin,rukru leh misual rinawmlo ten hmun an chan ngailohna Mizo hnam kha khawvel lo changkang zelah hian hnam rinawm a hriat kan nih thinna a bo ta hle mai.Nuihza siam nan a an hman thin mai phei chu a ni na in,Mizo chartin ai a vai chartin a tling zawk te,Mizo cubic lung ai a vai ringlomite cubic lung a tling ta zawk a an sawi thinte hi dawt a nilo a sin.Fiamthu phenah hian thutak a awm thin.

            Ka chanchinbu lak ve, ka dah that ho ka han ching chhuak a.Hetih hun lai a front page luah chanchin thenkhat chu han tarlang mai mai ila:ACB in …..Director la,bail in chhuak nghal,Buhfai hralh ruk chingte hrem tum(The Aizawl Post ni 3.8.2010),Chiahpuam thubuaiah mi 9759 in hnamhnawih,Mizoramah Bank lem 21 awm(The Zozam Times 13.7.2010),Chiahpuam sum nuai 40 man belh(Zalen ni 18.7.2010),Melriat ah buhfai hralh ruk man(Tawrh Bawm ni 21.7.2010),Medical certificate ringhlel,Bank sum tih chingpen thuah Dy.Manager man,Supply tih chingpen tih tawp tumin tan la mek(The Aizawl Post ni 27.7.2010),Pawisa telna inbumna laka fimkhur turin RBI in mipui chah,Buhfai hralhruk kaihhnawih ah man(The Aizawl Post ni 18.8.2010),Mizoram 4534,99,830.139 Sq.Km in a zau belh(Evening Post ni 20.7.2010),Dan bawhchhia a electric hmang ru 350 man an ni(Zalen ni 12.9.2010).A dang pawh a tam mai a,chanchinbu a mi zawng zawng chu kan tarlang senglo ang.Mizoram sq.km a a zau belh tih hi a awmzia chu inhmun lo ram enkawltu lam in LSC a pek thuah nasat lutuk vang a ni ber a.Hei pawh hi dawt a thil tih a tam vang a ni.Kan LSC neih zawng zawng atanga chhut hian kan ram hi khiti khawp a zau khi a ni daih a,mahse a tak takah chuan khi ai khian a zim hle si a ni tih lan nan ka han tar chhuak ve a ni.Kum 2010 hnu lam chanchinbu a ka hmuh zawng zawng phei chu tarlan sen a nilo a,ka tarlang lo law law mai.

            Mizo Kristianten rinawmna kan tlakchham zia ti lang chiang em em pakhat leh chu kan population ai a nuai 2 zet a kan ration card a tam tih an han hmuchhuak te hi a ni,a va zahthlak em!Kan duham na lutukah hian khua kan hmu tawh lo a,ration card kan siam in kan chhungkaw member ni hleilo te kan telh hrehlo a,kan member thi tawhte thlengin rei tak kan telh thin a nih hi.

            Bazarah han kal ila,kan sa duh zawng leh thlai duhzawng pawh kan lei tha ngam tawhlo a ni ber a.Chakai ni se tur a hrai a nih kan ringhlel a,sangha rep ni se chuti bawk.Mizo Kristian theuh theuh tumah hi kan in ring zo tawhlo a ni ber e.Hei hi eng dang vang mah a nilo,kan rinawm loh em vang a ni.Lunglei bul a De lui chengkawl saw a tui an ti a,Lunglei khawpui a chengkawl zuar tawh phawt chu khawi chengkawl nge tih han zawt ila, ‘De chengkawl’ an ti deuh vek mai,mahse a tam zawk chu a ni teuh silo.Kan thil kan hralh theih na tur a nih phawt chuan Mizo Kristiante hian dawt sawi pawh kan hreh tawhlo a nih hi.Balhla hmin ang a lang nazawng pawh hi damdawi hmang a hmin ang a lan tir,a chhung erawh hmin silo a ni ta fo bawk.Hetiang hi khaw karkawng thil zawhnaah a hluar bik.Kan sa zuar thenkhatte lah chuan sa hrisello leh duk dak manglo pawh a leitu in kan hriat dawn loh chuan an hralh hreh tawhlo a,heng mite pawh hi an veng kohhranah chuan kohhran member an ni ve vek tho.

            Mizo Kristian,1980 hma lam a sorkar hnathawk tam berte kha chu kan pian kumah kan daw vek a,kan kum tak aiin kan naupang deuh vek.Heihi a chhan chu khang hun lai khan kan zirtirtute khan matric kan pass khan an rin ang ang khan kan kum an lo dah in,an lo ti naupang tlangpui a.Chu chu kan ring ta mai a,a diklo tih kan hriat hnu pawhin tih dik tum kan awm chuang lemlo.Thenkhat phei chuan remchang hmu ila,kan in ti naupang duh reng niin a lang.Hetiang a a ruk a pension/retire har duh vang a kum tih naupan tum a ‘file’ lo ti khawlo te pawh kan rual u te khan an sawi ka hre tawh a ni.Chutiang ti tute pawh chu Mizo Kristian tho an ni.Sawi tawh ang khan kan pian ni leh kum a dawt kan sawi deuh vek avang hian sorkar hnathawh kawngah kan pension/retire hun tur aia tlaiah kan pension/retire vek a,chumi awmzia chu sorkar pawisa leh hun kan eiru a,kan hnuaia mite promotion tur thlengin kan dang thin a nih hi.Hemi chungchangah hian Pu Saingenga,P.U.College,Aizawl, Principal thin kha a fakawm hle.A pianni diklo a ziak a nih ve tho avangin a pension/retire hun tur aia hmaah,a pian kum dik tak atanga chhut a a pension/retire hun tur kum diktakah a pension/retire  ngam a ni.Ni,Mizo zingah chuan Kristian dik tak ni chunga sorkar hnathawhte hi a harsa a,thil diklo,a lian emaw a te emaw tih ngai deuh tlat hian a lang a,engemaw han ziahbo maite kha a lo tul thin tak a,dik taka thil tih tum tan harsatna chin a awm tlat thin ni in a lang. Missionary ni mek Khawtinkhuma chu Health Worker a ni thin a,a pianthar veleh Kristian piangthar tan sorkar hna dik taka thawh har em a a hriat avangin a hna a bansan a,full time in Missionary a tan a in pe hmiah mai tih an sawi ka hria a,ropui ka ti hle mai.Amaherawh chu Mizo Kristian sorkar hna thawk te hian diklo takin thil an ti vek a,sorkar hna thawk tlak an nilo tihna zawng a ni love,mi fel leh rinawm chu an awm teh meuh,a tam erawh chu an tam lutuk lo a ni mahna.

            Hman deuh khan khawizu lem te,ha tih faina lem te grep wine lem thleng a zuar a mi bum an awm thin a.Khang an thil lem zawrh te kha taksa hriselna atan a hlauhawm tak vek an ni.Khang zuartute kha Mizo Kristian tho an ni.Kan zu zuar hote pawh hian an hlawkna tur a nih dawn phawt chuan an zu siamah thil thalo telh an hrehlo niin a lang.Anmahni dawr thintute kha thi thuai mahse pawi an tilo a niang,an hlawk dawn phawt chuan.Hetiang titute hi Mizo Kristian te tho an ni a,an vengah kohhran member an ni ve vek tho.Mizo Kristian,Lalpa zawnchhuah ram a cheng inti leh Pathian hnam thlan ni a in ngaite hi kan Pathian rinawm tak lakah hian kan rinawm hlawllo a,kan Pathian hi kan ti mualpho tak zet a ni tih hi kan ngaihtuah ngai em aw?

            Kan rinawmloh avangin sorkar in a hnathawkte tan a Leave Travel Concession(LTC) a siamsak thin pawh tih tawp sak kan ni daih tawh.Silchar leh Shillong thleng chauh a kalte pawhin Kanyakumari thleng a TA kan bill zel vangte kha a ni ber ang.Thenkhat phei chu station chhuahsan miahlo a bill te pawh an awm a ni.MR Bill a sorkar a strict em em na chhan pawh hi ‘dawt MR’ a tam vang a ni tih kan hria.Kan TA/DA bill dan hrim hrimah pawh kan rinawmlo,kohhran upa meuhte pawh an fihlim chuanglo awm e.Thlarau MR(Muster Roll) te pawh kan sawi thin kha,kan la hria em?A mak a ni ti rawh u.Kan sorkar NLUP pekchhuah kawng a a fimkhur em em pawh hi a demawm loh,kan ram hruaitute hi kan rinawmloh zia hrechiangtu  an ni tlat a lawm.Revenue Dept. a inhmun lo ram in pekthuah a awm fo mai te,inhmun awm tak taklo hralh a ni thinte hi tu te tih nge?Kohhran a lawi ve tho te an ni lo’m ni? Eiruk thubuai avanga sorkar hnathawk,officer leh officer lo te pawh suspend an va tam em!ACB te hian chhui tur an va ngah em!An chhui senglo a nih ber hi.Engatinge interim bail leh anticipatory bail tih te hi mi nazawngin kan hriat bel tak hlei hlui mai le?Krista zuitu,Mizo Kristiante,miin rinawm tur a an ngaihte kan rinawm loh vang a ni tih hi phat rual em ni dawn?

In en chian kan ngai e : A nawlpui hi chuan rinawmna kan tlachham a ni e,zep thu a chenglo.Heti te chuan engtin nge kan vel a ringlo mite hi Krista hnenah kan hruai theih teh lul ang le?Kan vel a ringlo mite hian kan nun an thlir a,kan nun an chhiar a sin!Lunglei vai dawrkai hlun Pu Birena chuan Kristian nih tul a tilo,kan danglamna a hmulo a,kan rinawmna aiin kan rinawmlohna a hmu tam zawk tih min hrilh. College a ka thawh pui thin S.K.Prasad chuan ‘Kristian nih hi a tulna ka hrelo,in thusawi thin leh in nun dan a in anglo,in danglamna ka hmulo’ a ti. In enchian kan ngai khawp mai.Ringlo miten kan that bikna leh kan rinawm bikna an hmulo a ni.Pathian rawngbawl a tei chhuak thinte pawh an bang chuanglo.Hmanah Speaker lar takin Crusade na a zai tur a a hruai thin,kan lo mikhual ve tawh chuan a pa damlo phaiu hruaina tur sum an mamawh avangin pukah min dil a,ka neih zawng zawng aia tam puk chawpin ka pe a,kum 9 a liam ta,a hmel ka hmu leh tawh ngailo.Kha mi kha rawngbawl a Pathian faka zai thin a ni.Pathian in a tih thianghlim a chhal a,tui damdawi hmang a Aizawl Electric veng a rawngbawl thin pawh kha a tak takah chuan zu rui thin,hmeichhia a hmuh fal a khawih duh mai thin a lo ni a,police in an man ta nghe nghe.A Lalpa lakah a rinawmlo a,ringtute a la bum zui a nih kha.

            Sawi hmaih hauh loh tur chu chiahpuam puakkeh ta kha mawle.Chiahpuamah khan Mizo Kristiante sum leh pai leh hausak thut duh vanga kan rinawmloh zia chu a lang nasa hle.Hei bakah RBI meuhin Bank leh Financial Institution lem a a puan neitu leh buaipuitu Mizo Kristiante zing a kan lo awm ve nuk maite khan kan hausak phah dawn phawt chuan kan hnam pui leh kan Kristian puite chu bum hlum thak pawh pawi ti lo khawpin kan duham in kan lo rinawmlo a ni tih a ti lang chiang hle a nih kha.

            Mipat hmeichhiat hman diklohna,uirena sual lo tam ta em em mai te pawh hi Mizo Kristian rinawm chu ni tlat fo ila chu he tiang em em hian a punlun lo tur.A zir mite sawi dan in Aizawl khawpuiah ringawt pawh hian mipat hmeichhiatna lama rinawmlohna avanga nupa hlimlo leh inthen hial pawh tam tak an awm tawh an ti a ni.

            Kan rinawm lohna langsar tak pakhat dang leh chu inkhelh nikhua ah,under 20,under 15 tih velah hian kan kumah dawt kan sawi nasa thin hle bawk mai.Hengte hi chu kum dik tak hian ti mai theuh ila,a tha mai tur hi a ni a.Under 20 a khel zingah han en reng reng a kum 20 pel tawh tih hriat rengte kan han lim tir puat puat thin mai hi chu a zahthlak a ni.Complaint awm mahse under 20 a nihna certificate lem kha a lo nei khiau zel mai bawk si.Birth Certificate te pawh hi a lem a lo awm leh zel a,pian kum mai ni lovin pianna hmun thlengin a thiamte chuan an lo ti danglam leh mai zel bawk.A lem lem khawvel kan buaipui em avang hian Mizo Kristiante hi kan lem vek tawh a,ringtute mize zahawm ber pakhat rinawmna pawh hi a tam zawk chuan kan bosal tial tial chu a nih hi,in enchian kan ngai a ni. ‘Hmanah chuan Mizo te hi hnam rinawm kan ni’ ti a thawnthu sawi mai mai lovin hawh u,Mizo hnam rinawmna,ringtu kan nih hma daih a kan lo chawi vul thin kha tun a ringtu kan nih tawh hnu hian i chawi vul thar leh ang u,tichuan Mizo rinawm,Kristian rinawm kan lo ni leh dawn nia.

Bei nge sei Run dung le : Mahse ngaiteh, thahnem ngaih luatah a thim lam hlir kan ziak a.Mizo Kristiante zingah hian rinawm tak tak,Baala hma a thingthi ngailo chu an la tam mai,beidawng lutuk lovang u.Kan local TV ah leh kan nitin chanchinbuah te pawisa tam tham tak bo char thute,taxi a thil theihnghilh taxi pu in a pek let leh te leh thil dang tamtak pawh a awm a nia.Mizo thisen ah hian rinawmna leh tlawmngaihna chu a la awm tlat a.Khawvel thang zel vang a sum leh pai itna,nawmsak leh hausak thut duh vanga mi thenkhat, chu rinawmna hmet mit ta mai  chu an awm thin vang in rinawm ta lo lutuk in kan lang pawh a ni thei e.I beidawng lutuk lovang u.Kristian kan nihna nen a kal kawp tlat ‘rinawmna’ vawng nung leh tur hian kan Pathian i dil ang u,tichuan he hnam hi ‘Hnam rinawm’ tiin khawvel in min hre leh ngei ang tih ka ring tlat a ni.Kristian kan nih ang ngei hian kan nihna hi a takin lan tir ila,chutiang a kan tih chuan rinawmloh pawh tum ila,kan rinawmlo theilo ang.Tichuan kan contract hna chhe tak tak thin te,kan kawnglaih belhchian dawllo tak tak leh kan kawng rawra phah leh alkatra luan chhia leh tlolo tak takte,contract a kan in sak chhe hma leh tlolo tak takte hi Mizo Kristian in rinawmna nen a a thawh hunah chuan a chhe tawh lo ang a,belhchian a lo dawl tawh ang a,a lo tlo em em tawh bawk dawn a ni.

 

Hallelui rual rawhse mual zawng zawng

Zo Krismas hla tha ber pawl, classic tling  pha leh thlarau nun chawm em em ‘Mal Min Sawm Turin’ tih hla phuahtu Patea chuan ‘ A fak hla nawn r’u, Van mipui Seraf-ten; Tuifinriat leh khawvel zawng hi, Zaiin khat se,Halleluia!’ tiin kum 70 vel liam tawhah khan sual fate min tlan tura Pathian Fapa meuh inngaitlawm a khawvel a a lo kal ropui zia chu sawi fiah thiam rual a nilo a,a fak hla sa in tuifinriat leh khawmual zawng zawng hi zaiin khat se, fak a zaiin khawvel hi Halleluia fawn dup dup mai se tiin duhthawh em em in a lo au chhuah pui tawh a ni.

          Tunhma deuh khan chanchinbu thenkhat leh regular taka ka ziah ve thinna Lelte Weekly chanchinbu ah hian kan upa zai thluk mawi leh Zo hliah hliah mai hmang hian Pathian hi fak ve tawh ila, tuna kan fak hla hman mekte pawh hi chawi nung zel tho siin, kan hrawk in a mil zawk dawn bawk si a, kan tui puiin a fuh hle zawk a ka rin thu ka ziak tawh thin a.Mahse khuang pawh Pathian fak nan a rei tak lo hmang duh tawhlo leh sual a lo ngai tlat thin thenkhatte  ngaihdan a lo ni lo em em mai chu niin, na tak tak a khakna te pawh ka dawng ta nual a.Mahse he ka ngaihdan hi a la thi thei miah lo a,Mizo kan ni a,kan Mizo upa zai thluk mawi tak Pathian fak nan a kan iai tlat mai hi ngaih dan dik a ni an gem ? tiin ka la tang fan a. Pathian hian hla thluk ringawt te chu a lo hnualsuat lem dawn em ni? Kan hla tui pui em em pakhat ‘Nangma Thil Ropuite An Sawi’ tih thluk pakhat zawk Biakin-ah pawh kan sak ve fo thin  hi German ho hnam hla thluk tho a ni lawm ni kha ? Kan ngaihtuah chian deuh chu a tha lo maw?

          A tlangpui a ka  rawn dah chhuah khi Kristian sakhua a kal fawr deuh ho,kan biak dan leh hla sak thin pangai duhtawk lo a in tel hrang ta Thiangzau kan tih thinte  hla pakhat a mi a ni.Thenkhat chuan sak pawh kan sak pui duh lo, a uchuak deuhte phei chuan ngaihthlak pawh an ngaihthlak duh loh thin a ni awm e. He hla hi ka hre chhuak lo a,Mizo upa zai chikhat thluk a an phuah a ni tih erawh ka hre ve.A hma a Patea hla kan sawi, kan hla duh leh kan hla chuam, Krismas lai a kan sak rim ber pawl hla thu a kan hmuh ang hian ‘Tuifinriat leh khawvel zawng zawng zaiin khat se,Halleluia !’ tih leh Thiangzau ho hla a kan puh ‘Hallelui rual rawhse mual zawng zawng’ tih hi a eng nge ropui zawk chuang ang aw ka ti thin .Patea’n  tlanna ropui zia a hmu chiang a hla a a remkhawm ta ang hian he Thiangzau hla phuahtu pawh hian Pathian hmangaihna leh chhandamna a buatsaih ropui zia hi a hmu chiang em em a, tlang leh mual zawng zawng hian Pathian fakin HALLELUIA han ti rual hluah hluah mai se,chu chu kan Pathian hian a phu ngawih ngawih a ni a tihna ve tho a ni lawm ni ?Chuti khawp a hla thu ropui leh ril, Pathian in chhandamna min buatsaih sak ropui zia phawk chhuak tha tak chu a thluk avangin kan sa duh ve ta lo a ni mai lo maw? Ka han ti ve a nih hi.